រាជធានីភ្នំពេញ ៖ បើទោះជាកីឡាករល្បីឈ្មោះ៤រូបបានសម្រេចចិត្តបោះបង់ការប្រដាល់ ដោយឈប់ទទួលឡើងរេញក៏គេនៅតែកត់សម្គាល់ថាកីឡាករទាំងនោះនៅតែមានអ្នកស្រឡាញ់ចូលចិត្ត និងទទួលស្គាល់ពីស្នាដៃរបស់ពួកគេមកទល់ពេលនេះ ។
កីឡាករទាំង៤បានប្រកាសលាឈប់ក្រោយពេលមានរបួស និងស្របពេលការប្រកួតរបស់ពួកគេក៏ដល់អាយុមិនអាចបន្តការប្រកួតទៀតបាន បើទោះជាអ្នកខ្លះនៅបន្តការងារពាក់ព័ន្ធនឹងការប្រដាល់ដដែល ដោយគ្រាន់តែមិនទទួលប្រដាល់នៅលើរេញប៉ុណ្ណោះ ។
+ បឹត ខាំ ៖ លោកគឺជាកីឡាករដែលមានឈ្មោះបោះសំឡេងមិនធម្មតានោះទេ នៅលើសង្វៀន ដោយលោកមិនត្រឹមតែល្បីនៅក្នុងប្រទេសប៉ុណ្ណោះទេ សូម្បីតែនៅបរទេសក៏ទទួលស្គាល់ថា កីឡាកររូបនេះជាជើងខ្លាំងផងដែរ ។ លោកធ្លាប់ទទួលបានខ្សែក្រវាត់ជើងឯកអន្តរជាតិនៅក្នុងប្រទេសបារាំង និងធ្លាប់ត្រូវបានប្រធានសមាគមប្រដាល់នៅក្នុងប្រទេសបារាំងធានាឱ្យចេញទៅបង្ហាត់សិស្សជាច្រើនឆ្នាំនៅទីនោះទៀតផង ។
ក្រឡេកមើលក្នុងស្រុកវិញ លោកក៏មានស្នាដៃព្រោះតែដណ្ដើមបានខ្សែក្រវាត់ជើងឯកច្រើនណាស់ដែរ ។ លោកទើបតែបានបាត់មុខប្រមាណជាង១ឆ្នាំចុងក្រោយប៉ុណ្ណោះ គឺបន្ទាប់ពីលោកសម្រេចចិត្តវិលចូលការប្រកួតជាថ្មី ហើយក៏មានរបួសបាក់ជើងម្ដងទៀត ដែលមិនអាចឱ្យលោកបន្តការព្យាបាល ។ លោកធ្លាប់បែកឆ្អឹងជង្គង់ម្ដងហើយ ប៉ុន្តែក្រោយព្យាបាលជាក៏បានត្រឡប់មកវិញ ដោយសារតែនៅស្រឡាញ់ការប្រដាល់។ ប៉ុន្តែការតាំងចិត្តរបស់លោកត្រូវបានបោះបង់ដោយសារតែការប្រដាល់លើកក្រោយៗមិនអាចឱ្យលោកទទួលបានជ័យជម្នះ ហើយគាប់ជួនជារបួសបាក់ឆ្អឹងជើងចុងក្រោយរបស់លោកក៏មិនអាចឱ្យលោករឹងមាំ ។ លោកបានសម្រេចចិត្តបោះបង់
ការប្រដាល់ទាំងស្រុង ក្រោយពីការប្រដាល់លែងទទួលបានផ្លែផ្កាតាមការចង់បាន។
លោកក៏ត្រូវគេដឹងថាបានសម្រេចចិត្តប្រកបអាជីពជាអ្នកបង្វឹកក្មេងៗនៅខេត្តកំពង់ឆ្នាំង និងមានជីវិតយ៉ាងសាមញ្ញមិនដូចកេរ្តិ៍ឈ្មោះរបស់លោកកាលពីពេលនៅប្រឡូកអាជីព
ប្រដាល់ខណៈដែលស្ថានភាពរស់នៅក៏មានពេលខ្លះគ្រប់គ្រាន់ និងពេលខ្លះមិនគ្រប់គ្រាន់ ព្រោះតែបាត់ចំណូលពីការប្រដាល់ដូចមុន។ យូរៗម្ដងគេឃើញកីឡាករបឺត ខាំ បង្ហាញខ្លួននៅតាមសង្វៀនដោយសារតែមកគាំទ្រកីឡាករជំនាន់ក្រោយ និងជួនកាលជូនកីឡាករដែលលោកបង្វឹកជាមួយបងប្រុស និងប្អូនប្រុសមកចូលរួមប្រកួត ប៉ុន្តែលោករមែងអះអាងថាខ្លួនបន្តការប្រកួតលែងកើតហើយ បើទោះជាស្ថានភាពប្រកួតរបស់កីឡាករក្មេងៗនៅក្នុងដំណាក់កាលនេះគឺទទួលបានតម្លៃខ្លួនថ្លៃៗល្អជាងកាលពីពេលលោកនៅប្រកួតដែលមិនសូវបានថ្លៃ ហើយដេកមើលខ្លួនម្ដងៗក៏មិនសូវមានអ្នកជួយដូចសម័យនេះ ។ លោកគឺជាអតីតកីឡាករមួយរូបដែលមានជីវិតកម្សត់នៅខេត្តកំពង់ឆ្នាំង ដោយក្នុងពេលមិនទាន់ល្បីឈ្មោះ លោកគ្រាន់តែជាអ្នកទទួលបានការជ្រោមជ្រែងពីក្រុមសាសនិកនៅក្នុងស្រុកកំណើតដែលលោករស់នៅប៉ុណ្ណោះ ទើបក្នុងអំឡុងពេលនេះ លោកបឺត ខាំ បានប្រកាសយ៉ាងក្ដែងៗថា លោកជាអ្នកគោរពព្រះយេស៊ូគ្រិស្ត ក្នុងពេលដែលកីឡាករភាគច្រើន សុទ្ធតែប្រកាសខ្លួនថាគោរពព្រះពុទ្ធសាសនា ។
យ៉ាងណាមិញ លោកមិនបានបោះបង់សាសនាកំណើតនោះទេ ដ្បិតគេឃើញលោកនៅតែជឿជាក់លើការបញ្ចុះអាថ័ននានាក្នុងពេលប្រកួតលើរេញ ដោយលោកក៏បានប្រតិបត្តិពិធីសែនគ្រូដូចគ្នានឹងមិនជឿលើសាសនាព្រះយេស៊ូផងដែរ ។ មកទល់ពេលនេះ លោកថាលាឈប់ពីការប្រដាល់១០០ភាគរយហើយ បើទោះជាលោកនៅមានអារម្មណ៍ស្រឡាញ់ពេញចិត្តនឹងអាជីពប្រដាល់ក្ដី ។ ម្យ៉ាងមកពីលោកក៏មានវ័យច្រើនផង ហើយកម្លាំងក៏ខ្សោយទៀតមិនមានលទ្ធភាពបំប៉នសុខភាពដូចគ្នានឹងកីឡាករបរទេសដែលមានវ័យប្រហែលៗលោកនោះឡើយ ។
+ ឡៅ ស៊ីណាត ៖ លោកក៏ជាកីឡាករដែលមានឈ្មោះបោះសំឡេងមិនណយផងដែរ នៅក្នុងពិភពប្រដាល់ ។ លោកត្រូវគេដឹងថាបានសម្រេចចិត្តបោះបង់ការប្រកួតប្រមាណជា២ឆ្នាំមុនដោយសារតែមានរបួសបាក់ជើង ហើយគ្រូពេទ្យតម្រូវឱ្យផ្អាករហូតដល់៦ខែទើបឱ្យឡើងរេញ ។ អ៊ីចឹងហើយទើបលោកសម្រេចចិត្តបោះបង់តែម្ដង ដោយសារតែការបោះបង់យូរខែពេក គឺធ្វើឱ្យលោកស្ពឹកដៃស្ពឹកជើង ហើយប្រកួតលែងកើត ។ លោកត្រូវគេដឹងថាបានងាកទៅប្រកបរបររត់រ៉ឺម៉កម៉ូតូកង់បីនិងឱ្យភរិយាលក់ដូរតិចតួចបន្ថែមចំណូលក្រោយពេលប្រដាល់លែងកើត ។
អ្វីដែលជាផ្លែផ្កាចុងក្រោយ លោកក៏ត្រូវបានសហព័ន្ធប្រដាល់ផ្ដល់ឱកាសឱ្យធ្វើជាចៅក្រមនៅក្នុងសង្វៀនទូរទស្សន៍បាយ័ន ទើបធ្វើឱ្យលោកកាន់តែលែងនឹកនាតែម្ដងសម្រាប់ការចង់វិលមកកាន់ការប្រដាល់ស្របគ្នាដែលវ័យរបស់លោកក៏លែងអំណោយផល ។ លោក ឡៅ ស៊ីណាត និយាយថា លោកឆ្អែតឆ្អន់នឹងការប្រដាល់ហើយប៉ុន្តែលោកក៏នៅតែស្រឡាញ់ចំពោះអាជីពនេះផងដែរ ទើបឱ្យប្អូនៗនៅតែបន្តការប្រដាល់ដោយមានការលើកទឹកចិត្ត ដោយមិនមែនខ្លួនប្រឡូកការប្រដាល់ច្រើនឆ្នាំមិនសល់អ្វី ហើយក៏ប្រទាញឱ្យប្អូនប្រុសក្មេងៗបោះបង់ទៅរកអាជីពផ្សេងនោះទេ ។
លោកថា ការប្រដាល់នៅក្នុងសម័យកាលនេះគឺប្រសើរជាងពេលដែលលោកនៅល្បីខ្លាំង ប៉ុន្តែលោកក៏មិនចង់បកក្រោយនោះដែរ ដោយបានទាំងអះអាងថា ការប្រកបអាជីពថ្មីក្រោយការឈប់ប្រដាល់ហាក់ធ្វើឱ្យលោកសប្បាយចិត្តច្រើនជាង បើធៀបនឹងពេលប្រឈមដោយបែករយះ និងបាក់ជើងដើរមិនរួចច្រើនខែព្រោះតែប្រឹងប្រដាល់ ។
+ វ៉ន វីវ៉ា ៖ លោកក៏ទើបតែបោះបង់ការប្រដាល់ក្រោយពីមានរបួសបាក់ឆ្អឹងដៃនាអំឡុងជាង១ឆ្នាំចុងក្រោយផងដែរ គឺបន្ទាប់ពីលោកក៏ក្លាយជាស្វាមីរបស់គេ និងត្រូវបំពេញការងារជាឪពុកនោះផង ។ លោកបានសម្រេចចិត្តបោះបង់ការប្រដាល់ហើយងាកទៅប្រកបមុខរបរថ្មី គឺរត់តាក់ស៊ីគិតជាគីឡូម៉ែត្រក្នុងក្រុងយ៉ាងកាលីប ដោយលោកក៏មានរថយន្តជួលឱ្យគេរត់ដើម្បីយកផលចំណេញផងដែរ ។
នេះជាមុខរបរថ្មីរបស់លោក តែមើលទៅកាលីបជាងកាលដែលលោកនៅបន្តការប្រដាល់ទៅទៀត ជាពិសេសគឺស្ថានភាពជីវភាពដែលលោកមិនមានការខ្វះខាតដូចមុននោះ ។ លោកក៏ត្រូវគេដឹងថាមានផ្ទះជួលមួយកន្លែងនៅម្ដុំវត្តក្រាំងធ្នង់ ដែលបានប្រកាសលក់ហើយមិនទាន់ដឹងថាលក់ដាច់ ឬនៅបន្តជួលនោះទេ។
យ៉ាងណាមិញ គេកត់សម្គាល់ថា លោកគឺជាកីឡាករល្បីឈ្មោះមួយរូប ដែលក្រោយការប្រកាសឈប់ប្រដាល់គឺមានមុខរបរ និងជីវភាពល្អប្រសើរជាងគេ ដោយមិនទាន់រាប់បញ្ចូលមុខរបររបស់ភរិយាគឺអ្នកនាងស៊ន ដាវីន ដែលមានក្លិបបង្វឹកតេក្វាន់ដូហើយរកចំណូលបានមិនធម្មតាជាប្រចាំខែនោះផង ។
+ យុគ យក្សគីល ៖ កីឡាករដែលមានឈ្មោះបោះសំឡេងនៅខេត្តបាត់ដំបងរូបនេះ ក៏បានសម្រេចចិត្តបោះបង់ការប្រដាល់ព្រោះតែការប្រកួតចុងក្រោយមានរបួសនោះផងដែរ ។ លោកត្រូវគេឃើញលឹបលនៅក្នុងការប្រដាល់ ដោយទើបតែបានបោះបង់ទាំងស្រុងប្រមាណជា២ឆ្នាំចុងក្រោយប៉ុណ្ណោះ គឺបន្ទាប់ពីកម្លាំងរបស់លោកក៏លែងដូចមុន ហើយស្ថានភាពមុខរបួសរបស់លោកក៏មិនអាចទ្រទ្រង់បាន ។
លោកបានសម្រេចចិត្តរស់នៅស្រុកកំណើតដោយប្រកបរបរជាអ្នករត់ម៉ូតូឌុបយ៉ាងសាមញ្ញ តែក៏មិនពិបាកណាស់ណានោះដែរ ដោយសារតែលោកក៏មានភរិយាជួយរកចំណូលផ្ទប់មួយផ្នែក។ លោកនៅតែមានកេរ្តិ៍ឈ្មោះនៅក្នុងពិភពប្រដាល់ ជាពិសេសនៅពេលរលឹកដល់ថ្វីដៃដែលលោកសម្រេចបានដូចជាការប្រកួតលក្ខណៈអន្តរជាតិនានា។
ក្រៅពីកីឡាករ៤រូបខាងលើ កីឡាករល្បីឈ្មោះមួយចំនួនទៀតក៏បានបោះបង់ការប្រដាល់ដូចគ្នាផងដែរ ដោយគ្រាន់តែកីឡាករផ្សេងទៀត គឺគេបោះបង់ដោយសារតែអស់ចិត្ត ដោយសារតែមានការងារផ្សេង និងដោយសារតែអាយុច្រើន ដោយមិនមែនដោយសារតែបញ្ហារបួសហើយបន្តការប្រកួតលែងបានដូចអ្នកទាំង៤ ៕
ចែករំលែកព័តមាននេះ