តារាសម្តែងអ្នកនាងព្រំ រដ្ឋា ដែលទស្សនិកជនស្គាល់ច្បាស់តាមរយៈការសម្តែងជាតួអង្គនាង«ម៉ឺយចឺយ»ក្នុងចម្រៀងខារ៉ាអូខេ «ម៉ាក់ថឺង» ចាប់កំណើតនៅថ្ងៃទី៥ មិថុនា ឆ្នាំ១៩៨១ នៅទីរួមខេត្តតាកែវ ដែលជាស្រុកកំណើតរបស់ឪពុកម្ដាយនាងផងដែរ ។…
តារាសម្តែងអ្នកនាងព្រំ រដ្ឋា ដែលទស្សនិកជនស្គាល់ច្បាស់តាមរយៈការសម្តែងជាតួអង្គនាង«ម៉ឺយចឺយ»ក្នុងចម្រៀងខារ៉ាអូខេ «ម៉ាក់ថឺង» ចាប់កំណើតនៅថ្ងៃទី៥ មិថុនា ឆ្នាំ១៩៨១ នៅទីរួមខេត្តតាកែវ ដែលជាស្រុកកំណើតរបស់ឪពុកម្ដាយនាងផងដែរ ។ ព្រំ រដ្ឋា ហៅស្រីប៉ុច មានបងប្អូនចំនួន៥នាក់ក្នុងនោះស្រី៣នាក់ និងប្រុស២នាក់ ចំណែកនាងគឺជាកូនពៅ ។ ឪពុកឈ្មោះព្រំ ស្រៀង ជាអតីតមន្ត្រីចូលនិវត្តន៍នៃមន្ទីរអប់រំខេត្តតាកែវ និងម្ដាយឈ្មោះថូ វណ្ណា បានទទួលមរណភាពទៅហើយ ដោយសារជំងឺមហារីក នៅឆ្នាំ១៩៩៧ ។
បាត់បង់អ្នកម្តាយ
អ្នកនាងព្រំ រដ្ឋា និងក្រុមគ្រួសារបានចំណាយប្រាក់យ៉ាងច្រើនលើការព្យាបាលម្ដាយ ក្នុងនោះមានទាំងការបញ្ជូនទៅព្យាបាលនៅមន្ទីរពេទ្យក្នុងប្រទេសវៀតណាម ជាច្រើនលើកផង ។ ទោះជាយ៉ាងណាក្តីការខិតខំរបស់ក្រុមគ្រួសារមិនអាចរក្សាជីវិតម្តាយបានទេ គឺគាត់បានបាត់បង់ជីវិតទៅ ។ អ្នកនាងព្រំ រដ្ឋា អាឡោះអាល័យអ្នកម្តាយជាពន់ពេក ម្យ៉ាងសោកស្តាយដែលគាត់មិនបាននៅមើលឃើញកូនស្រីក្លាយជាតារាសម្តែងល្បីឈ្មោះ ។
នៅពេលម្តាយលាចាកលោកទៅនោះ លុយកាក់ ទ្រព្យធនស៊ឹងតែអស់ទៅដែរ ហើយ បងៗរបស់អ្នកនាងព្រំ រដ្ឋា សុទ្ធតែមិនមានជីវភាពល្អប្រសើរទេ ។ ក្រោយពេលអ្នកម្តាយស្លាប់ទៅអ្នកនាងព្រំ រដ្ឋា មានអារម្មណ៍ថាហាក់ដូចជាព្រលឹងគាត់តាមជួយជ្រោង កូនៗគ្រប់គ្នា ។ ជាក់ស្តែងប៉ុន្មានឆ្នាំក្រោយមក បងប្អូននាងទាំងអស់សុទ្ធតែបានជោគជ័យក្នុងជីវិត ដោយ បងៗរបស់នាងមានជីវភាពប្រសើរឡើង ជាពិសេសរូបនាងក្លាយជាតារាសម្តែងល្បីឈ្មោះ ។
ឃ្លាតចាកស្រុកកំណើត
កាលនៅតូចអ្នកនាងព្រំ រដ្ឋា រៀននៅសាលាបឋមសិក្សាតាកែវ គឺនាងបានចូលសាលាពេលអាយុ៦ឆ្នាំ ក្នុងអំឡុងឆ្នាំ១៩៨៧ ។ ចប់បឋមសិក្សានាងរៀននៅអនុវិទ្យាល័យ និងវិទ្យាល័យជា ស៊ីម តាកែវ ។
អ្នកនាងព្រំ រដ្ឋា នៅឆ្នាំ១៩៩៧បានចាកចេញពីស្រុកកំណើត រស់នៅជាមួយបងប្រុសបងស្រី នៅរាជធានីភ្នំពេញ ដែលវាជាការងាយស្រួលសម្រាប់បន្តការសិក្សានៅមហាវិទ្យាល័យ ។ នៅឆ្នាំ១៩៩៩ អ្នកនាងព្រំ រដ្ឋា បានចូលរៀនផ្នែកគណនេយ្យ នៅសាកលវិទ្យាល័យជាតិគ្រប់គ្រង បន្ទាប់ពីនាងបញ្ចប់ការសិក្សានៅវិទ្យាល័យនាឆ្នាំ១៩៩៨ ។
បានរយៈពេលពីរឆ្នាំកន្លះ អ្នកនាងព្រំ រដ្ឋា ព្យួរការសិក្សាព្រោះតែមិនមានពេលគ្រប់គ្រាន់ ដោយមមាញឹកខ្លាំងចំពោះអាជីពជាតារាសម្ដែង និងការងារជាពិធីការិនីទូរទស្សន៍ ។
ទេពកោសល្យរុញច្រានឲ្យក្លាយជាពិធីការិនី និងតារាសម្តែងនៅដើមឆ្នាំ១៩៩៩ បន្ទាប់ពីបានជាប់ក្នុងការជ្រើសរើសធ្វើជាពិធីការិនីរបស់ស្ថានីយទូរទស្សន៍ប៉ុស្តិ៍លេខ៣មក អ្នកនាងព្រំ រដ្ឋា ត្រូវអ្នកគ្រប់គ្រងឲ្យកាន់កម្មវិធី ធំៗជាបន្តបន្ទាប់ព្រោះតែនាងមានទេពកោសល្យខ្ពស់ចំពោះការអត្ថាធិប្បាយ ។ តាមរយៈកម្មវិធីអានព័ត៌មានខ្លីៗ និងតាមដានកម្សាន្ត ជួយឲ្យនាងត្រូវមហាជនចាប់ផ្តើមស្គាល់ ។ ឆ្លងកាត់ការងាររហូតដល់ឆ្នាំ២០០០ អ្នកនាងព្រំ រដ្ឋា ក្លាយជាពិធីការិនីល្បីឈ្មោះ ពិសេសនៅពេលនាងចាប់ដៃគូជាមួយលោកភោ សុផានិត ក្នុងកម្មវិធីផ្សាយផ្ទាល់ឈ្មោះ«ពិភពតន្ត្រី» និង«Hello Ozone»បន្ទាប់ពីនាងសេក សេរីរ័ត្នបានរៀបការ ហើយចាកចេញទៅរស់នៅសហរដ្ឋអាមេរិក ។
ឱកាសបង្ហាញមុខដ៏ស្រស់ផូរផង់តាមកញ្ចក់ទូរទស្សន៍ ជួយអ្នកនាងព្រំ រដ្ឋា ទៅកាន់ទំព័រជីវិតប្រសើរថ្មីមួយទៀត ។ នៅចុងឆ្នាំ១៩៩៩ លោកហ្វៃ សំអាង និងអ្នកស្រីចាន់ ធី មន្ត្រីនៅទូរទស្សន៍ជាតិកម្ពុជាពេញចិត្តជ្រើសអ្នកនាងព្រំរដ្ឋា សម្ដែងជាតួអង្គនាងម៉ឺយចឺយ សម្រាប់ចម្រៀងខារ៉ាអូខេរឿង«ម៉ាក់ថឺង»។ ខារ៉ាអូខេនេះល្បីល្បាញជាទីពេញនិយមតាំងពីឆ្នាំ២០០០ រហូតមក ។ តាមរយៈតួអង្គនាងម៉ឺយចឺយនោះហើយធ្វើឲ្យនារីស្អាតមានប្រភពកំណើតនៅខេត្តតាកែវរូបនេះក្លាយជាតារាល្បីមួយដួងក្នុងពិភពសិល្បៈសម្តែង។
អ្នកនាងព្រំ រដ្ឋា ចូលរួមថតស្ប៉ត និងចម្រៀងខារ៉ាអូខេ ជាបន្តបន្ទាប់ ដូចជាខារ៉ាអូខេរឿង«ព្រះធិនវង្ស» រឿង«ម៉ាក់ភូយង់កែវ» និងរឿង«មាយើង»របស់ផលិតកម្មនៅក្រៅប្រទេស ។ ចំពោះខ្សែភាពយន្តខ្នាតធំនាងបានចូលរួមសម្តែងក្នុងរឿង «ព្រះលក្ស្មណ៍ធិនវង្សនាងព្រាហ្មណ៍កេសរ»នៅឆ្នាំ២០០៣ ។
បន្ទាប់ពីនោះមកអ្នកនាងព្រំ រដ្ឋា បានចាកចេញពីពិភពសិល្បៈដោយសារតែនាងរៀបការជាមួយបុរសជាណាណិកជនខ្មែរនៅបរទេស ហើយចាកចេញពីស្រុកកំណើតទៅរស់នៅតាមស្វាមី ។ មានព័ត៌មានថាស្វាមីរបស់នាងជាបុរសអ្នកមាន ហើយផ្តល់ឱកាសឲ្យនាងគ្រប់គ្រងមុខជំនួញនៅសហរដ្ឋអាមេរិក ជំនួសអាជីពសម្តែងរបស់នាង ។
អាពាហ៍ពិពាហ៍ច្រានជីវិតពីស្រុកកំណើត និងសិល្បៈ
លោកម៉ោ ច័ន្ទតារាអ៊ំ អាយុជាង៣០ អាណិកជនខ្មែររស់នៅសហរដ្ឋអាមេរិក ចាប់ចិត្តស្នេហាទៅលើអ្នកនាងព្រំ រដ្ឋា ។ តាមរយៈការព្រមព្រៀងគ្នា អ្នកទាំងពីរបានភ្ជាប់ពាក្យនឹងគ្នានៅឆ្នាំ២០០២ ។ បន្ទាប់មកបុរសជាគូដណ្ដឹងបានរត់ការច្បាប់ដើម្បីឲ្យអ្នកនាងព្រំ រដ្ឋា ទទួលសិទ្ធិចាកចេញទៅសហរដ្ឋអាមេរិក ដោយលើកហេតុផលថា នាងចេញទៅរៀនថ្នាក់បរិញ្ញាបត្រ។
ចំណាយពេល៦ខែបានសម្រេច ហើយអ្នកនាងព្រំ រដ្ឋា ក៏ឡើងយន្តហោះចាកចេញពីស្រុកកំណើតទៅសហរដ្ឋអាមេរិក ។ អ្នកនាងព្រំ រដ្ឋា សោកស្ដាយ អាឡោះអាល័យស្រុកកំណើតពន់ពេក ប៉ុន្តែជារឿងជីវិតដែលត្រូវតែទៅរៀបចំសង្គមគ្រួសារថ្មីមួយ ។
នៅអាមេរិក អ្នកនាងព្រំ រដ្ឋា បានរៀបការជាមួយលោកម៉ោ ច័ន្ទតារាអ៊ំ នៅថ្ងៃទី៣១ ខែកក្កដា ឆ្នាំ២០០៣ ក្រោយពេលនាងទៅដល់ទីនោះបានប៉ុន្មានខែ ។ មូលហេតុមិនបានរៀបការនៅប្រទេសកំណើត ដោយសាររត់ការច្បាប់ក្នុងនាមជាគូដណ្ដឹងវាមានភាពងាយស្រួលចាកចេញទៅអាមេរិកជាង ដូច្នេះហើយទើបអ្នកនាងព្រំ រដ្ឋា សម្រេចចិត្តទៅរៀបអាពាហ៍ពិពាហ៍នៅទីនោះ ។
ទោះជាបានរៀបការនៅអាមេរិកហើយក្តី អ្នកនាងព្រំ រដ្ឋា បានប្រាប់ក្រុមគ្រួសាររបស់នាងនៅស្រុកកំណើតថានាង និងស្វាមីនឹងមករៀបការម្ដងទៀតនៅកម្ពុជា ។ ចង់រៀបការនៅស្រុកកំណើតដើម្បីញាតិមិត្តបានចូលរួមផង និងឲ្យអ្នកគាំទ្រជាទស្សនិកជនទូទៅបានដឹងផង ។
អ្នកនាងព្រំ រដ្ឋា បង្ហាញការណ៍ពិតជីវិតអាពាហ៍ពិពាហ៍បែកបាក់ក្រោយពេលសាលក្រមលែងលះចេញពីតុលាការនៅសហរដ្ឋអាមេរិកនៅអំឡុងចុងឆ្នាំ២០០៩ ។
ក្នុងអំឡុងពេលត្រឡប់ពីអាមេរិកវិញដមបូងអ្នកនាងព្រំ រដ្ឋា ធ្លាប់ចំណាយប្រាក់ជួលត្រាក់ទ័រឲ្យក្រុមហ៊ុនឈូសឆាយ កាប់គាស់ដីចម្ការ ប៉ុន្តែបានមួយរយៈក៏ក្ស័យធន ខណៈវិស័យដីធ្លីធ្លាក់ចុះ ។
អ្នកនាង ព្រំ រដ្ឋា
អ្នកនាងព្រំ រដ្ឋា មានគម្រោងបើកជំនួញ តែបំណងរបស់នាងហាក់នៅឆ្ងាយហួសពីអ្វីដែលអាចធ្វើបាន ។ នាងមានបំណងចង់រកស៊ីច្រើនជាងសិល្បៈ ប៉ុន្តែមិនប្រាកដទៅលើរបរអ្វីទេ ព្រោះនាងមើលឃើញគេចាប់យកច្រើនមុខ ច្រើនផ្នែកទៅហើយ ។ ទោះជា
យ៉ាងណាក្តីបើមានលទ្ធភាពអ្នកនាងព្រំ រដ្ឋា ចង់បើកសម្អាងការ ។
ដោយធ្លាប់រស់នៅសហរដ្ឋអាមេរិកអ្នកនាងព្រំ រដ្ឋា មានគំនិតទាក់ទងផ្តល់ឱកាសឲ្យតារាចម្រៀងទៅសម្តែងនៅអាមេរិក តាមរយៈម្ចាស់ឧបត្ថម្ភ ដែលជាបងធម៌របស់នាង បន្ថែមពីលើអាជីពជាពិធីការិនី ។ ក្រៅពីនេះនាងបានកាន់កម្មវិធីពីរនៅទូរទស្សន៍អាស៊ីអាគ្នេយ៍ បន្ទាប់ពីចាកចេញពីប៉ុស្ដិ៍លេខ៣ និងអប្សរា ។
អ្នកនាងព្រំ រដ្ឋា បានចូលសិក្សាថ្នាក់បរិញ្ញាបត្រអក្សរសាស្ត្រអង់គ្លេសនៅសាកលវិទ្យាល័យបៀលប្រាយ ដើម្បីបង្កើនចំណេះជំនាញសម្រាប់ការងារពិធីការិនីរបស់នាងកាន់តែប្រសើរឡើង ។
នៅពេលមិនទាន់អាចបើកជំនួញបានអ្នកនាងព្រំ រដ្ឋា ចង់រៀនពីបច្ចេកទេសផលិតកម្មវិធី ហើយទិញម៉ោងទូរទស្សន៍ផលិតកម្មវិធីដោយខ្លួនឯងតែម្ដង ។
បច្ចុប្បន្នអ្នកនាងព្រំ រដ្ឋា មិនទាន់មានគូគាប់ថ្មីនៅឡើយ ៕
ចែករំលែកព័តមាននេះ