រាជធានីភ្នំពេញ ៖ កញ្ញានី មុន្នីនាថ នឹងបង្ហាញភាពស្អាតស្អំរបស់ខ្លួនប្រាប់មហាជនជុំវិញពាក្យបណ្តឹងពីបទបោកប្រាស់យកប្រាក់របស់អតីតគូដណ្តឹង ខណៈពេលដែលចំណាត់ការកំពុងស្ថិតក្នុងដៃតុលាការ ។ តារាសម្តែងនី មុន្នីនាថ បានបដិសេធ…
រាជធានីភ្នំពេញ ៖ កញ្ញានី មុន្នីនាថ នឹងបង្ហាញភាពស្អាតស្អំរបស់ខ្លួនប្រាប់មហាជនជុំវិញពាក្យបណ្តឹងពីបទបោកប្រាស់យកប្រាក់របស់អតីតគូដណ្តឹង ខណៈពេលដែលចំណាត់ការកំពុងស្ថិតក្នុងដៃតុលាការ ។
តារាសម្តែងនី មុន្នីនាថ បានបដិសេធ ភ្លាមៗជុំវិញការចុះផ្សាយនាពេលថ្មីៗកន្លងមករបស់សារព័ត៌មាននៅក្នុងស្រុកមួយចំនួនថា នាងបានគេចខ្លួនព្រោះភ័យខ្លាចចំពោះពាក្យបណ្តឹងពីអតីតគូដណ្តឹងរបស់នាងដែលបានប្តឹងទាមទារឲ្យនាងសងទឹកប្រាក់រាប់ម៉ឺនដុល្លារ ។ ផ្ទុយពីការចុះផ្សាយ តារាសម្តែងពូកែបង្ហូរទឹកភ្នែកនាងនី មុន្នីនាថ អះអាងថា នាងមិនបានរត់គេចខ្លួនទៅណាដូចព័ត៌មានចុះផ្សាយទេ ប៉ុន្តែនាងបានត្រៀមខ្លួនរួចរាល់សម្រាប់តទល់នូវពាក្យបណ្តឹងពីអតីតគូស្នេហ៍ ។ នាងក៏បានត្រៀមខ្លួនរួចជាស្រេចផងដែរក្នុងការប្រឹងប្រែងជម្នះរាល់បញ្ហាទាំងអស់នេះ ដើម្បីបង្ហាញនូវភាពស្អាតស្អំរបស់ខ្លួនឡើងវិញ ក្នុងពេលដែលមេធាវីរបស់នាងកំពុងតែខ្នះខ្នែងជួយនាងក្នុងរឿងក្តីមួយនេះ ។
នី មុន្នីនាថ អះអាងថា នាងពុំបានរត់គេចខ្លួនទៅណាទេ គឺនាងនៅក្នុងប្រទេសកម្ពុជាដដែល តែមានតែអតីតគូដណ្ដឹងរបស់នាងទេដែរគាត់មិននៅក្នុងប្រទេសកម្ពុជា ។
ពាក្យបែបបញ្ចើចបញ្ចើរត្រូវនី មុន្នីនាថ ប្រើទៅកាន់អតីតគូដណ្តឹងរបស់នាងថា «សូមមេត្តាពិចារណាផង បើបងពិតជាស្មោះត្រង់ បងមកកម្ពុជាមកណ៎ា អូនចាំបង » ។
អតីតគូដណ្តឹងដែលជាអាណិកជនខ្មែររស់នៅអាមេរិកលោកអ៊ុង សូឡាង សរសេរឌឺដងត្រឡប់វិញថា «បងនឹងទៅកុំភ័យអូន ត្រៀមតែលុយដែលអូនបោកបងទៅនោះឲ្យគ្រប់ចំនួន រួមទាំងលុយសងជំងឺចិត្ត ដែលពៅមាស«ផ្កាមាស»ត្រូវបង់ឲ្យបងបន្ទាប់ពីចេញសាលដីកា ពីតុលាការ បញ្ជាក់ថាអូនពិតជាបោក និងបំពានលើសេចក្ដីទុកចិត្ត ។ ពេលនោះហើយបងនឹងចុះទៅស្រុកខ្មែរ ដើម្បីប្រមូលលុយនោះយកទៅធ្វើបុណ្យខ្លះ ។ ច្រូចទឹកឲ្យអូន កុំឲ្យអូនអត់ឃ្លាន មិនរើសមុខតទៅទៀត» ។
សាលាដំបូងរាជធានីភ្នំពេញ បានផ្តើមនីតិវិធីរបស់ខ្លួនលើកដំបូងលើបណ្ដឹងលោកអ៊ុង សូឡាង ប្ដឹងអតីតគូដណ្ដឹងរបស់ខ្លួន គឺកញ្ញានី មុន្នីនាថ ទាមទារសំណងចំនួន១២ម៉ឺនដុល្លារ កាលពថ្ងៃទី២៩ វិច្ឆិកា ២០១៧ ។ នីតិវិធីលើកដំបូងនេះពុំមានវត្តមានតារាសម្ដែងនី មុន្នីនាថ ចូលរួមទេ គឺមានតែមេធាវីរបស់នាងប៉ុណ្ណោះ ។
មេធាវីរបស់នី មុន្នីនាថ លោករ៉ូ ប៊ីនណៃ និយាយថា ករណីនេះតុលាការកំពុងចាត់ការតាមនីតិវិធី ពុំទាន់មានលទ្ធផលយ៉ាងណានោះទេ តែលោកបញ្ជាក់ថា ពុំមានករណីឆបោក ឬបណ្តឹងឆបោកប្រឆាំងកូនក្តីរបស់លោកដូចសារព័ត៌មានមួយចំនួនបានចុះផ្សាយទេ ។ យោងតាមនីតិវិធីក្រមរដ្ឋប្បវេណីនៃព្រះរាជាណាចក្រកម្ពុជា មេធាវីតំណាងដោយអាណត្តិអាចឆ្លើយជំនួសកូនក្តីបាន ដោយពុំចាំបាច់មានវត្តមានរបស់គូភាគីទេ ដូច្នេះមេធាវីអាចចូលជំនួសកញ្ញានី មុន្នីនាថ គ្រប់នីតិវិធីរបស់តុលាការបាន មិនខុសច្បាប់ទេ ។
យោងតាមពាក្យបណ្ដឹង គឺលោកអ៊ឹង សូឡាង ទាមទារសំណងសរុបចំនួន១២ម៉ឺនដុល្លារ ពីកញ្ញានី មុន្នីនាថ ដោយក្នុងនោះលោកបានទាមទារឲ្យនី មុន្នីនាថ សងប្រាក់ចំនួន៧ម៉ឺនដុល្លារ និងសំណងជំងឺចិត្តចំនួន៥ម៉ឺនដុល្លារ ៕
ចែករំលែកព័តមាននេះ