ខេត្តស្ទឹងត្រែង ៖ វារីអគ្គិសនីសេសានក្រោម២ ជាប្រភពផ្តល់ថាមពលរហូតដល់៤០០មេហ្កាវ៉ាត់ និងត្រូវបានចែកចាយប្រើប្រាស់នាពេលខាងមុខនេះ ទៅតាមបណ្តាខេត្តនានាដែលកំពុងខ្វះថាមពល ។ កាលពីថ្ងៃទី០៦ ខែធ្នូ ឆ្នាំ២០១៧…
ខេត្តស្ទឹងត្រែង ៖ វារីអគ្គិសនីសេសានក្រោម២ ជាប្រភពផ្តល់ថាមពលរហូតដល់៤០០មេហ្កាវ៉ាត់ និងត្រូវបានចែកចាយប្រើប្រាស់នាពេលខាងមុខនេះ ទៅតាមបណ្តាខេត្តនានាដែលកំពុងខ្វះថាមពល ។
កាលពីថ្ងៃទី០៦ ខែធ្នូ ឆ្នាំ២០១៧ លោក កែវ រតនៈ អគ្គនាយកអគ្គិសនីកម្ពុជា រួមនិងមន្ត្រីអគ្គិសនី បានអញ្ញើញចូលពិនិត្យវារីអគ្គិសនីទន្លេសេសានក្រោម២ ក្នុងនោះតាមរយៈហ្វេសប៊ុកឈ្មោះ ៖ (kroko ក្រគរ ជួយ ក្រគរ) បានឱ្យដឹងថា ៖ វារីអគ្គិសនីទន្លេសេសានក្រោម២ បានធ្វើការសាកល្បងម៉ាស៊ីនទី១ ដោយបញ្ជូនថាមពលបាន៥០មេហ្កាវ៉ាត់ ទៅក្នុងបណ្តាញជាតិ ។ នៅពេលខាងមុខជាបន្តបន្ទាប់ម៉ាស៊ីន៧គ្រឿងទៀត នឹងដាក់ដំណើការទាំងស្រុងគម្រប់៤០០មេហ្កាវ៉ាត់ ។ ជាមួយនឹងជោគជ័យនៃម៉ាស៊ីនទី១នេះ ក្នុងរយៈពេលប្រមាណមួយខែខាងមុខ អគ្គិសនីកម្ពុជានឹងបញ្ជូនភ្លើងប្រមាណ១០មេហ្កាវ៉ាត់ទៅជួយខេត្តរតនៈគិរី និងមណ្ឌលគិរី ដែលកំពុងខ្វះ ។ គម្រោងវារីអគ្គិសនីនេះ ជាចំណែកមួយនៃយុទ្ធសាស្ត្រពង្រីកការផ្គត់ផ្គង់ និងការបន្តចុះថ្លៃអគ្គិសនីរបស់ សម្តេច ហ៊ុន សែន ។
បើតាមការបញ្ជាក់ពីលោក កៅ វាំងអ៊ីវ តំណាងក្រុមហ៊ុនបានឲ្យដឹងថា ៖ វារីអគ្គីសនីសេសានក្រោម២ និងដំណើរការ១០០ភាគរយ រហូតដល់៤០០មេហ្កាវ៉ាត់ នៃថាមពល គឺនៅចុងខែតុលា ឆ្នាំ២០១៨ ខាងមុខ ។ ដោយឡែកដើមខែធ្នូ ឆ្នាំ២០១៧ នេះ មានការសាកល្បងម៉ាស៊ីនទី១ និងបញ្ជូនថាមពលបាន៥០មេហ្កាវ៉ាត់ សម្រាប់ប្រើប្រាស់ ។
យោងតាមសេចក្តីជូនដំណឹងរបស់អាជ្ញាធរអគ្គិសនី ចុះថ្ងៃទី០១ ខែធ្នូ ឆ្នាំ២០១៧ អាជ្ញាធរអគ្គិសនីកម្ពុជ គ្រោងនឹងបន្ថយបញ្ជីថ្លៃលក់អគ្គិសនី នៅតំបន់ធ្វើសេវាកម្មរបស់អគ្គិសនីកម្ពុជា នៅទីរួមខេត្តក្រចេះ ខេត្តស្ទឹងត្រែង និងខេត្តមណ្ឌលគិរី ដែលទើបទទួលប្រភពអគ្គិសនីពីបណ្តាញជាតិ តាមប្រភេទអតិថិជន និងអាត្រាថ្លៃលក់អគ្គិសនី សម្រាប់ខួបឆ្នាំ២០១៧ ដើមខែមករា ឆ្នាំ២០១៨ ដល់ចុងខែមិនា ឆ្នាំ២០១៨ លំនៅដ្ឋានពលរដ្ឋ ដែលប្រើប្រាស់មិនលើសពី១០kwh ក្នុង១ខែ អាត្រាលក់ចាស់៩៥០រៀលក្នុង១kwh អាត្រាលក់ថ្មី៤៨០រៀលក្នុង១kwh, ប្រើប្រាស់១១ ដល់៥០kwhក្នុង១ខែ អាត្រាលក់ចាស់៩៥០រៀលក្នុង១kwh អាត្រាលក់ថ្មី៦១០រៀលក្នុង១kwh ចំពោះការប្រើប្រាស់ចាប់ពី៥១kwh ក្នុង១ខែឡើងទៅ អាត្រាលក់ចាស់៩៥០រៀលក្នុង១kwh អាត្រាលក់ថ្មី៧៧០រៀលក្នុង១kwh ។
វារីអគ្គិសនីសេសានក្រោម២ គឺមានកម្លាំងថាមពល៤០០មេហ្គាវ៉ាត់ ដែលនឹងដាក់ឱ្យដំណើរការជាលើកដំបូងនៅឆ្នាំ២០១៨ ដែលមានកម្លាំងផលិតបាន ១.៩១២លានគីឡូវ៉ាត់ម៉ោង ។ ចំពោះតម្លៃដែលលក់ឲ្យអគ្គិសនីកម្ពុជាគឺ ៦,៩៥សេនអាមេរិកក្នុង១គីឡូវ៉ាត់ម៉ោង ក្នុងរយៈពេល៤០ឆ្នាំ (BOT) បន្ទាប់មកនឹងត្រូវប្រគល់ជូនរាជរដ្ឋាភិបាលកម្ពុជាគ្រប់គ្រងទាំងស្រុង ។ ក្រោយពីចប់៤០ឆ្នាំ គឺរដ្ឋយកមកគ្រប់គ្រងទាំងស្រុង ឬជួលបន្តឲ្យក្រុមហ៊ុន ៕
ចែករំលែកព័តមាននេះ