ខេត្តកំពង់ស្ពឺ ៖ បុរសម្នាក់ត្រូវបានប្រទះឃើញស្លាប់ក្បែរម៉ូតូរបស់ខ្លួន បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅពិនិត្យស្រាវជ្រាវដល់កន្លែងកើតហេតុ ។ ក្រោយពិនិត្យ សមត្ថកិច្ចអះអាងថា ជនរងគ្រោះស្លាប់ដោយសារគ្រោះថ្នាក់ចរាចរ គឺបុកគោយន្តពីក្រោយ…
ខេត្តកំពង់ស្ពឺ ៖ បុរសម្នាក់ត្រូវបានប្រទះឃើញស្លាប់ក្បែរម៉ូតូរបស់ខ្លួន បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅពិនិត្យស្រាវជ្រាវដល់កន្លែងកើតហេតុ ។ ក្រោយពិនិត្យ សមត្ថកិច្ចអះអាងថា ជនរងគ្រោះស្លាប់ដោយសារគ្រោះថ្នាក់ចរាចរ គឺបុកគោយន្តពីក្រោយ ។
ហេតុការណ៍នេះកើតឡើងកាលពីយប់រំលងអធ្រាត្រ ឈានចូលថ្ងៃទី០៥ ខែធ្នូ ឆ្នាំ២០១៧ នៅលើផ្លូវជាតិលេខ៥១ ចំណុចភូមិដំណាក់ត្រាច ឃុំក្សេមខ្សាន្ត ស្រុកឧដុង្គ ខេត្តកំពង់ស្ពឺ ។ សពឈ្មោះ រឿន បូរ៉ាន ភេទប្រុស អាយុ៣១ឆ្នាំ រស់នៅភូមិស្វាយលាប ឃុំទុំនប់ធំ ស្រុកពញាឮ ខេត្តកណ្ដាល ។
ប្រភពពីសមត្ថកិច្ចស្រង់សម្ដីសាក្សីបានឲ្យដឹងថា តាមការស្រាវរបស់គឺជនរងគ្រោះបានស្លាប់ដោយសារតែជិះម៉ូតូបុកគោយន្តពីក្រោយ ទើបជួបហេតុការអាក្រក់បែបនេះ ។ ប្រភពបន្តថា ពេលមេឃកំពុងភ្លៀងគេឃើញបុរសរងគ្រោះជិះម៉ូតូម្នាក់ឯង ទិសដៅពីត្បូងទៅជើង ស្រាប់តែដល់ចំណុចកើតហេតុ ឮសូរសំឡេងប្រាវ ពេលនោះមិននានអ្នកណាចាប់អារម្មណ៍ថាមានរឿងអ្វីកើតឡើងនោះទេ រហូតដល់រាំងភ្លៀងទើបប្រទះឃើញជនរងគ្រោះដេកស្លាប់ក្បែរម៉ូតូរបស់ខ្លួននៅកន្លែងកើតហេតុ ។
នគរបាលស្រុកឧដុង្គបានប្រាប់ទៀតថា ជនរងគ្រោះជិះម៉ូតូម៉ាកC១២៥ ស៊េរី២០១១ ពណ៌ខ្មៅ ស្លាកលេខ ភ្នំពេញ ១AW-៣៥១២ តាមការសន្និដ្ឋាន និងពិនិត្យនៅកន្លែងកើតហេតុ គឺជនរងគ្រោះអាចជិះម៉ូតូបុកគោយន្តពីក្រោយ ។ មូលហេតុដែលសមត្ថកិច្ចហា៑នសន្និដ្ឋាន ដោយសារតែនៅកន្លែងកើតហេតុសមត្ថកិចរកឃើញមានកម្ទេចឈើ និងបំណែកម៉ូតូនៅនឹងកន្លែងកើតហេតុ ។ ក្រោយពិនិត្យ និងធ្វើកំណត់ហេតុរួចរាល់ សពជនរងគ្រោះ និងម៉ូតូត្រូវបានសាច់ញាតិសុំយកទៅធ្វើបុណ្យ ៕
ចែករំលែកព័តមាននេះ