រាជធានីភ្នំពេញ ៖ ប្រធានសិទ្ធិមនុស្សបារាំង មកពីក្រសួងការបរទេសបារាំង និងអមដំណើរដោយលោកស្រី ឯកអគ្គរដ្ឋទូតបារាំងប្រចាំនៅកម្ពុជា បានជម្រុញដល់ថ្នាក់ដឹកនាំកម្ពុជា ឱ្យចាប់ផ្តើមការសន្ទនាជាមួយគណបក្សប្រឆាំងឡើងវិញ ដោយសារតែបារាំងមិនគាំទ្រដល់ការរំលាយគណបក្សសង្គ្រោះជាតិកន្លងមកនោះទេ។
ការថ្លែងបែបនេះ បានលើកឡើងនៅក្នុងជំនួបមួយជាមួយលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា នៅទីស្តីការគណៈកម្មាធិការសិទ្ធិមនុស្សកម្ពុជានៅថ្ងៃទី ៦ ធ្នូ ឆ្នាំ២០១៧។ នេះបើតាមលោក កែវ រ៉េមី ដែលបានជួបជាមួយលោក ហ្វ្រង់ស្វ័រ ក្រូកែត ប្រធានសិទ្ធិមនុស្សបារាំង មកពីក្រសួងការបរទេសបារាំង។
ក្រោយជំនួបតឹងសរសៃ.កដាក់គ្នានោះ លោក កែវ រ៉េមី បានថ្លែងប្រាប់អ្នកសារព័ត៌មានក្រោយពីជំនួបថា ក្នុងជំនួបនេះ ភាគីបារាំង ទី១-ចង់ដឹងពីស្ថានភាពនយោបាយនៅកម្ពុជា និងទី២-ការរំលាយគណបក្សសង្គ្រោះជាតិ ។ លោកបានបញ្ជាក់ជូនភាគីបារាំងថា «ដំណើរការលទ្ធិប្រជាធិបតេយ្យរបស់កម្ពុជា គឺសិទ្ធិក្នុងការសំដែងមតិដូចជា ប្រើប្រាស់បណ្តាញសង្គមហ្វេសប៊ុក និយាយខ្លីដោយមិនបាននិយាយពីប្រព័ន្ធផ្សព្វផ្សាយផ្សេងនោះទេ »។
លោក កែវ រ៉េមី បានអះអាងទៀតថា គ្រាន់តែលើកពីការប្រើប្រាស់បណ្តាញសង្គមហ្វេសប៊ុកមួយបញ្ជាក់ពីសិទ្ធិសេរីភាពប្រជាពលរដ្ឋក្នុងការបញ្ចេញមតិ ពីការយោគយល់របស់រដ្ឋាភិបាល មន្ត្រីអាជ្ញាធរ ទាក់ទងទៅនឹងការអនុវត្តច្បាប់នៅមានការយោគយល់ច្រើន ព្រោះមានករណីខ្លះនៅកម្ពុជាមិនដូចប្រទេសដទៃទេ កាលណាខុសច្បាប់ត្រូវចាប់ដាក់ខ្នោះ ឬការធ្វើដំណើរបញ្ច្រាស់ទិសចរាចរណ៍ខ្លះ មានការអនុគ្រោះច្រើនមិនផាកពិន័យដូចប្រទេសមួយចំនួនទេ។
លោក ហ្វ្រង់ស្វ័រ ក្រូកែត បានសួរទៅគណៈកម្មាធិការសិទ្ធិមនុស្សកម្ពុជាពីដំណើរការរំលាយគណបក្សសង្គ្រោះជាតិដែលជាគណបក្សប្រឆាំងនៅកម្ពុជា «និងចង់ឲ្យមានកិច្ចសន្ទនារវាងគណបក្សកាន់អំណាច និងបក្សប្រឆាំង?»។ តែលោក កែវ រ៉េមី បានពន្យល់ថា ភាគីបារាំងចង់ឲ្យមានកិច្ចសន្ទនាឡើងវិញរវាងគណបក្សកាន់អំណាច និងគណបក្សប្រឆាំងឡើងវិញនោះគឺសម្តេចតេជោ ហ៊ុន សែន បានលើកស្ទួយការសន្ទនាជានិច្ចជាកាល អញ្ចឹងសូមឲ្យភាគីបារាំងស្រាវជ្រាវឡើងវិញ។
លោក កែវ រ៉េមី បានបញ្ជាក់ប្រាប់ទៀតថា ពេលនោះមានការកាន់ដៃគ្នារវាងសម្តេចតេជោ ហ៊ុន សែន និងលោក សម រង្ស៊ី ទៅកាន់ខេត្តសៀមរាប ក្នុងពិធីអង្គរសង្ក្រាន្ត និងមានការបរិភោគអាហារជុំគ្នានៃគ្រួសារនាយករដ្ឋមន្ត្រី និងគ្រួសារលោក សម រង្ស៊ី ទៀតផង។ ក្នុងនោះក៏មានយន្តការជួបគ្នាប្រធានការងារដឹកនាំដោយសម្តេច ស ខេង និងលោក សម រង្ស៊ី នៅក្នុងសភា។
លោកបន្តថា៖ «កិច្ចសន្ទនាត្រូវបានបំផ្លាញដោយគណបក្សប្រឆាំងខ្លួនឯង»។
ចែករំលែកព័តមាននេះ