កិច្ចប្រជុំអាស៊ី-អឺរ៉ុប ឬហៅកាត់ថា អាសេម (ASEM) ត្រូវបានរៀបចំឡើងនៅក្នុងទីក្រុងប៊្រុចសែល ប្រទេសបែលហ្ស៊ិក នៅថ្ងៃទី៥ តុលា ដល់ថ្ងៃទី៦ តុលា ។ តាមប្រភពព័ត៌មានពីទីក្រុងប៊្រុចសែលឱ្យដឹងថា កិច្ចប្រជុំដែលត្រូវបានរៀបចំធ្វើឡើង២ឆ្នាំម្តងនេះ ចូលរួមដោយមេដឹកនាំមកពីប្រទេសចំនួន៤៨ ក្រោមប្រធានបទ «គុណភាពនៃជីវិត» នឹងពិភាក្សាអំពីបញ្ហានានាដែលគ្របដណ្តប់លើស្ថានការណ៍ហិរញ្ញវត្ថុសាកលលោក និងអភិបាលកិច្ចសេដ្ឋកិច្ច ។ តាមប្រភពព័ត៌មានដដែលបានឱ្យដឹងទៀតថា សន្តិសុខនៅ កន្លែងរៀបចំកិច្ចប្រជុំអាស៊ី-អឺរ៉ុប ត្រូវបានរឹតបន្តឹងយ៉ាងខ្លាំង ដើម្បីផ្តល់សន្តិសុខ និងសុវត្ថិភាពសំរាប់មេដឹកនាំទាំងអស់ដែលចូលរួម ។
ក្នុងកិច្ចប្រជុំអាស៊ី-អឺរ៉ុបនេះ ក៏មានការអញ្ជើញចូលរួមដោយសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ ផងដែរ ។ ជាមួយគ្នានេះ ទាក់ទិនទៅនឹងកិច្ចប្រជុំនោះ ទីភ្នាក់ងារសារព័ត៌មានថៃកាលពីថ្ងៃទី៣ តុលា បានដកស្រង់សំដីលោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ ដែលបានថ្លែងថា រូបលោកនឹងពិភាក្សាគ្នាជាមួយសមភាគីកម្ពុជាសម្តេចតេជោហ៊ុន សែន អំពីបញ្ហាជំលោះព្រំដែន រវាងប្រទេសថៃ និងប្រទេសកម្ពុជា នៅក្រៅវេទិកានៃកិច្ចប្រជុំអាស៊ី-អឺរ៉ុបលើកទី៨ ដែលរៀបចំឡើងនៅក្នុងទីក្រុងប៊្រុចសែល ប្រទេសបែលហ្ស៊ិក ចាប់ពីថ្ងៃទី៥ តុលា ដល់ថ្ងៃទី៦ តុលា ។ លោកអាប់ភីស៊ីត ថ្លែងថា ក្រោយពីការពិភាក្សាគ្នានៅក្នុងទីក្រុងញូវយ៉កកាលពីចុងខែមុននឹងមានការជួបពិភាក្សាគ្នាច្រើនទៀត រវាងលោក និងសម្តេចតេជោហ៊ុន សែន ស្តីអំពីបញ្ហាព្រំដែន ជាពិសេសស្តីអំពីសកម្មភាពរបស់ទីភ្នាក់ងាររដ្ឋាភិបាលដែលពាក់ព័ន្ធរបស់ប្រទេសទាំង២ ។
ទីភ្នាក់ងារសារព័ត៌មានដដែលនេះបានដកស្រង់សំដី លោកអាប់ភីស៊ីត ដែលថ្លែងទៀតថា បញ្ហាព្រំដែននៃប្រទេសទាំងពីរកម្ពុជា-ថៃ ដែលមានវត្តមានកងទ័ពអាចនឹងត្រូវពិភាក្សាគ្នា ៕
ចែករំលែកព័តមាននេះ