ប្រទេសកូរ៉េខាងជើង ៖ ក្រសួងការបរទេសកូរ៉េខាងជើងថ្លែងកាលពីយប់ថ្ងៃទី៦ ធ្នូ ថា សមយុទ្ធយោធារួមរបស់កងទ័ពអាកាសអាមេរិក និងកូរ៉េខាងត្បូងជាការគំរាមកំហែងដែលធ្វើឱ្យសង្គ្រាមមួយនៅឧបទ្វីបកូរ៉េមិនអាចចៀសផុត ។
ក្នុងសេចក្តីថ្លែងការណ៍មួយផ្សាយដោយទីភ្នាក់ងារព័ត៌មានកូរ៉េខាងជើង KCNA អ្នកនាំពាក្យក្រសួងការបរទេសប្រទេសនេះនិយាយថា បញ្ហាតែមួយគត់នាពេលនេះគឺការចង់ដឹងថា តើសង្គ្រាមមួយផ្ទុះនៅពេលណា ។ យើងពុំចង់បានសង្គ្រាមទេ ប៉ុន្តែយើងក៏ពុំខ្លាចសង្គ្រាមដែរ ហើយប្រសិនបើសហរដ្ឋអាមេរិកមើលស្រាលការអត់ធ្មត់របស់យើង ហើយដុតបញ្ឆេះសង្គ្រាមនុយក្លេអ៊ែរនោះ គេនឹងត្រូវរងការបង់ខាតធ្ងន់ធ្ងរបំផុត ដោយសារបណ្តាផលវិបាកនៃកម្លាំងនុយក្លេអ៊ែររបស់យើង ហើយយើងបានពង្រឹងខ្លួនជាប់ជានិច្ច ។
កូរ៉េខាងត្បូង និងសហរដ្ឋអាមេរិកចាប់បើកធ្វើពីថ្ងៃទី៤ ធ្នូ មកនូវសមយុទ្ធយោធាជើងអាកាសយ៉ាងធំបំផុតមួយក្រោយការសាកល្បងមីស៊ីល រំលងទ្វីបថ្មីរបស់ក្រុងព្យុងយ៉ាង HWASONG-15 ដែលកូរ៉េខាងជើងថា អាចបាញ់ដល់គ្រប់ចំណុចទាំងអស់នៃដែនដីអាមេរិក ៕
ចែករំលែកព័តមាននេះ