ខេត្តព្រះសីហនុ ៖ ដោយមានការចង្អុលបង្ហាញពីឯកឧត្ដមប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាអំពីការកំណត់សម្គាល់លើកុងតឺន័រចំនួន០៣ទូ ទំហំ២០ហ្វីត ដែលមានលេខMSCU3214532 , CLHU2983749 , MEDU2333385 របស់ក្រុមហ៊ុនCam Transit Import Co Ltd មកពីប្រទេសMozambique កាលពីថ្ងៃទី១៦ ខែធ្នូ ឆ្នាំ២០១៦កន្លងមក ។
ដែលបានប្រកាសនៅក្នុង Manifestថា ជាឈើ ចំនួន29pkgs ទម្ងន់ស្មើនឹង 55,213kgs និងផ្អែកលើលទ្ធផលរូបភាពផ្ដល់ដោយម៉ាស៊ីនស្កែនមានការសង្ស័យគួរឲ្យកត់សម្គាល់ ។ ព្រមទាំងតាមអនុលោមទៅតាមនីតិវិធីច្បាប់ស្ដីពីគយចុះថ្ងៃទី២០ ខែកក្កដា ឆ្នាំ២០០៧ និងប្រកាសលេខ១០៩សហវ.ប្រកចុះថ្ងៃទី១៥ ខែកុម្ភៈ ឆ្នាំ២០០៨ របស់ក្រសួងសេដ្ឋកិច្ច និងហិរញ្ញវត្ថុ បន្ទាប់ពីម្ចាស់ទំនិញមិនបានចូលខ្លួនមកបំពេញបែបបទយកទំនិញតាមខ្លឹមសារសេចក្ដីជូនដំណឹងលេខ០៩៣៨/១៧ អគរ/ស.កស ចុះថ្ងៃទី៣០ ខែឧសភា ឆ្នាំ២០១៧កន្លងមក របស់សាខាគយ និងរដ្ឋាករកំពង់ផែអន្ដរជាតិក្រុងព្រះសីហនុនៅវេលាម៉ោង០៩និង៣០នាទីថ្ងៃទី០៤ ខែធ្នូ ឆ្នាំ២០១៧ សមត្ថកិច្ចចម្រុះរួមមាន អាជ្ញាធរកំពង់ផែ អន្តរជាតិខេត្តព្រះសីហនុ មន្ត្រីប៉ូលិសកាំកុងត្រូល ភ្នាក់ងារស៊ើបអង្កេតរបស់ស្ថានទូតអាមេរិច មន្ត្រីគយ និងរដ្ឋាករនៃសាខាគយ និងរដ្ឋាករកំពង់ផែអន្ដរជាតិក្រុងព្រះសីហនុសម្របសម្រួលផ្នែកច្បាប់ដោយលោកលឹម ប៊ុនហេង ព្រះរាជអាជ្ញារងអមសាលាដំបូងខេត្តព្រះសីហនុ បានសហការគ្នាកាត់សៀលកុងតឺន័រខាងលើ ដើម្បីត្រួតពិនិត្យ ដោយទទួលបានលទ្ធផល ទូរទី១- MSCU3214532 បានរកឃើញដុំឈើចំនួន៦៨២ដើម ទម្ងន់សរុប១២,១៧៤គីឡូក្រាម ស្មើនឹង១៧ម៉ែត្រគូប ដុំឈើសង្ស័យចំនួន១០ដើម ដែលបង្កប់ភ្លុកដំរីចំនួន១៣២ដុំ ស្មើនឹង៤៥៤,៥១គីឡូក្រាម ទូរទី២- CLHU2983749 បានរកឃើញដុំឈើចំនួន៦០៥ដើម ទម្ងន់សរុប២០,០១០គីឡូក្រាម ស្មើនឹង ១៩ម៉ែត្រគូប ទូរទី៣- MEDU2333385 បានរកឃើញដុំឈើចំនួន៦៧៧ដើម ទម្ងន់សរុប ១៧,៣៨០គីឡូក្រាម ស្មើនឹង១៨ម៉ែត្រគូប ដុំឈើសង្ស័យចំនួន១២ដើម ដែលបង្កប់ភ្លុកដំរីចំនួន ១៤៧ដុំ ស្មើនឹង៤៨៦,៩០គីឡូក្រាម ។
សរុបភ្លុកដំរីដែលបានរកឃើញមានចំនួន២៧៩ដុំ ស្មើនឹង៩៤១,៤១គីឡូក្រាម ។
ត្រួតពិនិត្យបានបញ្ចប់សព្វគ្រប់នៅវេលាម៉ោង១៩និង៣០នាទីនៅថ្ងៃខែឆ្នាំដដែល ដោយបានវេចខ្ចប់ភ្លុកដំរីជាវត្ថុតាងដាក់ក្នុងទូរកុងតឺន័រលេខ MSCU3214532 (20’) រួចយកទៅដាក់នៅទីសុវត្ថិភាព ដើម្បីកសាងសំណុំរឿងបន្ដទៅតាមនិតិវិធីច្បាប់ ៕
ចែករំលែកព័តមាននេះ