រាជធានីភ្នំពេញ ៖ ដើម្បីចូលរួមលើកកម្ពស់ការប្រើប្រាស់ប្រាក់រៀលនៅទូទាំងប្រទេស ធនាគារជាតិនៃកម្ពុជា ក៏ដូចជាក្រសួង ស្ថាប័នពាក់ព័ន្ធតែងតែផ្សព្វផ្សាយ និងលើកទឹកចិត្តដល់ពាណិជ្ជករ អាជីវករ សេវាករទាំងអស់ចូលរួមប្រើប្រាស់ប្រាក់រៀលឲ្យបានផុសផុល និងចូលរួមបិទស្លាកតម្លៃលើផលិតផលជាប្រាក់រៀលឲ្យបានគ្រប់ៗគ្នា ហើយរហូតមកដល់ពេលនេះ ការអនុវត្តនៅទូទាំងប្រទេសសម្រេចបាន៨០%ហើយ ។ នេះបើតាមមន្ត្រីក្រសួងពាណិជ្ជកម្ម ។
មន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ថា នៅតាមមន្ទីរពាណិជ្ជកម្មតាមខេត្ត មន្ត្រីបានចុះណែនាំឲ្យអាជីវករបិទស្លាកតម្លៃជាប្រាក់រៀលរួចហើយ ក្នុងនោះមានកន្លែងខ្លះបានដូរ និងខ្លះទៀតមិនទាន់អនុវត្តនៅឡើយ តែជាទូទៅ វាមិនសល់ច្រើនទេ ។
លោកថ្លែងថា ៖« តាមខ្ញុំមើល យើងបានបិទតម្លៃលើផលិតផលជាប្រាក់រៀលបានភាគច្រើនហើយនៅទូទាំងប្រទេស ចាប់តាំងពីក្រសួងប្រកាសជូនដំណឹងឲ្យអាជីវករ ឬនៅតាមផ្សារនានាបិទស្លាកតម្លៃជាប្រាក់រៀលនៅលើផលិតផលមក ។ បើគិតរហូតដល់បច្ចុប្បន្ននេះ អាចវាយតម្លៃថា សម្រេចបានប្រហែល៨០ ឬ៩០%ហើយ » ។
យោងតាមរបាយការណ៍ធនាគារជាតិនៃកម្ពុជាបានបង្ហាញថា នៅ១៨ឆ្នាំចុងក្រោយនេះ ធនាគារជាតិបានខិតខំប្រឹងប្រែងពង្រឹងការប្រើប្រាស់ប្រាក់រៀល តាមរយៈការដាក់ចេញនូវវិធានការផ្អែកលើយន្តការទីផ្សារ និងដោយសន្សឹមៗ ។ ជាលទ្ធផល នៅក្នុងអំឡុងពេលនេះ ចំនួនប្រាក់រៀលចរាចរបានកើនឡើង១៦ដង ដល់៨,៧ទ្រីលានរៀល (២,២ប៊ីលានរៀល) ហើយប្រាក់បញ្ញើកើនជាង៤ដង ដល់៣,៤ប៊ីលានរៀល (៩៣៨,៥លានដុល្លារ) ។ បើធៀបនឹងឆ្នាំ១៩៩៣ ចំនួនប្រាក់រៀលចរាចរ និងប្រាក់បញ្ញើជារៀលសរុបកើនឡើង៣០ដង ឬកើនជាមធ្យម១,៣ដងក្នុង១ឆ្នាំៗ ។
ការបិទស្លាកតម្លៃលើផលិតផល និងសេវាជាប្រាក់រៀលនេះ តាមមន្ត្រីអ្នកនាំពាក្យលើកឡើងថា ៖« ចំពោះផ្សារដែលមិនបានអនុវត្តទៅតាមសេចក្តីប្រកាសរបស់ក្រសួងពាណិជ្ជកម្ម យើងមិនទាន់មានការពិន័យគាត់ទេ ជាទូទៅ ណែនាំគាត់សិន ។ វាខុសនឹងប្រកាសរបស់ក្រសួង ប៉ុន្តែវាមិនមែនជាទោសអ្វីធ្ងន់ទេ តែពេលយើងណែនាំទៅបើគាត់ធ្វើតាម ឬមិនធ្វើតាម ក៏ហីទៅ ប៉ុន្តែយើងណែនាំគាត់ម្តងជាពីរដង បើមិនព្រម យើងនឹងមានវិធានការ » ។
យោងតាមសេចក្តីប្រកាសលេខ ០៤៧ MOC / SM 2013 ស្តីពីការបិទស្លាកតម្លៃលើមុខទំនិញ និងសេវាកម្មគ្រប់ប្រភេទរបស់ក្រសួងពាណិជ្ជកម្ម ចុះថ្ងៃទី២៣ ខែមករា ឆ្នាំ២០១៣ បានកំណត់ក្នុងប្រការ១ថា កំណត់ឲ្យបិទស្លាកតម្លៃលើមុខទំនិញ និងសេវាទាំងអស់ ដែលបានចរាចរនៅលើទីផ្សារ សំដៅធានាដល់យន្តការនៃការអភិវឌ្ឍសេដ្ឋកិច្ច ទីផ្សារសេរី ការប្រកួតប្រជែងដោយសមធម៌ និងការលើកស្ទួយដល់ចរាចររូបិយវត្ថុក្នុងស្រុក (ប្រាក់រៀល) ក្នុងគោលបំណងបម្រើដល់ផលប្រយោជន៍ប្រជាជន និងអ្នកប្រើប្រាស់ទូទៅ និងប្រការ២ ពាណិជ្ជករ អាជីវករ សេវាទាំងអស់ ដែលកំពុងធ្វើសកម្មភាពពាណិជ្ជកម្ម អាជីវកម្ម និងសេវាកម្ម ក្នុងព្រះរាជាណាចក្រកម្ពុជា ត្រូវតែបិទស្លាកតម្លៃលើគ្រប់មុខទំនិញ និងសេវារបស់ខ្លួនជាប្រាក់រៀលជាចាំបាច់ ។
មន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ថា មានទំនិញមួយចំនួនមិនដាក់ឬបិទតម្លៃជាប្រាក់រៀល តែដាក់ជាប្រាក់ដុល្លារ ហើយការបិទនេះដោយសារមានសុំច្បាប់ត្រឹមត្រូវសម្រាប់ភ្ញៀវទេសចរ តែវាមិនច្រើនទេ ៕
ចែករំលែកព័តមាននេះ