ខេត្តស្វាយរៀង ៖ មនុស្សប្រុស-ស្រី៥នាក់ បានរងរបួសធ្ងន់ស្រាលខណៈបើកម៉ូតូបត់ឆ្វេងមិនមើលក្រោយត្រូវម៉ូតូមួយគ្រឿងទៀត ធ្វើដំណើរស្របទិសបុកពេញទំហឹងចំពាក់កណ្តាលម៉ូតូ ហើយដួលអូសម៉ូតូ និងមនុស្សជាង១០ម៉ែត្របណ្តាលឲ្យមនុស្សប្រុស-ស្រី០២រងរបួសធ្ងន់សន្លប់នៅនឹងកន្លែង ហើយប្រុស-ស្រី០៣នាក់ផ្សេងទៀតរបួសស្រាល ករណីគ្រោះថ្នាក់ចរាចរណ៍កើតឡើងកាលពីវេលាម៉ោង៣និង៤០នាទីរសៀលថ្ងៃទី០៣ ខែឆ្នូ ឆ្នាំ២០១៧ ផ្លូវជាតិលេខ០១ ស្ថិតនៅភូមិប្រសូត្រ១ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឲ្យដឹងថា ក្រោយពីគ្រោះថ្នាក់កើតឡើង១០នាទីក្រោយ ជនរងគ្រោះត្រូវសាច់ញាតិហៅរថយន្តសាមុយដឹកបញ្ជូនទៅមន្ទីរពេទ្យបង្អែកស្រុកប្រតិបត្តិស្វាយទាបដើម្បីសង្គ្រោះ ។ មុនពេលកើតហេតុគេឃើញបុរសម្នាក់ជិះម៉ូតូសេ១២៥ ពណ៌ខ្មៅ ស្លាកលេខ ស្វាយរៀង១H-៨២២៥ បើកពីកើតទៅលិចឌុបគ្នា២នាក់ឪពុកកូន លុះមកដល់ចំណុចកើតហេតុខាងលើស្រាប់តែបត់ឆ្វេងមិនបានមើលក្រោយ ស្របពេលនោះក៏មានម៉ូតូមួយគ្រឿងទៀតដាសេ១២៥ពណ៌ខ្មៅ ឌុបគ្នា៣នាក់ ស្រី២នាក់ មកពីក្រោយស្របទិសគ្នា បុកពេញទំហឹងចំពាក់កណ្តាលម៉ូតូលាន់ដូចរន្ទះដួលម៉ូតូឪពុក និងកូនអូសទាំងមនុស្ស មូតូ ចម្ងាយ១០ម៉ែត្របណ្តាលឲ្យបុរសជាឪពុកបោកក្បាលទៅលើថ្នល់កៅស៊ូបែកក្បាល បែកមាត់ធ្ងន់ធ្ងរសន្លប់នៅនឹងកន្លែង ឯកូនប្រុសរបួសស្រាល ។
ចំណែកម៉ូតូបង្កដួលបោកនៅនឹងកន្លែងបណ្តាលឲ្យស្ត្រីម្នាក់រងរបួសបែកក្បាលសន្លប់នៅនឹងកន្លែងដែរ ចំណែកបុរសអ្នកឌុបរបួសពកក្បាល និងរលាត់ដៃជើង ហើយស្ត្រីរួមដំណើរម្នាក់ទៀតរបួសស្រាល ៕
ចែករំលែកព័តមាននេះ