អង់គ្លេស ៖ តាមប្រភពព័តមាន Oddity Central បានឲ្យដឹងថា ក្រុមហ៊ុនផលិតម៉ូដខោអាវប្រណីតៗក្នុងតម្លៃកប់ពពកយីហោ Balenciaga បានច្នៃម៉ូដសំពត់មួយ ដែលមានរូបរាងស្រដៀងទៅនឹងទ្រនាប់ជើងក្នុងរថយន្ត។ តម្លៃរបស់វា គឺថ្លៃរហូតដល់ ២.៣០០ដុល្លារ។
ទោះបីជារូបរាងរបស់វាពិតជាដូចទៅនឹងទ្រនាប់ជើងថោកៗក្នុងរថយន្តក៏ដោយ តែវាធ្វើឡើងពីស្បែកចៀម៥០% ដែលមានតម្លៃថ្លៃខុសពីកៅស៊ូធម្មតារបស់ទ្រនាប់ជើងមែនទែន។ មូលហេតុដែលគេច្នៃម៉ូដចេញបែបនេះ គឺដោយសារតែគេចង់យកតម្រាប់តាមទ្រនាប់ជើងរថយន្ត។
គ្រាន់តែឃើញតម្លៃ និងរូបរាងរបស់សំពត់នេះភ្លាម មហាជនលើបណ្តាញសង្គមបានប្រៀបធៀបថា លុយត្រឹមតែ២០ដុល្លារអាចទិញបានទ្រនាប់ជើងក្នុងរថយន្ត៤ ខណៈពេលដែលត្រូវចំណាយ២.៣០០ដុល្លារទម្រាំបានវត្ថុស្រដៀង។
គួរបញ្ជាក់ផងដែរថា នេះមិនមែនជាលើកទីមួយទេ ដែលក្រុមហ៊ុននេះចេញម៉ូដប្លែកៗអីចឹង។ កាលពីប៉ុន្មានខែមុន ក្រុមហ៊ុននេះបានចេញលក់កាបូបតម្លៃ២.១៤៥ដុល្លារ ដែលមានរូបរាងដូចទៅនឹងកាបូបដែលអាចទិញក្នុងតម្លៃ៩៩សេន៕
ចែករំលែកព័តមាននេះ