រាជធានីភ្នំពេញ ៖ ជនជាតិចិនតៃវ៉ាន់ និងម៉ាឡេស៊ីចំនួន៣នាក់ ត្រូវបានកម្លាំងនគរបាលនាយកដ្ឋានព្រហ្មទណ្ឌក្រសូងមហាផ្ទៃ ឃាត់ខ្លួនបន្ទាប់ពីនាំជនជាតិថៃមកបង្ខាំងទុកនៅក្នុងភូមិគ្រឹះមួយកន្លែង នៅសង្កាត់បឹងកក់ទី២ ។ ប្រតិបត្តិការឆែកឆេរបង្ក្រាបជនសង្ស័យបង្ខាំងមនុស្សឆ្លងដែននេះ ធ្វើឡើងកាលពីវេលាម៉ោង០៣និង៣០នាទីរសៀល…
រាជធានីភ្នំពេញ ៖ ជនជាតិចិនតៃវ៉ាន់ និងម៉ាឡេស៊ីចំនួន៣នាក់ ត្រូវបានកម្លាំងនគរបាលនាយកដ្ឋានព្រហ្មទណ្ឌក្រសូងមហាផ្ទៃ ឃាត់ខ្លួនបន្ទាប់ពីនាំជនជាតិថៃមកបង្ខាំងទុកនៅក្នុងភូមិគ្រឹះមួយកន្លែង នៅសង្កាត់បឹងកក់ទី២ ។
ប្រតិបត្តិការឆែកឆេរបង្ក្រាបជនសង្ស័យបង្ខាំងមនុស្សឆ្លងដែននេះ ធ្វើឡើងកាលពីវេលាម៉ោង០៣និង៣០នាទីរសៀល ថ្ងៃទី០៥ ខែធ្នូ ឆ្នាំ២០១៧ ក្នុងភូមិគ្រឹះលេខ៣៩ ផ្លូវលេខ៥៩៤ សង្កាត់បឹងកក់ទី២ ខណ្ឌទួលគោក ដោយមានការដឹកនាំដោយ លោកឧត្តមសេនីយ៍ទោ ង៉េង ជូ អនុប្រធាននាយដ្ឋាននគរបាលព្រហ្មទណ្ឌក្រសួងមហាផ្ទៃ និងមានការសម្របសម្រួលពីលោក ហ៊ឹង ប៊ុនថន ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានការចូលពីអាជ្ញាធរ និងនគរបាលខណ្ឌទួលគោកផងដែរ ។
តាមនគរបាលបានឲ្យដឹងថា ការឈានទៅចុះបង្ក្រាបជនជាតិតៃវ៉ាន់ និងម៉ាឡេស៊ីបង្ខាំងជនជាតិថៃ បន្ទាប់ពីមានពាក្យបណ្តឹងពីក្រុមគ្រួសារតាមរយៈស្ថានទូតថៃប្រចាំនៅព្រះរាជាណាចក្រកម្ពុជា ព្រមទាំងមានការស្រាវជ្រាវពីនគរបាលព្រហ្មទណ្ឌក្រសួងមហាផ្ទៃ ។
តាមនគរបាលបានឲ្យដឹងទៀតថា ជនសង្ស័យចំនួន៣នាក់ ក្នុងនោះជនជាតិតៃវ៉ាន់ចំនួន២នាក់ និងជនជាតិម៉ាឡេស៊ីម្នាក់ ត្រូវបានឃាត់ខ្លួន ព្រមទាំងរំដោះជនជាតិថៃដែលជាជនរងគ្រោះចំនួន៩នាក់ ក្នុងនោះស្ត្រី២នាក់ ។ ដោយឡែកជននជាតិខ្មែរចំនួន២នាក់ជាស្ត្រីអ្នកបម្រើត្រូវបានសមត្ថកិច្ចនាំខ្លួនទៅសាកសួរផងដែរ ។ សរុបទាំងអស់ចំនួន១៤នាក់ ត្រូវបានសមត្ថកិច្ចឃាត់ខ្លួន និងនាំខ្លួនទៅសាកសួរ ។ ក្រៅពីនោះ សមត្ថកិច្ចដកហូតបានសម្ភារមួយចំនួនទៀត ។
ទោះបីជាយ៉ាងណា នគរបាលពុំបានផ្តល់ព័ត៌មានលម្អិតពាក់ព័ន្ធនឹងការបង្ក្រាបឃាត់ខ្លួនជនសង្ស័យបង្ខាំងមនុស្សខុសច្បាប់នោះឡើយ ។ ជនសង្ស័យ និងជនរងគ្រោះដែលសមត្ថកិចិ្ចរំដោះ រួមទាំងវត្ថុតាងដកហូត ត្រូវបាននគរបាលបញ្ជូនទៅកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ដើម្បីសាកសួរ និងចាត់ការតាមច្បាប់ ៕
ចែករំលែកព័តមាននេះ