រាជធានីភ្នំពេញ ៖ នារីសម្រស់ឆើតឆាយនិយមតែងកាយបញ្ចេញគល់ទ្រូង កញ្ញា វិរីយ៉ា ហៅយ៉ាយ៉ាឃ្វីន បានឡើងយន្តហោះទៅប្រទេសអូស្ត្រាលីកាលពីពេល ថ្មីៗកន្លងមក ។ វាជាលើកទី១ដែលស្រីស្អាតរីយ៉ា បានចេញទៅក្រៅប្រទេស ហើយឆ្លៀតយកហូលផាមួងខ្មែរទៅលក់នៅទីនោះ ។
ខុសពីតារាមួយចំនួនរមែងរំលេចក្តីសប្បាយរីករាយ ដោយមានការជូនដំណើរពីញាតិមិត្ត តែតារាសម្តែងពៅ វិរិយ៉ា ហៅយ៉ាយ៉ាឃ្វីន បានឱកាសឡើងយន្តហោះទៅដែនកោះអូស្ត្រាលី បែរជាអវត្តមានបងប្អូន មិត្តភក្តិរបស់ខ្លួនទៅវិញ ។ កញ្ញាសិចស៊ីពៅ វិរីយ៉ា បានចាកចេញទៅច្រៀងនៅប្រទេសអូស្ត្រាលីរយៈពេល២ខែជាមួយក្តីសង្ឃឹមនឹងទទួលបានការគាំទ្រ ព្រោះរដូវកាលចុងឆ្នាំមានពិធីបុណ្យច្រើនសម្រាប់អ្នកនៅអឺរ៉ុប ។
កញ្ញាពៅ វិរីយ៉ា បានស្រាយចម្ងល់ពីរឿងមិនមានញាតិ មិត្តទៅអបអរសាទរ និងជូនដំណើរពេលឡើងយន្តហោះទៅសម្តែងនៅបរទេសថា«នាងខ្ញុំជាមនុស្សចូលចិត្តធ្វើអ្វីតែឯង មិនចូលចិត្តទៅរំខានគេ ខ្លាចចិត្តគេ ។ ម្ល៉ោះហើយពេលឡើងយន្តហោះនាងខ្ញុំមិនបានហៅអ្នកណាមកទេដោយសារផ្លូវក៏ស្ទះ បងប្អូនក៏នៅឆ្ងាយ រវល់រកស៊ី ខ្លាចគេមិនសប្បាយចិត្តទើបខ្ជិលតែម្តង ។ បើនាងខ្ញុំប្រាប់វិញគឺមានអ្នកមកច្រើន តែមិនចង់ទើប ធម្មតាៗ ។
ការចេញទៅសម្តែងលើកទី១នៅបរទេសនេះខ្ញុំគ្រាន់តែហាត់បទចម្រៀងជាង២ខែ ចេះចាំច្រើនបទ ដើម្បីបំពេញតាមសំណូមពរបងប្អូនខ្មែរយើងនៅឯនាយសមុទ្រ ។ ខ្ញុំខំរៀនច្រៀងឡើងស្រកគីឡូ ។
ប្រសិនបើទៅដល់អូស្ត្រាលី មានគេស្រឡាញ់ចង់បាន មានតែគិតសិន ព្រោះមនុស្សទុកចិត្តមិនបានទេ ហើយចិត្តនាងខ្ញុំក៏ចង់រស់នៅស្រុកគេដែរ ប៉ុន្តែទាល់តែនោះជារូបភាពល្អ» ។
ដំណើរចេញទៅក្រៅប្រទេសនេះ ក្រៅពីសម្តែង កញ្ញាពៅ រីយ៉ា ចង់រកទីផ្សារលក់ហូលផាមួងខ្មែរផងដែរ ។ ពេលស្ទាបស្ទង់ និងរកទីផ្សារបានហើយ លើកក្រោយនាងទៅអូស្ត្រាលីលក្ខណៈឯកជនវិញ ៕
ចែករំលែកព័តមាននេះ