រាជធានីភ្នំពេញ ៖ ក្មេងប្រុសអាយុ១៤ឆ្នាំម្នាក់ បានស្លាប់ភ្លាមៗនៅនឹងកន្លែង ដោយសារតែចរន្តអគ្គិសនី ហេតុការណ៍នេះបានកើតឡើង កាលពីវេលាម៉ោង១០ព្រឹកថ្ងៃទី០៧ ខែធ្នូ ឆ្នាំ២០១៧ ស្ថិតនៅក្នុងភូមិកំបូល សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ។
ក្មេងប្រុសរងគ្រោះឈ្មោះធី រដ្ឋា អាយុ១៤ឆ្នាំ មានម្តាយឈ្មោះថាយ សើ អាយុ៣៨ឆ្នាំ មុខរបរកសិករ និងឪពុកឈ្មោះកែវ ធី អាយុ៤៩ឆ្នាំ មុខរបរកសិករ មានបងប្អូនចំនួន៤នាក់ ប្រុស២នាក់ ស្រី២នាក់ ហើយក្មេងប្រុសរងគ្រោះ គឺជាកូនទី៣ មានទីលំនៅក្នុងភូមិកើតហេតុខាងលើដែលមានភាពក្រីក្រផងដែរ ។
ព័ត៌មានបានឲ្យដឹងថា ក្មេងប្រុសរូបនេះមិនបានរៀនសូត្រ នឹងគេទេ ដោយសារតែគ្រួសារមានជីវភាពទីទ័លក្រពេក បានបង្ខំឲ្យរូបគេឈប់រៀន ហើយបានទៅស៊ីឈ្នួលច្រកនំ និងគ្រាប់ឈូកលីងឲ្យអ្នកជិតខាង ។ ដោយឡែកនៅមុនពេលមានគ្រោះកើតឡើងរូបគេបានអង្គុយកាន់ម៉ាស៊ីនអ៊ុតផ្ទិតមាត់ថង់ ដែលច្រកគ្រាប់ឈូកលីងរួច ពេលនោះស្រាប់តែម៉ាស៊ីនអ៊ុតឆ្លងចរន្ត បណ្ដាលឲ្យឆក់ដួលប្រកាច់ស្លាប់ភ្លាមៗតែម្ដង ។
ប្រភពដដែលបានបន្តទៀតថា ដោយសារតែមិនអស់ចិត្តថា រូបគេស្លាប់ក្រុមគ្រួសារបាននាំទៅកាន់មន្ទីរពេទ្យដើម្បីសង្គ្រោះបន្ទាន់ ។ប៉ុន្តែគ្រូពេទ្យបានប្រាប់ថា ក្មេងប្រុសបានស្លាប់បាត់ទៅហើយ ទើបដឹកសពត្រឡប់ទៅផ្ទះវិញ និងបានរាយការណ៍ជូននគរបាល ចុះទៅពិនិត្យកោសល្យវិច្ច័យ និងកសាងសំណុំរឿងទៅតាមផ្លូវច្បាប់ ។
ប្រជាពលរដ្ឋបាននិយាយថា ក្មេងប្រុសរងគ្រោះខាងលើបានរស់នៅក្នុងគ្រួសារក្រីក្រមួយដែលរកបានព្រឹកខ្វះល្ងាចរកបានល្ងាចខ្វះព្រឹក ហើយដោយសារតែបែបនេះរូបគេបានទៅស៊ីឈ្នួលច្រកនាំនិងគ្រាប់ឈូកលីងឲ្យអ្នកភូមិ ។ ចំណែកឪពុកម្ដាយ និងបងប្អូនបានស៊ីឈ្នួលច្រូតស្រូវឲ្យគេ បើខែស្ទូងដកទៅស៊ីឈ្នួលដកស្ទូងឲ្យគេ ព្រោះបើមិនដូច្នេះទេប្រាកដជាគ្មានបាយហូបឡើយ ។ ប៉ុន្តែជាអកុសលក្មេងប្រុសខាងលើបានស្លាប់ ដោយឆក់ចរន្តអគ្គីសនី ហើយក្រុមគ្រួសារមិនមានលុយធ្វើបុណ្យឡើយ បានអ្នកភូមិជួយបន្តិចបន្តួចម្នាក់ដើម្បីបានធ្វើបុណ្យសពប៉ុណ្ណោះ ៕
ចែករំលែកព័តមាននេះ