ខេត្តកំពង់ស្ពឺ ៖ បុរសម្នាក់ត្រូវបានប្រធានតុលាការកំពង់ស្ពឺ ចេញដីកាបង្គាប់ឲ្យសមត្ថកិច្ចចាប់ខ្លួន ។ នៅក្នុងដីកាចាប់ខ្លួនដែលចុះហត្ថលេខាដោយប្រធានសាលាដំបូងនោះ មិនបានបញ្ជាក់ពីអត្តសញ្ញាណម្ចាស់បណ្តឹងឡើយ ដោយចោទប្រកាន់ពីបទផ្ដើមគំនិតរំលោភបំពានលើអចលនទ្រព្យរបស់អ្នកដទៃ ។
យោងតាមរបាយការណ៍របស់កងរាជអាវុធហត្ថបានឲ្យដឹងថា កាលពីវេលាម៉ោង១១និង៣០នាទី ថ្ងៃ០៤ ខែធ្នូ ឆ្នាំ២០១៧ នៅផ្ទះលេខ២៩៣D ផ្លូវលេខ១៥០ ភូមិ១១ សង្កាត់ទឹកល្អក់២ ខណ្ឌទួលគោក រាជធានីភ្នំពេញ ។ ការឃាត់ខ្លួនជនសង្ស័យខាងលើធ្វើឡើងដោយមានកម្លាំងអាវុធហត្ថលើផ្ទៃប្រទេស និងកម្លាំងអាវុធហត្ថមូលដ្ឋានខណ្ឌទួលគោក បានសហការជាមួយអាវុធហត្ថខេត្តកំពង់ស្ពឺ ។ ជនសង្ស័យឈ្មោះ អ៊ុក វិច្ឆិកា ភេទប្រុស អាយុ៣៦ឆ្នាំ មានទីលំនៅសព្វថ្ងៃផ្ទះលេខ២៩៣D ផ្លូវលេខ១៥០ ភូមិ១១ សង្កាត់ទឹកល្អក់២ ខណ្ឌទួលគោក រាជធានីភ្នំពេញ ។ ជនសង្ស័យត្រូវបានចាប់ខ្លួនដោយយោងតាមអំណាចដីកាបង្គាប់ឲ្យចាប់ខ្លួន លេខ៤៨១ ចុះថ្ងៃទី២៤ ខែវិច្ឆិកា ឆ្នាំ២០១៧ របស់ចៅក្រមស៊ើបសួរ ហង់ ស៊ីថា ប្រធានសាលាដំបូងខេត្តកំពង់ស្ពឺ ពីបទផ្តើមគំនិតក្នុងអំពើរំលោភកាន់កាប់លើអចលវត្ថុ កាលពីថ្ងៃទី២៧ ខែមករា ឆ្នាំ២០១៧ នៅចំណុចភូមិទី០៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។ ក្រោយឃាត់ខ្លួន កម្លាំងអាវុធហត្ថខណ្ឌទួលគោក បានប្រគល់ជនសង្ស័យខាងលើមកឲ្យមកខាងអាវុធហត្ថខេត្តកំពង់ស្ពឺ ដើម្បីបន្តទៅតាមនីតិវិធី ។
បច្ចុប្បន្ន ជនសង្ស័យខាងលើសមត្ថកិច្ចបាននាំខ្លួនមកកាន់មូលដា្ននកងរាជអាវុធហត្ថខេត្ត ដើម្បីប្រគល់ជូនសាលាដំបូងខេត្ត អនុវត្តនីតិវិធីបន្តតាមផ្លូវច្បាប់ ៕
ចែករំលែកព័តមាននេះ