ខេត្តព្រះវិហារ៖ យោងតាមសេចក្តីប្រកាសកាលពីថ្ងៃទី៥ ធ្នូ ២០១៧ ឲ្យដឹងថាសត្វទាព្រៃស្លាបសចំនួន២ក្បាល ត្រូវបានគេជួយសង្គ្រោះនៅក្នុងដែនជម្រកសត្វព្រៃគូលែន ព្រហ្មទេព ខេត្តព្រះវិហារ ខណៈពួកវាត្រូវបានអ្នកភូមិប្រទះឃើញមានភាពទន់ខ្សោយ និងមិនអាចហើរបាន ។ ទាព្រៃស្លាបសទាំង២ក្បាលនេះត្រូវបានក្រុមអ្នកអភិរក្សនៃក្រសួងបរិស្ថាន និងអង្គការសមាគមអភិរក្សសត្វព្រៃ (WCS) ប្រគល់ទៅក្រុមការងាររបស់មជ្ឈមណ្ឌលអង្គរសម្រាប់ការអភិរក្សជីវចម្រុះខេត្តសៀមរាបដើម្បីពិនិត្យ និងមើលថែរក្សា រហូតដល់ពេលពួកវាជាសះស្បើយ និងអាចរស់នៅក្នុងធម្មជាតិវិញបានទើបលែងទៅក្នុងព្រៃវិញ ។
ទាព្រៃស្លាបសស្ថិតនៅក្នុងបញ្ជីក្រហមរបស់អង្គការIUCN ជាប្រភេទរងគ្រោះជិតផុតពូជនៅលើសាកលលោក ដោយសារតែចំនួនរបស់ពួកវានៅបន្តធ្លាក់ចុះយ៉ាងខ្លាំងតាមរយៈការបាត់បង់ទីជម្រក ការរំខាននៅតាមដងព្រែក និងការបរបាញ់ជាដើម ។ ចំនួនទាព្រៃស្លាបសនៅលើសាកលលោក មានចន្លោះ២៥០ទៅ១០០០ក្បាល ក្នុងនោះដែរវាមានចំនួនតិចតួចរស់នៅក្នុងប្រទេសកម្ពុជា ។
លោករស់ វ៉ាន់ ប្រធានក្រុមស្រាវជ្រាវប្រចាំដែនជម្រកសត្វព្រៃគូលែន ព្រហ្មទេពនៃក្រសួងបរិស្ថាន និងអង្គការWCS បាននិយាយថា «បន្ទាប់ពីទទួលបានព័ត៌មានពីអ្នកភូមិ ក្រុមអ្នកអភិរក្សរបស់មន្ទីរបរិស្ថាន និងអង្គការ WCS បានធ្វើដំណើរទៅកាន់ភូមិឈូក ស្រុកគូលែន ខេត្តព្រះវិហារ ដើម្បីទទួលយកទាព្រៃស្លាបសទាំង២ក្បាលនេះ ហើយប្រគល់បន្តឱ្យក្រុមការងាររបស់មជ្ឈមណ្ឌលអង្គរសម្រាប់ការអភិរក្សជីវចម្រុះដើម្បីយកទៅមើលថែរក្សាមួយរយៈពេលខ្លី រហូតដល់មានកម្លាំងដូចធម្មតាទើបលែងទៅក្នុងធម្មជាតិវិញបាន ។
ការអប់រំប្រជាសហគមន៍ឱ្យយល់ដឹងអំពីការងារអភិរក្សសត្វព្រៃ បានលើកទឹកចិត្តឱ្យពួកគាត់ផ្តល់ព័ត៌មានអំពីសត្វព្រៃមកកាន់ក្រុមអ្នកអភិរក្ស ។ ប្រសិនបើពួកគាត់មិនបានយល់ដឹងអំពីសារសំខាន់នៃការងារអភិរក្សសត្វព្រៃទេនោះ ពួកគាត់ប្រហែលជាយកទាព្រៃស្លាបសទាំង២ក្បាលនេះទៅបរិភោគបាត់ទៅហើយ » ។
តំបន់ខ្ពង់រាបភាគខាងជើងប្រទេសកម្ពុជាក្នុងខេត្តព្រះវិហារ ដែលរួមបញ្ចូលទាំងដែនជម្រកសត្វព្រៃគូលែន ព្រហ្មទេព ដែនជម្រកសត្វព្រៃព្រះរកា និងដែនជម្រកសត្វព្រៃឆែបផងដែរនោះគាំទ្រដល់ការរស់នៅរបស់សត្វស្លាបប្រភេទរងគ្រោះជាសាកលជាច្រើនប្រភេទ ។ សត្វស្លាបទាំងអស់នោះរួមមាន ត្រយងយក្ស ត្រយងចង្កំកស និងសត្វត្មាត៣ប្រភេទដែលសត្វស្លាបទាំងអស់នេះសុទ្ធតែជាប្រភេទរងគ្រោះជិតផុតពូជនៅលើសាកលលោក សត្វទាព្រៃស្លាបស និងសត្វព្រៃជាច្រើនប្រភេទផ្សេងទៀត ។ កម្មវិធីការពារសំបុកសត្វស្លាប គឺជាគម្រោងអភិរក្សមួយបង្កើតឡើងដើម្បីដោះស្រាយបញ្ហាការប្រមូលពងកូនរបស់សត្វស្លាប ។ តាមរយៈគម្រោងនេះ ប្រជាសហគមន៍រស់នៅក្នុងដែនជម្រកសត្វព្រៃគូលែន ព្រហ្មទេព និងឆែប ទទួលបានប្រាក់ឧបត្ថម្ភ ប្រសិនបើពួកគាត់ទទួលបានជោគជជ័យក្នុងការងារត្រួតពិនិត្យការពារនិងយាមសំបុកសត្វស្លាប សំខាន់ៗរហូតដល់ពេលកូនវាញាស់ ។
លោកMichael Meyerthoff ប្រធានគម្រោងប្រចាំមជ្ឈមណ្ឌលអង្គរសម្រាប់ការអភិរក្សជីវចម្រុះ បាននិយាយថា« ទាព្រៃស្លាបសទាំង២ក្បាលនេះបានមកដល់មជ្ឈមណ្ឌលអង្គរសម្រាប់ការអភិរក្សជីវចម្រុះ ហើយឥឡូវនេះ យើងកំពុងត្រួតពិនិត្យ និងមើលថែទាំពួកវាយ៉ាងយកចិត្តទុកដាក់ ។ តាមរយៈការអង្កេតជាបឋម ពួកវាមានសុខភាពល្អ ហើយយើងអាចនឹងលែងពួកវាទៅក្នុងព្រៃវិញក្នុងរយៈពេល២ទៅ៣សប្តាហ៍ខាងមុខ ប្រសិនបើយើងពិនិត្យឃើញថាវាជាសះស្បើយទាំងស្រុង និងអាចរស់នៅក្នុងធម្មជាតិដោយខ្លួនឯងបាន »៕
ចែករំលែកព័តមាននេះ