ផ្កាយព្រះគ្រោះនៅខាងក្រៅប្រព័ន្ធសុរិយៈរបស់មនុស្សលោកក្នុងពេលបច្ចុប្បន្នហាក់ដូចជារឿងធម្មតា ប៉ុន្តែការរកឃើញផ្កាយព្រះគ្រោះដំណាក់កាលចុងក្រោយនេះ តារាវិទូនៅតំបន់អឺរ៉ុបនិយាយថា ផ្កាយព្រះគ្រោះ «Ross 128b»បែរជាបង្កើតចំណុចគួរឱ្យចាប់អារម្មណ៍បំផុត ព្រោះជាផ្កាយនៅឆ្ងាយពីដែនដីត្រឹមតែ១១ឆ្នាំពន្លឺ មានទំហំធំជាងដែនដីប្រហែល១,៣៨ដងប៉ុណ្ណោះ ។ ចាត់ទុកថាមានទំហំប្រហាក់ប្រហែលគ្នា និងអាចមានសីតុណ្ហភាពស្រដៀងគ្នានឹងភពផែនដី ។
តារាវិទូឱ្យដឹងថា «Ross 128b» អាចជាផ្កាយមានលក្ខណៈស្ងប់ស្ងាត់ ព្រោះមានសារធាតុអ៊ុលត្រាវីយ៉ូឡេ និងកាំរស្មី X ក្នុងកម្រិតមិនគ្រោះថ្នាក់ ។ មានន័យថា ផ្កាយព្រះគ្រោះនេះមានលក្ខណៈសមស្រប និងអំណោយផលដល់ការរស់នៅនៃវត្ថុមានជីវិត ។
នៅរៀងរាល់៩,៩ថ្ងៃ ផ្កាយ «Ross 128b» គោចរជុំវិញផ្កាយឈ្មោះ «Ross 128» ជាផ្កាយក្រិនក្រហមប្រទះឃើញច្រើននៅក្នុងចក្កវាឡ ។ បើប្រៀបធៀបលើរយៈចម្ងាយពីផែនដី និងព្រះអាទិត្យឃើញថា ផ្កាយព្រះគ្រោះនៅជិតផ្កាយក្រិនក្រហម ដល់ទៅ២០ដងនៃផែនដី ។
កាលពីមុនអ្នកវិទ្យាសាស្ត្ររកឃើញផ្កាយព្រះគ្រោះនៅក្រៅប្រព័ន្ធដែលនៅជិតប្រព័ន្ធសុរិយៈឈ្មោះផ្កាយព្រះគ្រោះ «Proximab» នៅចម្ងាយ៤,២ឆ្នាំពន្លឺ ប៉ុន្តែមានលក្ខខណ្ឌកំណត់ពីការរស់នៅរបស់វត្ថុមានជីវិតផ្សេងពី «Ross 128b» ។
អ្នកវិទ្យាសាស្ត្រនិយាយថា ត្រូវសិក្សាពីស្ថានភាពបរិយាកាស និងស្រាវជ្រាវស្លាកស្នាមរបស់ទឹក អុកស៊ីហ្សែន បន្តទៀត ។ បច្ចុប្បន្នប្រទះឃើញផ្កាយព្រះគ្រោះនៅក្រៅប្រព័ន្ធជាច្រើនដួង ប៉ុន្តែប្រហែល៥០ដួងឃើញថាអាចបង្កភាពងាយស្រួលដល់ការរស់នៅបាន៕
ចែករំលែកព័តមាននេះ