រាជធានីភ្នំពេញ ៖ វិបត្តិតម្លៃជ្រូកនៅកម្ពុជាបានអូសបន្លាយអស់រយៈពេលជិត១ឆ្នាំហើយ នៅតែពុំទាន់មានដំណោះស្រាយ ដែលធ្វើឲ្យកសិករ និងម្ចាស់កសិដ្ឋានតូចធំមួយចំនួនបោះបង់ការចិញ្ចឹម ព្រោះតែមិនអាចទប់ទល់នឹងការចំណាយ និងខ្លះទៀតត្រូវបង្ខំចិត្តលក់ ព្រោះបើទុកយូរ កាន់តែខាតច្រើនឡើង ដោយសារត្រូវចំណាយលើចំណីរាល់ថ្ងៃ ។
លោក ប៊ុន ហៀង សមាជិកក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា បានឲ្យដឹងថា ទីផ្សារជ្រូកកម្ពុជាបានជួបវិបត្តិ ដោយសារតែការនាំចូលលើសតម្រូវការពីប្រទេសជិតខាង ជាពិសេស ពីប្រទេសវៀតណាម ។ ការនាំចូលពីប្រទេសវៀតណាមនេះ ត្រូវបានមើលឃើញថាមានចំនួនច្រើនទាំងមានច្បាប់ និងអត់ច្បាប់ ជាពិសេសនាំចូលតាមច្រករបៀង ជាលក្ខណៈតាមម៉ូតូ ឬតាមរ៉ឺម៉កតកន្ទុយ ។
លោកបន្តថា ៖« បច្ចុប្បន្ន បើយើងសង្កេតមើលពីការចិញ្ចឹមក្នុងស្រុក យើងមិនអាចផ្គត់ផ្គង់ទីផ្សារបានទេ ដោយសារតែតម្លៃជ្រូកក្នុងស្រុកទាបពេក ធ្វើឲ្យកសិករ និងម្ចាស់កសិដ្ឋានគ្មានទឹកចិត្តក្នុងការចិញ្ចឹមបន្ត ដូចនេះហើយទុកឲ្យឈ្មួញបន្តនាំចូលមកផ្គត់ផ្គង់វិញ» ។
លោកថា ៖« កាលពីឆ្នាំមុនៗ ការចិញ្ចឹមក្នុងស្រុករបស់យើងអាចផ្គត់ផ្គង់បានទៅតាមតម្រូវការ ក៏ប៉ុន្តែចាប់តាំងដើមឆ្នាំ២០១៧មក ដោយសារតែមានការនាំចូលលើសតម្រូវការពីប្រទេសវៀតណាម បានធ្វើឲ្យអ្នកចិញ្ចឹមក្នុងស្រុកបោះបង់ចោលការចិញ្ចឹម ។ ដូចនេះហើយបើសិនជាថ្ងៃណាមួយ វៀតណាមគេមិនលើសតម្រូវការ ហើយឈប់នាំចូលមកកម្ពុជា ពេលនោះ កម្ពុជានឹងជួបវិបត្តិទីផ្សារជ្រូកទៀត ដោយពេលនោះជ្រូកនឹងឡើងថ្លៃ តែអត់មានជ្រូកសម្រាប់ផ្គត់ផ្គង់ម្ដង » ។
លោក ជេត ភីរម្យ អនុប្រធានសមាគមអ្នកចិញ្ចឹមសត្វកម្ពុជា បានឲ្យដឹងផងដែរថា តាមការវាយតម្លៃដែលទទួលបានពីអ្នកចិញ្ចឹម ទាំងក្រុមហ៊ុន និងកសិករបានបង្ហាញថា ក្រុមហ៊ុនត្រូវចំណាយថ្លៃដើមប្រមាណ៧ពាន់រៀលក្នុង១គីឡូក្រាម ហើយកសិករវិញត្រូវចំណាយថ្លៃដើមប្រមាណ៨ពាន់រៀលក្នុង១គីឡូក្រាម ។ ប៉ុន្តែនៅពេលលក់ចេញវិញ ក្នុង១គីឡូក្រាម សម្រាប់ជ្រូកដែលចិញ្ចឹមពីក្រុមហ៊ុន បានតម្លៃជាង៦ពាន់រៀលក្នុង១គីឡូក្រាម ហើយជ្រូករបស់កសិករលក់បានតែប្រមាណ៥.៥០០រៀលប៉ុណ្ណោះក្នុង១គីឡូក្រាម ដូចនេះ សម្រាប់កសិករគឺខាតធ្ងន់ធ្ងរជាងក្រុមហ៊ុន ។
លោកនិយាយថា ៖« ក្នុងជ្រូក១ក្បាល ទាំងកសិករ និងម្ចាស់កសិដ្ឋានធំៗ ត្រូវខាតដើមជាមធ្យម១០ម៉ឺនរៀល តែត្រូវបង្ខំចិត្តលក់ជ្រូកនោះចេញ ព្រោះទុកយូរទៅ ជ្រូកត្រូវស៊ីចំណី ហើយជ្រូកដែលគ្រប់អាយុ វាស៊ីកាន់តែច្រើន តែមិនឡើងគីឡូទៀតទេ » ។
អ្នកស្រី ម៉ន ណារី ម្ចាស់កសិដ្ឋានចិញ្ចឹមជ្រូកក្នុងស្រុកកៀនស្វាយ ខេត្តកណ្ដាល បានឲ្យដឹងថា ពេលនេះ អ្នកស្រីកាន់តែពិបាក ព្រោះតែតម្លៃធ្លាក់ចុះជិត១ឆ្នាំហើយ និងធ្វើឲ្យអ្នកស្រីខាតបង់ជាបន្តបន្ទាប់ ដោយយកលុយដែលសន្សំបានពីមុនមកចំណាយនៅពេលនេះវិញ ។
អ្នកស្រីនិយាយថា ៖« ខ្ញុំប្រកបរបរចិញ្ចឹមជ្រូកតាំងពីជំនាន់ឆ្នាំ១៩៨៦ តែមិនដែលជួបបញ្ហាដូចក្នុងឆ្នាំ២០១៧នេះទេ ។ របរនេះបានជួយខ្ញុំចិញ្ចឹមកូន និងបានឲ្យពួកគេទៅរៀនសូត្របន្ត តែនៅពេលដែលតម្លៃជ្រូកមានបញ្ហា ខ្ញុំក៏ជួបបញ្ហាកាន់តែខ្លាំងឡើងដែរ ត្រូវសន្សំសំចៃប្រាក់សម្រាប់កូនរៀន ដើម្បីយកទប់ទល់ជាមួយនឹងការចំណាយប្រចាំថ្ងៃលើសត្វជ្រូកវិញម្ដង ហើយប្រាក់ដែលខិតខំរកបានពីមុនមក ក៏ត្រូវតែយកមកផ្គត់ផ្គង់ការចំណាយខាតបង់សព្វថ្ងៃវិញដែរ » ។
អ្នកស្រីបន្តថា អ្នកស្រីមិនចង់បោះបង់របរដែលជួយគ្រួសារអ្នកស្រីតាំងពីដើមមកនោះទេ ហើយអ្នកស្រីជឿជាក់ថា តម្លៃជ្រូកនឹងអាចល្អប្រសើរឡើងវិញ បើសិនជាមានវិធានការ ឬចំណាត់ការណាមួយពីរាជរដ្ឋាភិបាល ជាពិសេសសម្ដេចតេជោ ហ៊ុន សែន នាយករដ្ឋមន្ត្រី។ ប៉ុន្ដែបើសិនជាគ្មានចំណាត់ការទេ អ្នកស្រីប្រហែលជាមិនអាចទប់ទល់នឹងការចំណាយប្រចាំថ្ងៃបានទេ ចង់មិនចង់ អ្នកស្រីត្រូវតែបោះបង់របរមួយនេះ ហើយក៏មិនដឹងទៅពឹងលើរបរអ្វីផ្សេងដែរ។ អ្នកស្រីថា ៖« សព្វថ្ងៃនេះ អ្នកស្រីលក់ជ្រូកឲ្យឈ្មួញ ក្នុង១ក្បាលខាតប្រហែលជា១០ម៉ឺនរៀល ព្រោះបើទុកកាន់តែយូរ កាន់តែខាត » ។
តាមគោលការណ៍របស់ក្រសួងកសិកម្ម រុក្ខាប្រមាញ់ និងនេសាទ បានកំណត់ឲ្យឈ្មួញនានានាំចូលជ្រូករស់ពីក្រៅប្រទេស ចំនួនតែ១.២៥០ក្បាលប៉ុណ្ណោះក្នុង១ថ្ងៃ ក៏ប៉ុន្តែធាតុពិត បរិមាណនេះតិចតួចនៅឡើយ បើធៀបនឹងការនាំចូលជាក់ស្តែងទាំងស្របច្បាប់ និងខុសច្បាប់ ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឲ្យដឹងថា បច្ចុប្បន្ននេះ ជ្រូកដែលនាំចូលពីប្រទេសជិតខាង មិនក្រោម៣ពាន់ក្បាលទេក្នុង១ថ្ងៃ ខណៈតម្រូវការក្នុងស្រុក មានប្រមាណ៨ពាន់ក្បាលក្នុង១ថ្ងៃ ៕
ចែករំលែកព័តមាននេះ