នាងគ្រីស្ទីណា អាគីឡឺរ៉ា ជាតារាភាពយន្ត និងជាតារាចម្រៀងប៉ុបល្បីឈ្មោះរបស់អាេមរិក កាលពីល្ងាចថ្ងៃទី១ មីនា កន្លងមក បានជួបបញ្ហាធ្ងន់ធ្ងរមួយ ដោយនាងត្រូវចាប់ខ្លួន ហើយឃុំខ្លួន ក្រោយពីបុរសម្នាក់ដែលគេជឿថា ជាប្រុសស្នេហ៍របស់នាងត្រូវចាប់ខ្លួនពីបទសង្ស័យបើករថយន្តក្រោមឥទ្ធិពលនៃគ្រឿងស្រវឹង។ នាងគ្រីស្ទីណា ត្រូវបានចាប់ខ្លួននៅក្នុងទីក្រុងហូលីវូដខាងលិច នៅពេលនាងកំពុងជិះរថយន្តជាមួយបុរសម្នាក់ដែលគេជឿថា ជាប្រុសស្នេហ៍របស់នាងនោះ ។
អាជ្ញាធរក្រុងហូលីវូដខាងលិចនិយាយថា
នាងគ្រីស្ទីណា ត្រូវចាប់ខ្លួន ហើយឃុំខ្លួនដើម្បីធានាសុវត្ថិភាពសម្រាប់នាង ពីព្រោះពេលនោះនាងហាក់ដូចជាស្រវឹងមិនអាចគ្រប់គ្រងខ្លួនឯងបាន ។
អ្នកបើកបររថយន្តនោះឈ្មោះ Matthew Rutler ត្រូវសង្ស័យថា បើករថយន្តក្រោមឥទ្ធិពលនៃគ្រឿងស្រវឹង ហើយក៏ត្រូវបានចាប់ខ្លួនតែម្តង ។
តាមប្រភពព័ត៌មានថា នាងគ្រីស្ទីណា ប្រហែលជាត្រូវគេបញ្ច្រកស្រារហូតស្រវឹងលែងគ្រប់គ្រងខ្លួនឯងបាន ប៉ុន្តែនាងមិនបានប្រព្រឹត្តអំពើឆ្គាំឆ្គងអ្វីទេ ។ នាងត្រូវចាប់ខ្លួន ប៉ុន្តែមិនរងការចោទប្រកាន់ឡើយ ហើយត្រូវបានដោះលែងវិញ ក្រោយពីត្រូវឃុំខ្លួនក្នុងពន្ធនាគាររយៈពេលប៉ុន្មានម៉ោង និងក្រោយពីការធ្វើតេស្តមើលជាតិអាល់កុលក្នុងខ្លួននាងរួចមក ។
នាងគ្រីស្ទីណា តារាចម្រៀងប៉ុបមានសម្រស់ស្រស់ស្អាតគួរឱ្យទាក់ទាញ ពិសេសបបូរមាត់របស់នាង ៕
ចែករំលែកព័តមាននេះ