ខេត្តកោះកុង ៖ នៅចន្លោះពេលពីម៉ោង៣ទៀបភ្លឺថ្ងៃទី០៥ ខែធ្នូ ឆ្នាំ២០១៧ សមត្ថកិច្ចសេដ្ឋកិច្ចនៃស្នងការដ្ឋាននគរបាលខេត្តកោះកុងបានបើកប្រតិបត្តិការស្ទាក់ចាប់ទូកមួយគ្រឿងដឹកម៉ូតូស៊េរីទំនើបពីប្រទេសថៃមកកាន់ទីរួមខេត្តកោះកុងបានចំនួនមួយគ្រឿងដែលមានផ្ទុកម៉ូតូថ្មីៗចំនួន១១គ្រឿង ។
ការស្ទាក់ចាប់នេះត្រូវបានធ្វើឡើងនៅចំណុចក្នុងដៃសមុទ្រកោះប៉ោ ស្ថិតក្នុងឃុំប៉ាក់ខ្លង ស្រុកមណ្ឌលសីមា បន្ទាប់ពីចាប់រួចកំលាំងសមត្ថកិច្ចបានលើកយកម៉ូតូទាំង១១គ្រឿងមករក្សាទុកនៅក្នុងស្នងការដ្ឋាននគរបាលខេត្ត និងកម្មករទូកចំនួន២នាក់ជាជនជាតិថៃទី១-ឈ្មោះ កានស៊ីសុវ៉ាត់ ភេទប្រុស អាយុ៤៣ឆ្នាំ និងទី២-ឈ្មោះ ពី កាម៉ុន ភេទប្រុស អាយុ៣៤ឆ្នាំ ក៏ត្រូវបានឃាត់ខ្លួនបណ្តោះអាសន្នផងដែរ ។
ពាក់ព័ន្ធករណីនេះលោកវរៈសេនីយ៍ឯក មីន រស្មី ស្នងការរងទទួលផែនសេដ្ឋកិច្ចប្រាប់ កោះសន្តិភាព តាមទូរស័ព្ទថា មានម្ចាស់ម៉ូតូចូលខ្លួនមកអះអាងថា ម៉ូតូរបស់ខ្លួនបានប្រកាសបង់ពន្ធជាមួយសមត្ថកិច្ចគយរួចហើយឥលូវសមត្ថកិច្ចកំពុងរង់ចាំឱ្យម្ចាស់ម៉ូតូយកឯកសារពាក់ព័ន្ធនឹងការបង់ពន្ធមកបង្ហាញ ។
មជ្ឈដ្ឋានខ្លះនិយាយថា បើបង់ពន្ធម៉េចអត់មានឯកសារដាក់តាម ។ សង្ស័យណាស់ ទាល់តែចាប់បានទើបឆ្លើយដាក់គយ ។ ទាល់តែចាប់បានទើបរត់រកគយឱ្យជួយ…ព្រោះគយនៅខេត្តកោះកុងស្រួលនិយាយគ្នាណាស់ ៕
ចែករំលែកព័តមាននេះ