ខេត្តកំពត ៖ ប្រជាពលរដ្ឋជាច្រើននាក់រាប់ទាំងមន្ត្រីរាជការមកពីគ្រប់ទិសទីដែលមានជំនឿទៅលើបារមីវត្តភ្នំកំចាយមា ឆ្លងជ្រោះកាត់ភ្នំ៨ជាន់ទើបដល់វត្ត។ វត្តភ្នំកំចាយមា៨ជាន់ ដែលអ្នកផងតែងតែមានជំនឿមុតមាំខាងបារមីពូកែ ម្នាក់ៗបានទៅបំបួសលាបំណន់នោះ ស្ថិតនៅជិតរមណីយដ្ឋានទឹកឈូ ឆ្ពោះទៅកាន់វត្តចម្ងាយជាង៤គីឡូម៉ែត្រ ក្នុងឃុំម៉ាក់ប្រាង្គ ស្រុកទឹកឈូ ខេត្តកំពត។
ទោះបីមានផ្លូវលំបាកយ៉ាងណាអ្នកដែលមានបំណងប្រាថ្នាចង់ទៅបួសរយៈពេលខ្លីនៅតែតស៊ូឥតងាករេ ខ្លះធ្វើដំណើរដោយថ្មើជើង ព្រោះផ្លូវចោទខ្ពស់ ឬក៏ជួលម៉ូតូគេជិះដើម្បីចង់ឃើញព្រះបរិមា៥០០អង្គ និងគងដ៏ធំធ្វើអំពីលោហៈធាតុមានតម្លៃ។ បងប្រុស ឆារ៉ាត ឧត្តម អាយុ៣៨ឆ្នាំ នៅភូមិត្រពាំងល្បើក ឃុំត្រពាំងបី ស្រុកឈូក ខេត្តកំពត បានប្រាប់ថា នេះជាលើកទីមួយហើយដែលគាត់បានមកដល់លើកំពូលភ្នំវត្តកំចាយមាដើម្បីបែបន់សុំសេចក្ដីសុខ និងបួសលាបំណន់រយៈពេលខ្លី។
បងប្រុស ឆារ៉ាត់ ឧត្តមនិយាយថា ការធ្វើដំណើរពិបាកខ្លាំងតែនៅតែចង់មក។ អ៊ុំប្រុស ម៉ម ប៊ុនថាន់ អាយុ៦២ឆ្នាំ នៅភូមិអូរមាស ឃុំត្រពាំងរាំង ស្រុកជុំគីរី ខេត្តកំពត បានប្រាប់ឲ្យដឹងដែរថា អ្នកមកដល់វត្តភ្នំកំចាយនេះ សុទ្ធតែអ្នកមកបន់ស្រន់ឬមកលាបំណន់ ឬមកបួសមិនយូប៉ុន្មានទេគេនឹងសិកវិញ ទោះជាមានពិបាកការផ្លូវបត់បែនយ៉ាងណាក៏គាត់ប្រឹងប្រែងមកឲ្យស្គាល់។ គេបានដឹងថាវត្តភ្នំកំចាយមា៨ជាន់នេះ រយៈពេលជិត៣០ឆ្នាំហើយ មានព្រះសង្ឃមិនច្រើនទេព្រោះអ្នកបួសហើយមិនគង់នៅលើភ្នំនោះទេ ប៉ុន្តែអ្នកមានបំណងនៅតែនាំគ្នាឡើងទៅកាន់វត្តស្ងប់ស្ងាត់មួយនេះ៕
ចែករំលែកព័តមាននេះ