នាងជេន្នី ឡូរ៉ែន ជាតារាសម្តែងដែលមានការងារច្រើនលើសលប់តាំងពីឆ្នាំ២០១៤មក ធ្លាប់សម្តែងក្នុងរឿង «Silver Linings Playbook» ធ្វើឱ្យនាងទទួលពានរង្វាន់អូស្ការ និងត្រូវថតភាពយន្តវគ្គបន្តគឺរឿង «The Hunger Games» ។
ក្នុងអំឡុងពេល៧ឆ្នាំកន្លងមក តារាសម្តែងអាយុ២៧ឆ្នាំ ជេន្នី ឡូរ៉ែន បានថតភាពយន្តជាមធ្យមក្នុងមួយឆ្នាំ៣រឿង គឺជាការងារដ៏សន្ធឹកសន្ធាប់ ។
ក្នុងអំឡុងពេលចុងក្រោយនេះ នាងជេន្នី ឡូរ៉ែន បានបញ្ជាក់ប្រាប់ទស្សនាវដ្តី «Elle» ដែលចេញលក់កាលពីចុងខែវិច្ឆិកា ២០១៧ថា នាងនឹងឈប់ទទួលការសម្តែងនៅហូលីវូដ ដើម្បីបានសម្រាកលំហែកាយ និងអង្គុយច្របាច់ដោះពពែនៅក្នុងកសិដ្ឋានវិញ ។
នាងជេន្នី ឡូរ៉ែន បញ្ជាក់យ៉ាងខ្លីធ្វើឱ្យអ្នកគាំទ្រស្រងាកចិត្តនៅក្នុងចិត្តថា «ខ្ញុំចង់មានកសិដ្ឋានមួយ ចង់ធ្វើការងារឱ្យមានភាពសប្បាយរីករាយ ដូចជាការអង្គុយច្របាច់ដោះពពែយកទឹកដោះ គឺជាការងារមានសិទ្ធិសេរីភាពនិងរស់នៅក្នុងលក្ខណៈជាមនុស្សសាមញ្ញ » ។
ប្រព័ន្ធផ្សព្វផ្សាយបានចុះផ្សាយក្នុងន័យបញ្ឆិតបញ្ឆៀងថា ទម្រាំតែតារាហូលីវូដអាចផ្សាំជីវិតរស់នៅដូចអ្នកស្រែចម្ការនោះ មិនមែនជារឿងងាយស្រួលឡើយ ព្រោះនៅមានភាពយន្តជាច្រើនរឿងទៀតត្រូវប្រតិបត្តិបន្តឱ្យរួចរាល់ ។ បច្ចុប្បន្ននាងនៅមានខ្សែភាពយន្តរឿង «Bad Blood » និង «Red Sparrow» ត្រូវចូលរួមសម្តែង ។ ចំពោះអ្វីដែលជេន្នី ឡូរ៉ែន និយាយនោះអាចជាការនិយាយលេងប៉ុណ្ណោះ ៕
ចែករំលែកព័តមាននេះ