រាជធានីភ្នំពេញ ៖ ក្រោយពីរដ្ឋសភាបោះឆ្នោតផ្តល់សុពលភាពសមាជិកគណៈកម្មការជាតិរៀបចំការបោះឆ្នោត (គ.ជ.ប) ថ្មី និងសមាជិករដ្ឋសភាចំនួន១៦ រូបថ្មីចប់សព្វគ្រប់នៅថ្ងៃទី៧ ខែធ្នូ ឆ្នាំ២០១៧ ខាងមុខរដ្ឋសភា នឹងបើកសម័យប្រជុំពេញអង្គ ដើម្បីរៀបចំរចនាសម្ព័ន្ធក្បាលម៉ាស៊ីថ្មី។ នេះបើតាមការឲ្យដឹងពីអ្នកនាំពាក្យរដ្ឋសភាមកពីគណបក្សប្រជាជនកម្ពុជា ។
លោក ឈាង វុន អ្នកនាំពាក្យរដ្ឋសភាមកពីគណបក្សប្រជាជនកម្ពុជាបានឲ្យដឹងថារដ្ឋសភាបានកំណត់យកថ្ងៃទី៧ ខែធ្នូ ខាងមុខនេះ ដើម្បីបោះឆ្នោតផ្តល់សុពលភាពសមាជិក គ.ជ.ប ថ្មី និងប្រកាសសុពលភាពអ្នកតំណាងរាស្ត្រចំនួន១៦ផ្សេងទៀតផងដែរ ។
លោក ឈាង វុន បានថ្លែងក្រោយកិច្ចប្រជុំគណៈកម្មាធិការអចិន្ត្រៃយ៍រដ្ឋសភាព្រឹកថ្ងៃទី៥ ធ្នូ ក្រោមអធិបតីភាពសម្តេច ហេង សំរិន ប្រធានរដ្ឋសភាថា អចិន្ត្រៃយ៍បានប្រជុំលើករបៀបវារៈសំខាន់សម្រាប់ប្រជុំពេញអង្គនៅថ្ងៃទី៧ ខាងមុខនេះ។ យើងបានសម្រេច គឺថា ទី១ យើងសម្រេចនឹងមានការប្រកាសសុពលភាពបេក្ខជនអ្នកតំណាងរាស្ត្រដែល គ.ជ.ប ទើបផ្ញើមកដល់មាន១៦ រូប អ្នកដែលបានទទួលបានការបែងចែកពី គ.ជ.ប រួមនឹងសមាជិកដែលត្រូវជំនួសកន្លែងដែលសមាជិកសភាចំនួន៤រូបសុំលាលែងពីសមាជិកសភាទៅឈរឈ្មោះជាសមាជិកព្រឹទ្ធសភាមាន ៖ លោក ម៉ឹម ជំហ៊ុយ, លោក សុខ
ឥសាន, លោក ហែម ខន និងលោក អាយ ខន ។
សូមជម្រាបផងដែរ តំណាងរាស្ត្រថ្មីដែលបានស្បថនៅព្រះបរមរាជវាំងក៏បានលាលែងឈប់ដែរ ដែលគណបក្សហ៊្វុនស៊ិនប៉ិចស្នើឲ្យទៅជាអនុប្រធាន គ.ជ.ប គឺលោក នុត សុខុម ។ អ្នកនាំពាក្យដដែលបានអះអាងបញ្ជាក់ថា នៅក្នុងសម័យប្រជុំសភានឹងបោះឆ្នោតផ្តល់សេចក្តីទុកចិត្តដល់អនុប្រធាន គ.ជ.ប ១រូប និងសមាជិក គ.ជ.ប ២រូប ទាំងអ្នកតំណាងរាស្ត្រថ្មី និងសមាជិក គ.ជ.ប ថ្មីនឹងទៅស្បងនៅថ្ងៃដដែលផងដែរ ។
បើតាមការឲ្យដឹងពីលោក ឈាង វុន ថា បន្ទាប់ពីរៀបចំផ្តល់សុពលភាពអ្នកតំណាងរាស្ត្ររួចចប់គ្រប់ហើយ រដ្ឋសភានឹងរៀបចំក្បាលម៉ាស៊ីន និងរចនាសម្ព័ន្ធនៅថ្ងៃទី៨ ខែធ្នូ ឆ្នាំ២០១៧ ខាងមុខនេះផងដែរ។
សូមជម្រាបថា ការរៀបចំក្បាល់ម៉ាស៊ីនរដ្ឋសភាថ្មី និងរចនាសម្ព័ន្ធនេះ បន្ទាប់ពីរដ្ឋសភាបានប្រកាសផ្តល់សុពលភាពអ្នកតំណាងរាស្ត្រចំនួន៥៥រូបមកពីគណបក្សនយោយបានចំនួនបី ដែលមានទទួលបានអាសន្នៈរបស់អតីតគណបក្សសង្គ្រោះជាតិដែលត្រូវតុលាការកំពូលសម្រេចរំលាយចោលកាលពីថ្ងៃទី១៦ ខែ វិច្ឆិកា ឆ្នាំ២០១៧កន្លងមក ។
គណបក្សនយោបាយដែលទទួលអាសន្នៈមាន៖
– គណបក្សហ៊្វុន ស៊ិនប៉ិច ទទួលបាន៤១អាសន្នៈ
– គណបក្សខ្មែរអភិវឌ្ឍន៍សេដ្ឋកិច្ច១អាសន្នៈ
– គណបក្សសញ្ជាតិកម្ពុជា២អាសន្នៈ ។
រចនាសម្ព័ន្ធរដ្ឋសភាដែលនឹងត្រូវបានរដ្ឋសភារៀបចំនោះមានអនុប្រធានទី១ រដ្ឋសភាគឺ លោក យូ ហុកគ្រី មកពីគណបក្សហ៊្វុនស៊ិនប៉ិច ដែលពីមុនជាកន្លែងរបស់ លោក កឹម សុខា អតីតប្រធានគណបក្សសង្គ្រោះជាតិ និងប្រធានគណៈកម្មការទាំង១០ របស់រដ្ឋសភា ដែលកាលពីមុនប្រធានចំនួន៥ មកពីគណបក្សសង្គ្រោះជាតិ ប្រធាន៥មកពីគណបក្សប្រជាជនកម្ពុជា។
ចែករំលែកព័តមាននេះ