ប្រទេសរុស្ស៊ី ៖ លោកវ្ល៉ាឌីមៀរ ពូទីន ប្រកាសកាលពីយប់ថ្ងៃទី៦ ធ្នូ ឈរឈ្មោះជាបេក្ខជនសម្រាប់ការបោះឆ្នោតប្រធានាធិបតីរុស្ស៊ីនាខែមីនា ឆ្នាំ២០១៨ ដែលជាការប្រជែងយកអាណត្តិទី៤មួយទៀតជាមេដឹកនាំប្រទេស ដែលលោកដឹកនាំចាប់តាំងពីឆ្នាំ២០០០មក ពោល១៧ឆ្នាំមកហើយ ។
លោកពូទីន ពេលទៅកាន់ទីក្រុង NIJNI NOVGOROD ដើម្បីចូលរួមខួប៨៥ឆ្នាំ នៃការបង្កើតរោងចក្ររថយន្តមួយ បណ្តាកម្មកររោងចក្រផលិតរថយន្ត GAZ នេះបានស្នើឱ្យលោកឈរឈ្មោះជាប្រធានាធិបតីបន្តទៀតដោយពួកគេប្រកាសគាំទ្រយ៉ាងពេញទំហឹង។ លោកពូទីន ឆ្លើយតបវិញថា ខ្ញុំសូមអរគុណចំពោះការជួយគាំទ្ររបស់លោកអ្នក ហើយខ្ញុំនឹងឈរឈ្មោះជាបេក្ខជនសម្រាប់តំណែងប្រធានាធិបតី សហព័ន្ធរុស្ស៊ីទៀត ។ ពេលនោះបណ្តាកម្មករបាននាំគ្នាស្រែកជ័យឃោសថា «RO-SSI-YA! RO-SSI-YA!!» ប្រែមកថា «ជយោ! រុស្ស៊ី» ។
បើលោកពូទីន ឈ្នះក្នុងការបោះឆ្នោតនាពេលខាងមុខ នោះលោកនឹងស្ថិតនៅជាប្រធានាធិបតីរុស្ស៊ី រហូតដល់ឆ្នាំ២០២៤ ហើយលោកនឹងជាមេដឹកនាំរុស្ស៊ីយូរជាងគេបំផុតបន្ទាប់ពីលោកចូសេប ស្តាលីន ។
ការប្រកាសនេះដែលគេរង់ចាំបំផុតបានបញ្ចប់ភាពស្ងៀមស្ងាត់របស់វិមានក្រឹមឡាំងពីចេតនារបស់លោកពូទីន ដែលដឹកនាំប្រទេសចាប់តាំងពីជាង១៧ឆ្នាំមកហើយ ។
លោកពូទីន អាយុ៦៥ឆ្នាំ ថ្លែងថា ខ្ញុំសូមប្រកាសពីការឈរឈ្មោះរបស់ខ្ញុំសម្រាប់តំណែងប្រធានាធិបតីរុស្ស៊ី ។ រុស្ស៊ីនឹងបន្តដើរទៅមុខ ហើយចលនាដើរទៅមុខនេះគ្មាននរណាមួយនឹងអាចបញ្ឈប់បានជាដាច់ខាត ។ លោកអះអាងបែបនេះ ខណៈទំនាក់ទំនងរវាងក្រុងមូស្គូ និងលោកខាងលិចធ្លាក់ចុះដុនដាបបំផុតចាប់តាំងពី បញ្ចប់សង្គ្រាមត្រជាក់មក ដោយសារវិបត្តិអ៊ុយក្រែន ជម្លោះនៅស៊ីរី ព្រមទាំងរឿងអាស្រូវប្រើថ្នាំដែលគេចោទប្រឆាំងបណ្តាកីឡាករុស្ស៊ី ។
ឡើងកាន់អំណាចកាលពីឆ្នាំ២០០០ ក្នុងប្រទេសមួយដែលអំណាចពុំមានស្ថេរភាព ហើយសេដ្ឋកិច្ចស្រុតចុះ លោកពូទីន ត្រូវបានពលរដ្ឋរុស្ស៊ីភាគច្រើនសរសើរ ព្រោះតែលោកជាមនុស្សធ្វើឱ្យមានស្ថេរភាព និងមានភាពរុងរឿងថ្មី ដោយសារជាពិសេសការលក់ប្រេង ៕
ចែករំលែកព័តមាននេះ