ប្រទេសយេម៉ែន ៖ វិបត្តិនៅប្រទេសយេម៉ែនពេលនេះមានសភាពកាន់តែតានតឹងថែមមួយកម្រិតទៀត ។ អតីតប្រធានាធិបតី លោកអាលី អាប់ដាល់ឡាហ៍ សាឡេហ៍ បានត្រូវសម្លាប់ក្នុងការប្រយុទ្ធគ្នានៅទីក្រុងសាណា ។…
ប្រទេសយេម៉ែន ៖ វិបត្តិនៅប្រទេសយេម៉ែនពេលនេះមានសភាពកាន់តែតានតឹងថែមមួយកម្រិតទៀត ។ អតីតប្រធានាធិបតី លោកអាលី អាប់ដាល់ឡាហ៍ សាឡេហ៍ បានត្រូវសម្លាប់ក្នុងការប្រយុទ្ធគ្នានៅទីក្រុងសាណា ។ នេះជាការអះអាងកាលពីថ្ងៃទី៤ ធ្នូ របស់ប្រភពព័ត៌មានជាច្រើន ។
ដំបូងព័ត៌មាននេះប្រកាសដោយពួកឧទ្ទាមស៊ីអ៊ីតហ៊ូធី ហើយបន្ទាប់មកបញ្ជាក់ដោយគណបក្សលោកសាឡេហ៍ ។ កងកម្លាំងស្មោះត្រង់នឹងលោកសាឡេហ៍ និងពួកឧទ្ទាមហ៊ូធី ដែលធ្លាប់ជាសម្ព័ន្ធមិត្តនឹងគ្នាបានប្រយុទ្ធបង្ហូរឈាមគ្នាចាប់តាំងពីការផ្ទុះបែកសម្ព័ន្ធភាពពីថ្ងៃទី២ ធ្នូ មកនៅរដ្ឋធានីសាណា ។
លោកស្រី FAIKA AL SAYYED ជាមេដឹកនាំម្នាក់នៃគណបក្សសមាជប្រជាជនទូទៅ CPG បញ្ជាក់ថា លោកសាឡេហ៍ ត្រូវពួកហ៊ូធីសម្លាប់ ។ ការស្លាប់របស់អតីតប្រធានាធិបតីយេម៉ែនអាយុ៧៥ឆ្នាំរូបនេះ អាចបង្កើតជារបត់ចម្បងមួយក្នុងជម្លោះ ដែលហែកហួប្រទេសចាប់តាំងពីលោកចាកចេញពីអំណាចកាលពីឆ្នាំ២០១២មក ។
កំពុងជួបប្រទះនឹងវិបត្តិមនុស្សធម៌យ៉ាងអាក្រក់ជាងគេបំផុតនៃពិភពលោក បើតាម អ.ស.ប សង្គ្រាមនៅយេម៉ែនងាកទៅបង្កើនភាពតានតឹងក្នុងតំបន់ ព្រមទាំងជម្លោះរវាងអារ៉ាប៊ី សាអ៊ូឌីត ស៊ុននីត និងអ៊ីរ៉ង់ស៊ីអ៊ីត ខណៈក្រុងរីយ៉ាដចោទប្រកាន់ក្រុងតេហេរ៉ង់ថាជួយទ្រទ្រង់ខាងយោធាដល់ពួកឧទ្ទាមហ៊ូធី ។ ចំណែកមនុស្ស៨.៧៥០នាក់ ត្រូវស្លាប់ចាប់តាំងពីអន្តរាគមន៍យោធារបស់អារ៉ាប៊ី សាអ៊ូឌីត និងពួកសម្ព័ន្ធមិត្តនៅយេម៉ែនពីខែមីនា ឆ្នាំ២០១៥មក ។
ក្រសួងមហាផ្ទៃត្រួតត្រាដោយពួកហ៊ូធី ប្រកាសពីការបញ្ចប់នៃកងជីវពលក្បត់ និងពីការស្លាប់របស់ប្រមុខគេ គឺលោកអាលី អាប់ដាល់ឡាហ៍ សាឡេហ៍ ព្រមទាំងសមាសភាពពួកឧក្រិដ្ឋមួយចំនួន ។ វីដេអូមួយប្រគល់ដោយពួកហ៊ូធី ដល់អ្នកកាសែតម្នាក់បង្ហាញសាកសពរបស់លោកសាឡេហ៍ ។
ការប្រយុទ្ធគ្នាមានសភាពខ្លាំងក្លាចាប់ពីថ្ងៃទី២៩ វិច្ឆិកា មក ក្នុងរដ្ឋធានីសាណា ដែលពួកឧទ្ទាមទាំង២ក្រុមត្រួតត្រារួមគ្នាចាប់ពីឆ្នាំ២០១៤មក ខណៈរដ្ឋាភិបាលរបស់ប្រធានាធិបតី ABD RABBO MANSOUR HADI ដែលអន្តរជាតិទទួលស្គាល់ភៀសខ្លួនទៅកាន់ទីក្រុងអាដេន អតីតរដ្ឋធានីយេម៉ែនខាងត្បូងពេលមិនទាន់រួមបញ្ចូលគ្នា ៕
ចែករំលែកព័តមាននេះ