ដេញឈប់ឱ្យចញ្ចឹមទាតាមឆ្នេរសមុទ្រ
- ព្រះសីហនុ
ខេត្តព្រះសីហនុ ៖ គណៈបញ្ជាការឯកភាពស្រុកស្ទឹងហាវដឹកនាំដោយលោក ស៊ុន ពិសី អភិបាលរងស្រុកស្ទឹងហាវ ខេត្តព្រះសីហនុ សហការណ៍ជាមួយមន្ទីរបរិស្ថានខេត្តព្រឹកថ្ងៃទី០៦ ខែធ្នូ ឆ្នាំ២០១៧…
ខេត្តព្រះសីហនុ ៖ គណៈបញ្ជាការឯកភាពស្រុកស្ទឹងហាវដឹកនាំដោយលោក ស៊ុន ពិសី អភិបាលរងស្រុកស្ទឹងហាវ ខេត្តព្រះសីហនុ សហការណ៍ជាមួយមន្ទីរបរិស្ថានខេត្តព្រឹកថ្ងៃទី០៦ ខែធ្នូ ឆ្នាំ២០១៧ បានដឹកនាំកម្លាំងចម្រុះចុះរុះរើសំណង់រោងចិញ្ចឹមសត្វទាចំនួន០៥កន្លែងស្ថិតនៅចំណុចខាងលើឆ្នេរ ព្រែកត្រែង ក្នុងភូមិ០៤ ឃុំអូរត្រេះស្រុកស្ទឹងហាវ ខេត្តព្រះសីហនុដែលកន្លងមកទីតាំងចិញ្ចឹមទាខាងលើមានការរិះគន់ពីសំណាក់ភ្ញៀវទេសចរណ៍ជាតិ អន្តរជាតិដែលធ្វើដំណើរទៅកំសាន្តនៅឆ្នេរសមុទ្រព្រែកត្រែងថា បានបង្ហូរទឹកកខ្វក់និងមានខ្លឹនស្អុយឆ្អេះពីកន្លែងចិញ្ចឹមទាតាមអូរទម្លាក់ចូលមកក្នុងសមុទ្រដែលភ្ញៀវទេសចរណ៍មកមុជទឹកលេងធ្វើឲ្យប៉ះពាល់ធ្ងន់ធ្ងរដល់សុខភាពរបស់ប្រជាពលរដ្ឋ និងបរិស្ថានជាតិ ។
តាមការឲ្យដឹងពីលោក ស៊ុន ពិសី អភិបាលរងស្រុកស្ទឹងហាវ និងលោក ទេព ស៊ីណូរ៉ា អនុប្រធានមន្ទីរបរិស្ថានខេត្តបានឲ្យដឹងថា រដ្ឋបាលស្រុកស្ទឹងហាវបានជូនដំណឹងជាច្រើនលើករួចមកហើយដល់ម្ចាស់ទីតាំងចិញ្ចឹមទាចំនួន០៥កន្លែងនៅចំណុចខាងលើឲ្យគាត់ធ្វើការរុះរើរកទីតាំងចិញ្ចឹមនៅកន្លែងផ្សេងវិញដោយហេតុថា ទីតាំងដែលពួកគាត់កំពុងចិញ្ចឹមនៅលើអូរដែលហូរធ្លាក់ទឹកកខ្វក់ចូលទៅក្នុងសមុទ្រ និងនៅជិតឆ្នេរដែលភ្ញៀវមកកំសាន្តធ្វើឲ្យមានក្លឹនប៉ះពាល់តំបន់កំសាន្ត ។
នៅក្នុងប្រតិបត្តិការខាងលើដោយមានការសំណូមពរពីម្ចាស់ចិញ្ចឹមទាខាងលើសុំទុកពេលឲ្យគាត់រុះរើដោយខ្លួនឯងដោយចាប់គឹតពីថ្ងៃផ្តិតមេដៃនៅក្នុងកំណត់ហេតុថ្ងៃទី០៦ ខែធ្នូ ឆ្នាំ២០១៧ ដល់ថ្ងៃទី៣០ ខែមិនា ឆ្នាំ២០១៨ ខាងមុខ ។ ក្នុងនោះលោក ទេព ស៊ីណូរ៉ា អនុប្រធានមន្ទីរបរិស្ថានខេត្តបានណែនាំដល់ម្ចាស់ចិញ្ចឹមទាខាងលើមិនឲ្យទិញសត្វទាមកដាក់បន្ថែមទៀតដែលធ្វើឲ្យមានការប៉ះពាល់ពេលវេលារុះរើដែលមាននៅក្នុងកំណត់ហេតុ ។
ម្យ៉ាងទៀតបើដល់ថ្ងៃកំណត់ឱសាន្តវាទខាងលើម្ចាស់កសិដ្ឋានចិញ្ចឹមទាមិនគោរពតាមកិច្ចសន្យានោះទេរដ្ឋបាលសាលាស្រុក និងអនុវត្តទៅតាមផ្លូវច្បាប់ ។ រាល់ការខូចខាតសម្ភារផ្សេងៗ គណៈបញ្ជាការឯកភាពស្រុកស្ទឹងហាវ និងមន្ទីរបរិស្ថានមិនទទួលខុសត្រូវឡើយ ៕
ចែករំលែកព័តមាននេះ