ខេត្តព្រះសីហនុ ៖ ភ្លុកដំរី២៧៩ដុំ ដែលបង្កប់ក្នុងឈើដឹកតាមកុងតឺន័រ ដោយនាវាសមុទ្រត្រូវបានរកឃើញដោយមន្ត្រីគយនិងរដ្ឋាករកំពង់ផែអន្តរជាតិ ក្រុងព្រះសីហនុ កាលពីថ្ងៃទី៤ ធ្នូកន្លងមកនេះ ។ តាមមន្ត្រីគយនិងរដ្ឋាករបានឱ្យដឹងថា ទូកុងតឺន័រចំនួន៣ ដែលទូនីមួយៗមានទំហំ២០ហ្វីត ជារបស់ក្រុមហ៊ុន Cam Transit Import Co., Ltd នាំមកពីប្រទេសម៉ូហ្សំប៊ិក កាលពីថ្ងៃទី១៦ ធ្នូ ឆ្នាំ២០១៦កន្លងមក ដែលមានឯកសារបញ្ជាក់មុខទំនិញថា ជាឈើចំនួន 29pkgs ទម្ងន់ស្មើនឹង 55.213kgs ។
តាមរយៈលទ្ធផលរូបភាពត្រួតពិនិត្យផ្ដល់ដោយម៉ាស៊ីនស្គែន សមត្ថកិច្ចជំនាញមានការសង្ស័យ ចំពោះទូកុងតឺន័រដែលផ្ទុកទំនិញខាង លើ ។ មន្ត្រីគយនិយាយថា ដោយអនុលោមទៅតាមនីតិវិធីច្បាប់ស្ដីពីគយ បន្ទាប់ពីម្ចាស់ទុកចោលទំនិញជិត១ឆ្នាំទៅហើយនោះ ទើបនៅវេលាម៉ោង៩និង៣០នាទីព្រឹកថ្ងៃទី៤ ធ្នូ សមត្ថកិច្ចចម្រុះរួមមាន អាជ្ញាធរកំពង់ផែអន្តរជាតិខេត្តព្រះសីហនុ មន្ត្រីប៉ូលិសកាំកុងត្រូល ភ្នាក់ងារស៊ើបអង្កេតរបស់ស្ថានទូតអាមេរិក មន្ត្រីគយនិងរដ្ឋាករនៃសាខាគយនិងរដ្ឋាករកំពង់ផែអន្ដរជាតិក្រុងព្រះសីហនុដែលសម្របសម្រួលផ្លូវច្បាប់ដោយលោក លឹម ប៊ុនហេង ព្រះរាជអាជ្ញារងអមសាលាដំបូងខេត្ត បានសហការគ្នាកាត់សៀលកុងតឺន័រខាងលើដើម្បីត្រួតពិនិត្យ ។
ឆ្លងតាមការត្រួតពិនិត្យ បានរកឃើញថា ទូកុងតឺន័រទី១ គឺបានរកឃើញភ្លុកដំរី ដែលបង្កប់ជាមួយឈើចំនួន១៣២ដុំស្មើនឹង ៤៥៤,៥១គីឡូក្រាម ។ទូកុងតឺន័រទី២ មិនមានបង្កប់ភ្លុកដំរីទេ មានតែដុំឈើចំនួន៦០៥ដើម សរុប១៩ម៉ែត្រគូប ។
ដោយឡែកទូកុងតឺន័រទី៣ ក៏បានរកឃើញបង្កប់ភ្លុកដំរីចំនួន១៤៧ដុំ ស្មើនឹង៤៨៦,៩០គីឡូក្រាមផងដែរ ។
សរុបភ្លុកដំរីដែលបានរកឃើញបង្កប់ក្នុងទូកុងតឺន័រ២មានចំនួន ២៧៩ដុំ ស្មើនឹង ៩៤១,៤១គីឡូក្រាម ។ បន្ទាប់ពីធ្វើការត្រួតពិនិត្យរួច សមត្ថកិច្ចជំនាញខាងលើបានវេចខ្ចប់ភ្លុកដំរីដែលជាវត្ថុតាងដាក់ក្នុងទូកុងតឺន័រ រួចយកទៅដាក់នៅទីសុវត្ថិភាព ដើម្បីកសាងសំណុំរឿងបន្ដទៅតាមនីតិវិធី ។
គួររំលឹកឡើងវិញដែរថា ករណីចាប់ភ្លុកដំរីដែលឈ្មួញទុច្ចរិតដាក់បង្កប់ក្នុងមុខទំនិញផ្សេងៗ តាមទូកុងតឺន័រ ឆ្លងកាត់កំពង់ផែសមុទ្រអន្តរជាតិខេត្តព្រះសីហនុ ត្រូវបានមន្ត្រីសមត្ថកិច្ចប្រាប់ឱ្យដឹងថា ដើម្បីនាំឆ្លងកាត់ទៅប្រទេសទីបី ដែលមានចំនួនបីលើកមកហើយ ។ ទោះជាយ៉ាងនេះក្តីសមត្ថកិច្ចជំនាញនៅតែមិនអាចស្វែងរកម្ចាស់ទំនិញដើម្បីឈានទៅឃាត់ខ្លួនកសាងសំណុំរឿង ដើម្បីធ្វើការផ្តន្ទាទោសបាននៅឡើយទេ រហូតមកដល់ពេលនេះ ដែលគេនិយាយថាជាទំនិញលាក់មុខ ៕
ចែករំលែកព័តមាននេះ