រាជធានីភ្នំពេញ ៖ ធៀបនឹងការប្រកួតរបស់កីឡាករជើងខ្លាំងចាស់វស្សានៅលើសង្វៀន គេកត់សម្គាល់ថា កីឡាករវ័យក្មេង២រូប គឺបង្គោលក្រហម សុខុន រីហ្គាវុត្ថា មកពីក្លិបកុមារទេពមានរិទ្ធិ និងកីឡាករ…
រាជធានីភ្នំពេញ ៖ ធៀបនឹងការប្រកួតរបស់កីឡាករជើងខ្លាំងចាស់វស្សានៅលើសង្វៀន
គេកត់សម្គាល់ថា កីឡាករវ័យក្មេង២រូប គឺបង្គោលក្រហម សុខុន រីហ្គាវុត្ថា មកពីក្លិបកុមារទេពមានរិទ្ធិ និងកីឡាករ អំ ខេម មកពីក្លិបអរុណរះកីឡា គឺមានសកម្មភាពវាយប្រកួតមិនណយនោះទេ បើទោះជាអ្នកទាំងពីរជាកីឡាករថ្មីសន្លាងក៏ពិតមែន ។ អ្វីដែលគួរឱ្យកត់សម្គាល់នោះគឺគេជាកីឡាករផ្នែកប្រដាល់សាកល ហើយមានសមត្ថភាពប្រកួតខ្លាំង ដែលអ្នកណាៗក៏មើលឃើញថាពិតជាមិនពិបាកក្នុងការក្លាយខ្លួនជាធន
ធានកីឡាករសម្រាប់ស្វាគមន៍ព្រឹត្តិការណ៍ស៊ីហ្គេមធំៗនោះទេ ជាពិសេសគឺស៊ីហ្គេមដែលកម្ពុជាធ្វើជាម្ចាស់ផ្ទះ។
ការប្រកួតកាលពីយប់ថ្ងៃទី៣ ធ្នូ នៅលើសង្វៀនទូរទស្សន៍អាស៊ីអាគ្នេយ៍នោះ អ្នកទស្សនាមិនខ្វល់ថា កីឡាករទាំងពីរខាងលើបានឡើងសង្វៀនណាខ្លះពីមុនមកទេ ប៉ុន្តែបានចាត់ទុកថាពួកគេជាកីឡាករថ្មីសន្លាងដែលអ្នកគាំទ្របានជួបហើយសរសើរថា វាយលុកដាក់គ្នាបានល្អ។ ការប្រកួតរបស់ពួកគេត្រឹមតែ៤ទឹកប៉ុណ្ណោះ ដ្បិតថាពួកគេឡើងប្រកួតគ្នាក្នុងវគ្គបើកឆាកនាល្ងាចថ្ងៃនោះ តែទទួលបានការចាប់អារម្មណ៍ខ្លាំងជាងគូឯកនោះផង ជាពិសេសគឺសម្រែកហ៊ោកញ្ជ្រៀវ និងការអបអរសាទរ ។
សំឡេងហ៊ោកញ្ជ្រៀវបានកើតមានឡើងខ្ទរសង្វៀនប្រដាល់នាថ្ងៃនោះផងដែលអាចនិយាយបានថាកីឡាករថ្មីសន្លាងមួយគូនេះឡូយផងគេ ព្រោះធ្វើឱ្យអ្នកអង្គុយទស្សនាដកកចំហមាត់ចង់ដឹងពីលទ្ធផលគ្រប់គ្នា ដោយសារតែពួកគេទាំងពីរប្រកួតគ្នាយ៉ាងស្វិតស្វាញពេញរយៈ៤ទឹកដែលបានកំណត់សម្រាប់ការប្រកួតប្រដាល់សាកលនៅលើសង្វៀន ។ កីឡាករទាំងពីរថ្វីបើទើបតែឈានដល់ដំណាក់កាលទើបបណ្ដុះបានបន្តិច ប៉ុន្តែសមត្ថភាពរបស់គេគឺគួរឱ្យសរសើរ ។ ម្នាក់ៗនិយាយថា មិនទាន់ប្រកួតបានច្រើនលើកផងទទួលបានការចាប់អារម្មណ៍បានច្រើនដល់ម្លឹង ទម្រាំប្រកួតបានច្រើនលើកនៅលើសង្វៀនទៀត តើនឹងល្អកម្រិតណា ។ អ្នកទាំងពីរក៏ស្ថិតក្នុងវ័យត្រូវតំណាងឱ្យកម្ពុជាក្នុងពេលកម្ពុជាធ្វើជាម្ចាស់ផ្ទះក្នុងព្រឹត្តិការណ៍ស៊ីហ្គេមឆ្នាំ២០២៣ នាពេលខាងមុខផងដែរ ។
លោក ញាន សុធី អ្នករៀបចំការប្រកួតបានអះអាងថា ការប្រដាល់នៅល្ងាចថ្ងៃអាទិត្យនោះ គឺជាការប្រដាល់អន្តរជាតិពេលយប់ដែលក្នុងព្រឹត្តិការណ៍នេះ មានការដណ្ដើមពិន្ទុគ្នារវាងកីឡាករកម្ពុជា និងកីឡាករថៃ តែនៅក្នុងព្រឹត្តិការណ៍នោះក៏បានបញ្ជ្រៀតកីឡាករវ័យក្មេងល្អៗជាពិសេសកីឡាករទាំង២នៅក្នុងវិស័យប្រដាល់សាកលផងដែរ ដើម្បីបណ្ដុះអ្នកទាំងនោះឱ្យមានគេចាប់អារម្មណ៍ និងដើម្បីឱ្យកីឡាករថ្មីៗកាន់តែមានកម្លាំងចិត្តក្នុងការប្រឹងប្រែង ។ លោកថា ការប្រកួតកាលពីថ្ងៃអាទិត្យនោះ គឺជាការប្រកួតបើកឆាកខែថ្មីរបស់ព្រឹត្តិការណ៍ប្រដាល់់ពេលយប់ ដែលក្រៅពីបានដាក់បញ្ចូលកីឡាករល្អៗទាំងកម្ពុជា និងបរទេស លោកក៏បានដាក់ប្រជ្រៀតការប្រកួតសម្រាប់កីឡាករប្រដាល់សាកលផងដែរ ដោយសារតែលោកមានបំណងចង់លើកស្ទួយវិស័យកីឡាមួយនេះឱ្យទទួលបានជោគជ័យ និងការចាប់អារម្មណ៍ក្នុងស្រទាប់មហាជន ។ លោកចង់ដាក់កីឡាករប្រដាល់សាកលឱ្យបានជាប់លាប់ ប៉ុន្តែពេលខ្លះកីឡាករទាំងនោះមិនគ្រប់គ្រាន់សម្រាប់ឱ្យលោកធ្វើការផ្គូផ្គងនោះទេ ទើបក្នុងពេលខ្លះក៏មានគូប្រកួតប្រដាល់សាកលហើយពេលខ្លះគឺមិនមាន ។ លោកថា ឱ្យតែមានកីឡាករណាទទួលប្រកួត គឺលោកកំណត់ដាក់ភ្លាម ហើយលោកនឹងសម្រេចរៀបចំឱ្យប្រកួតតែក្នុងពេលយប់ប៉ុណ្ណោះ ដោយសារតែក្នុងម៉ោងនោះគឺមានអ្នកទស្សនានៅតាមគេហដ្ឋានច្រើន ហើយបើនិយាយពីមន្ត្រីសហព័ន្ធគឺតាមដានច្រើនជាងគេនៅក្នុងម៉ោងនោះ ។
លោកថា ការប្រដាល់នាពេលកន្លងមកទូរទស្សន៍អាស៊ីអាគ្នេយ៍ មិនដែលភ្លេចពីការបញ្ចូលគ្នារវាងកីឡាករស្រករមុន និងកីឡាករស្រករក្រោយនោះទេ គឺរមែងដាក់មួយគូៗយ៉ាងតិចឱ្យមហាជនបានឃើញដោយគ្រាន់តែវត្តមានរបស់កីឡាករទាំងនោះហាក់មិនសូវទាក់ទាញចំណាប់អារម្មណ៍របស់អ្នកស្នេហាវិស័យប្រដាល់បានច្រើន ។ លោកបានកោតសរសើរចំពោះវត្តមានកីឡាករ សុខុន រីហ្គាវុត្ថា និង អំ ខេម ដោយបានទាំងចាត់ទុកថាកីឡាករទាំងពីរប្រើអស់សមត្ថភាពធ្វើឱ្យលោកដែលជាអ្នករៀបចំក៏មានកម្លាំងចិត្តក្នុងការផ្គូផ្គង និងផ្ដល់ឱកាសឱ្យសម្រាប់កម្មវិធីបន្តបន្ទាប់នោះផង ។ លោកថា ការប្រកួតនៅក្នុងថ្ងៃនោះ សម្រាប់គូប្រកួតដែលជាគូពិសេស ឬគូឯក មិនប្រាកដថាទទួលបានការចាប់អារម្មណ៍ខ្លាំងជាងគូរបស់អ្នកទាំងពីរនោះទេ ដោយសារតែពេញរយៈពេល៤ទឹក គឺកីឡាករប្រដាល់សាកលទាំងពីរប្រឹងប្រែងប្រកួតបានល្អមិនគួរឱ្យជឿ ។
លោក ញាណ សុធី បន្តថា ការប្រកួតរបស់កីឡាករវ័យក្មេងដែលជាការប្រកួតបើកឆាកនោះ ទម្រាំបង្គោលខៀវ អំ ខេម យកឈ្នះដោយពិន្ទុបាន គឺកីឡាកររូបនេះទ្រមខ្លួនយ៉ាងខ្លាំង ក្នុងពេលដែលកីឡាករម្ខាងទៀតក៏ត្រដាបត្រដួស។ កីឡាករទាំងពីរនេះលោកថា បើអាចឈានដល់ឡើងប្រកួតគូឯក ឬប្រកួតជាគូអន្តរជាតិគឺពិតជាឆាប់មានការចាប់អារម្មណ៍ ។ ប៉ុន្តែលោកថា នៅមិនទាន់ហ៊ានដាក់ឱ្យប្រកួតទេ ដោយសារតែមើលទៅម្នាក់ៗក្មេងខ្ចីពេក ហើយបើនិយាយពីសមត្ថភាពក៏នៅស្ទើរ ។ ពួកគេអាចប្រកួតគ្នាក្នុងរង្វង់កីឡាករក្មេងៗដូចគ្នាល្អមើល ប៉ុន្តែបើដាក់ឱ្យប្រកួតជាមួយអ្នកល្បី គឺពិតជាទៅមិនរួចទេ គឺលុះត្រាតែបន្តសន្សំបច្ចេកទេស និងបទពិសោធន៍ច្រើនទៀត ។ លោកអះអាងថា កីឡាករក្មេងៗកាន់តែមានសមត្ថភាព ជាពិសេសក្នុងពេលគេហ្វឹកហាត់ជាប់លាប់ ។ ប៉ុន្តែលោកថា កីឡាករកម្ពុជាគឺល្អតែកីឡាករដែលទើបតែចង់ល្បីឈ្មោះនិងចង់ឱ្យមានការផ្គូផ្គងឱ្យបានច្រើនដូចជាកីឡាករវ័យក្មេងទាំង២ប៉ុណ្ណោះ បើឈានដល់ការលើកស្ទួយឱ្យល្បីបានបន្តិច គឺច្រើនតែធ្លាក់ដៃ ដោយសារតែទី១គេមិនសូវចង់វ៉ៃដោយស្វាហាប់ដូចមុន និងអាចបណ្ដាលមកពីគេមានឱកាសទទួលបានការងារមួយផ្សេងដែលមិនសូវចង់សកម្មដូចមុន។
លោកថា កីឡាករកម្ពុជាបើមានឆន្ទៈដូចពេលទើបនឹងបានឡើងប្រកួតដំបូងៗ គឺពួកគេម្នាក់ៗពិតជាមានសមត្ថភាពមិនចាញ់កីឡាករបរទេសនោះទេ ជាពិសេសកណ្ដាប់ដៃ និងភាពរហ័សរហួន ប៉ុន្តែភាគច្រើនគឺប្រឹងតែពេលចង់ល្បី និងចង់បានលុយ ហើយលទ្ធផលចុងក្រោយក៏មិនខុសពីកីឡាករដែលមានឈ្មោះបោះសំឡេងមួយចំនួនទើបអ្វីៗហាក់មិនសូវល្អប្រសើរ។
ទោះបីយ៉ាងណាលោកថា សម្រាប់កីឡាករទាំងពីរនឹងក្លាយជាធនធានល្អសម្រាប់កម្ពុជា ដោយសារតែគេដ្បិតថាវ័យក្មេង និងមានសមត្ថភាពខ្ពស់ ប៉ុន្តែគេបានចូលប្រឡូកក្នុងអាជីពប្រដាល់សាកលមិនប្រកួតផ្នែកសេរីដូចគេ ដែលងាយស្រួលបំផុតក្នុងការទទួលបានទីផ្សារនៅពេលកម្ពុជាត្រូវការកីឡាករប្រដាល់សាកលទៅប្រកួតនៅក្រៅប្រទេស ជាពិសេសគឺពេលកម្ពុជាធ្វើជាម្ចាស់ផ្ទះស៊ីហ្គេមក្នុងឆ្នាំ២០២៣ ៕
ចែករំលែកព័តមាននេះ