រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេច ហេង សំរិន ប្រធានរដ្ឋសភាកម្ពុជាកន្លងទៅនេះ លោកស្រី សេក្ខ ហាស៊ីណា នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដេស…
រាជធានីភ្នំពេញ ៖ ក្នុងជំនួបពិភាក្សាទ្វេភាគីជាមួយសម្តេច ហេង សំរិន ប្រធានរដ្ឋសភាកម្ពុជាកន្លងទៅនេះ លោកស្រី សេក្ខ ហាស៊ីណា នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដេស បានស្នើឲ្យអ្នកវិនិយោគទុនកម្ពុជា ទៅធ្វើការវិនិយោគនៅក្នុងប្រទេសបង់ក្លាដេសឲ្យបានច្រើន។ នេះបើតាមការឲ្យដឹងពីលោក កែវ ពិសិដ្ឋអ្នកនាំពាក្យសម្តេច ហេង សំរិន ។
ថ្លែងប្រាប់ក្រុមអ្នកសារព័ត៌មានក្រោយជំនួបរវាងលោកស្រីនាយករដ្ឋមន្ត្រីបង់ក្លាដេសជាមួយសម្តេច ហេង សំរិន កាលពីរសៀលថ្ងៃទី៤ ខែធ្នូ នៅសណ្ឋាគាភូគេត្រា លោកស្រីនាយករដ្ឋមន្ត្រីបានស្នើដល់សម្តេចប្រធានរដ្ឋសភា ជំរុញកិច្ចសហប្រតិបត្តិការរវាងរដ្ឋសភាកម្ពុជានិងរដ្ឋសភាបង់ក្លាដេសបន្ថែមទៀត ក្នុងខណៈដែលទំនាក់ទំនងកិច្ចសហប្រតិបត្តិវិស័យនានានៃប្រទេសទាំងពីរកំពុងរីកចម្រើនជាលំដាប់ ទាំងក្នុងវិស័យការទូតនិងពាណិជ្ជកម្មនោះ។
ជាការឆ្លើយតបសម្តេចប្រធានរដ្ឋសភាកម្ពុជាបានគាំទ្រយ៉ាងពេញទំហឹងចំពោះអនុសារណៈ និងកិច្ចព្រមព្រៀងនានាដែលរដ្ឋាភិបាលនៃប្រទេសទាំងពីរបានធ្វើកន្លងមក សំដៅពង្រឹង និងពង្រីកកិច្ចសហប្រតិបត្តិការល្អរវាងកម្ពុជា-បង់ក្លាដេស ដើម្បីឧត្តមប្រយោជន៍ទាំងសងខាង។
សូមជម្រាបថា លោកស្រី សេក្ខ ហាស៊ីណា នាយករដ្ឋមន្ត្រីបង់ក្លាដេស ធ្លាប់បានមកបំពេញទស្សនកិច្ចនៅកម្ពុជាម្តងហើយកាលពីឆ្នាំ២០០១ ហើយលើកនេះលោកស្រីបានជម្រាបសម្តេចប្រធានរដ្ឋសភាថា លោកស្រី និងគណៈប្រតិភូបានឃើញពីការអភិវឌ្ឍន៍គួរឲ្យកត់សម្គាល់របស់កម្ពុជា។
នៅក្នុងដំណើរទស្សនកិច្ចលើកនេះ លោកស្រី នឹងខិតខំទាក់ទាញអ្នកវិនិយោគកម្ពុជាទៅបណ្តាក់ទុននៅបង់ក្លាដេស ហើយជំរុញអ្នកវិនិយោគពីបង់ក្លាដេស មកបណ្តាក់ទុននៅកម្ពុជាវិញ៕
ចែករំលែកព័តមាននេះ