រាជធានីភ្នំពេញ ៖ អគ្គមេបញ្ជាការកងយោធពលខេមរភូមិន្ទ នាយឧត្តមសេនីយ៍ ប៉ុល សារឿននៅរសៀលថ្ងៃទី០៦ ធ្នូ ឆ្នាំ២០១៧នេះ បានធ្វើសន្និសីទកាសែតប្រតិកម្មចំពោះលោក សម រង្ស៉ី អតីតប្រធានគណបក្សសង្គ្រោះជាតិ ដែលបានញុះញង់ឲ្យកងទ័ពក្រោកឈរប្រឆាំងប្រមុខរាជរដ្ឋាភិបាលដឹកនាំដោយសម្តេចតេជោ ហ៊ុន សែន។
នាយឧត្តមសេនីយ៍ ប៉ុល សារឿន បានថ្លែងថា អគ្គមេបញ្ជាការកងយោធពលខេមរភូមិន្ទបានបញ្ជូនករណីនេះ ទៅមេធាវីរបស់ខ្លួន ហើយមេធាវីបានធ្វើការងារនេះរួចហើយ ដើម្បីរៀបចំប្តឹងលោក សម រង្ស៊ី។
លោក ប៉ុល សារឿន បន្តថា ការដែលអគ្គមេបញ្ជាការកងយោធពលខេមរភូមិន្ទ «ប្រកាន់ជំហរដាច់អហ័ង្កការប្តឹងលោក សម រង្ស៊ី ដោយសារតែកងទ័ពកើតទុក្ខមិនសុខចិត្ត ព្រោះតែការប្រកាសរបស់លោក សម រង្ស៊ី ធ្វើឱ្យប៉ះពាល់វិន័យកងទ័ព បទបញ្ជាកងទ័ព រដ្ឋធម្មនុញ្ញ និងព្រះមហាក្សត្រ»។ លោកបញ្ជាក់ថា រហូតមកដល់ពេលនេះ កងទ័ពនៅរក្សាស្ញៀមស្ងាត់ និងមិនបានធ្វើសកម្មភាពណាមួយក្រោយការប្រកាសរបស់លោក សម រង្ស៊ី ឡើយ។
ជម្រាបថា កាលពីថ្ងៃទី៥ ធ្នូ លោក សម រង្ស៊ី បានសរសេរលើទំព័រហ្វេសប៊ុកដូច្នេះថា «សូមកងកម្លាំងប្រដាប់អាវុធ ពលទាហាន និងនគរបាល កុំធ្វើតាមបញ្ជាពីមេដឹកនាំផ្តាច់ការ បើគេបញ្ជាឲ្យបាញ់ប្រហារ និងសម្លាប់ប្រជាពលរដ្ឋស្លូតត្រង់»៕
ចែករំលែកព័តមាននេះ