រាជធានីភ្នំពេញ ៖ មានការចាប់អារម្មណ៍ទៀតហើយ បន្ទាប់ពីកីឡាករ អ៊ុំ វណ្ណេត ស្រាប់តែអាចបំបាក់គូប្រកួតដែលជាជើងខ្លាំងឱ្យធ្លាក់ហាលអាវ ហើយអាចដណ្ដើមកៅអី៤នាក់ចុងក្រោយ ដែលជាកៅអីសំខាន់នៅប៉ុស្ដិ៍លេខ៥ ដោយសារតែកីឡាករដែលមានសំណាងបានឡើងទៅកាន់វគ្គ៤នាក់ ឬហៅវគ្គពាក់កណ្ដាលផ្ដាច់ព្រ័ត្រនឹងមានឱកាសដណ្ដើមបានពានមួយក្នុងចំណោមពានពីលេខ១ដល់លេខ៤ហើយ បើទោះជាការប្រកួតរបស់គេមិនទទួលបានជោគជ័យបន្តទៀតក្តី ។ អ្វីដែលកីឡាកររូបនេះទទួលបានការកោតសរសើរទៀតនោះ គឺគេអាចបំបាក់គូប្រកួតឱ្យសន្លប់ស្ដូកមុនចប់ទឹកទី៣ ដែលជាជ័យជម្នះយ៉ាងកម្រក្នុងវគ្គដ៏ស្វិតស្វាញនេះ។
ការប្រកួតនៅសង្វៀនព្រែកកំពិស កាលពីថ្ងៃទី២ ធ្នូ នោះ កីឡាករ វ៉ែន ហុងជីវ៉ុង ដែលត្រូវគេស្គាល់ថាជាជើងខ្លាំងនៅក្នុងព្រឹត្តិការណ៍ ជាពិសេសបន្ទាប់ពីគេបានផ្ដួលជើងខ្លាំងក្នុងវគ្គ៣២នាក់ និងក្នុងវគ្គ១៦នាក់ ហើយបានមកឈរក្នុងវគ្គ៨ ។ ម្នាក់ៗមានការរំពឹងយ៉ាងខ្លាំងថា ការប្រកួតដណ្ដើមយកកៅអី៤នាក់មិនមែនជារឿងលំបាកណាស់ណាសម្រាប់វ៉ែន ហុងជីវ៉ុង នោះទេ ដោយសារតែគេជាកីឡាករដែលមានថ្វីដៃម្នាក់ចាប់តាំងពីបានឆ្លងផុតក្នុងវគ្គនីមួយៗ ។
អ្នកគាំទ្រស្ទើរពាក់កណ្ដាលបានបង្ហាញអារម្មណ៍ខកចិត្តក្នុងពេលដែលលោកជាជើងខ្លាំងម្នាក់ ប៉ុន្តែចុងក្រោយបែរជាធ្វើមិនបានល្អដូចការចង់បាន ទើបការប្រកួតរបស់គេបានត្រឹមតែទឹកទី៣ក៏ឈានដល់ការបោះបង់ ហើយធ្វើឱ្យគេបាត់បង់ឱកាសឈានឡើងក្នុងវគ្គ៤នាក់ ។
កីឡាករ វ៉ែន ហុងជីវ៉ុង បានទទួលស្គាល់ថា ហេតុផលនៃការបោះបង់គឺបណ្ដាលមកពីលោកមានរបួសក្នុងការប្រកួតកាលពីលើកមុនមិនទាន់ជាស្រួលបួល ហើយម្យ៉ាងមកពីលោកភ្លាត់ឱ្យត្រូវរបួសត្រង់កន្លែងចាស់ផង ទើបលោកចាប់ផ្ដើមមានអាការឈឺចាប់ហើយប្រកួតបន្តអត់បាន ។ លោកបានបញ្ជាក់ក្រោយការបោះបង់ការប្រកួតក្នុងទឹកទី៣នាថ្ងៃនោះថា លោកសម្រេចចិត្តមិនបន្តការប្រកួត គឺបន្ទាប់ពីត្រូវកីឡាករ អ៊ុំ វណ្ណេត ទាត់ត្រូវជើងដែលជាកន្លែងរបួសចាស់ ពេលលោកប្រឹងប្រកួតយកកៅអីក្នុងវគ្គ៨នាក់ខ្លាំងពេក ។ លោកថា ការប្រកួតកាលពីថ្ងៃទី២ ធ្នូ លោកក៏បានប្រឹងប្រែងតស៊ូមិនតិចដែរ ប៉ុន្តែក្នុងពេលប្រយុទ្ធតបតជាមួយគូប្រកួត ធ្វើឱ្យលោកពិបាកទ្រាំដោយសារតែត្រូវត្រង់កន្លែងរបួសចាស់ដែលមិនទាន់ជាសះស្រួលបួល ។
លោកក៏មើលឃើញថា បើទោះជានៅប្រកួតបន្តក៏នៅតែមានបញ្ហាចាញ់ប្រៀប ទើបលោកយល់ថា មានតែការបោះបង់ទេទើបអាចដោះស្រាយបញ្ហាបាន២យ៉ាង ទី១គឺការពារមុខរបួសកុំឱ្យកាន់តែមានសភាពប៉ះពាល់ និងទី២ដើម្បីកុំឱ្យមានចំណុចរបួសត្រង់កន្លែងថ្មី ដែលធ្វើឱ្យលោកប៉ះពាល់សម្រាប់ការប្រកួតក្រោយៗ បើគង់តែមិនឈ្នះដដែល ។ លោកថា ការប្រកួតលោកភ្លាត់ឱ្យចាញ់ប្រៀបច្រើននៅទឹកទី២ ហើយបណ្ដាលមកពីលោកស្ទុះស្ទាវាយលុក ក្នុងទឹក៣ក៏ចូលមិនចុះ និងមានបញ្ហាឈឺកន្លែងរបួសចាស់ផង គឺមានតែសម្រេចចិត្តបោះបង់។ លោកថា ការប្រកួតនៅប៉ុស្ដិ៍លេខ៥ មិនមានការប្រកួតក្នុងវគ្គណាមួយដែលលោកបានឡើងដោយមិនមានរបួសជាប់ខ្លួននោះទេ ដោយសារតែគូប្រកួតដែលលោកប៉ះជាមួយតាំងពីវគ្គ៣២នាក់ជម្រុះយក១៦នាក់ និងវគ្គ១៦នាក់ជម្រុះយក៨នាក់ សុទ្ធតែធ្វើឱ្យលោកមានរបួស ហើយជារបួសដែលខ្ទាំឆ្អឹងមិនអាចព្យាបាលបួនដប់ថ្ងៃបានជាទេ ។ ជាក់ស្ដែងកាលពីវគ្គមុននេះលោកត្រូវប្រថុយជីវិតដោយសាររបួសជាប់ខ្លួនតែម្ដង ទម្រាំបានជាប់ឆ្លងផុតវគ្គ១៦នាក់ ដែលជាវគ្គប្រជុំសុទ្ធតែជាជើងខ្លាំងនោះ ។ ទោះបីយ៉ាងណា លោកបង្ហាញអារម្មណ៍ខកចិត្តដែលលោកប្រឹងប្រែងទទួលជោគជ័យជាច្រើនដំណាក់កាលមកហើយ ប៉ុន្តែចុងក្រោយបែរជាត្រូវបរាជ័យក្នុងវគ្គដែលលោកមានឱកាសក្លាយជាម្ចាស់ជើងឯកបែបនេះទៅវិញ ។
កីឡាករ អ៊ុំ វណ្ណេត ដែលបានឡើងអង្គុយកៅអី៤នាក់នៅក្នុងព្រឹត្តិការណ៍នោះ បានអះ
អាងថា លោកកាន់តែមានក្ដីសង្ឃឹមសម្រាប់ឱកាសកាន់ពាននៅប៉ុស្ដិ៍លេខ៥ ប៉ុន្តែលោកក៏ត្រូវរង់ចាំអ៊ុតមើលការប្រកួតរបស់កីឡាករ គឹម វាសនា ដែលបានឡើងអង្គុយកៅអីក្នុងវគ្គនោះជាមួយខ្លួនដែរ ។ យោងតាមរូបមន្ត កីឡាករអ៊ុំ វណ្ណេត ត្រូវប្រកួតចំនួន២លើកទៀត ដោយការប្រកួតមួយលើកទៀតសម្រាប់ដណ្ដើមយកកៅអីទៅកាន់វគ្គ២នាក់ចុងក្រោយ ប៉ុន្តែបើទោះជាការបរាជ័យនៅក្នុងវគ្គក្រោយក៏មិនធ្លាក់ហាលអាវនោះដែរ គឺនៅតែមានឱកាសបន្តការប្រកួត១លើកចុងក្រោយ ដោយគ្រាន់តែបើធ្លាក់គឺបាត់សំណាងប្រកួតយកលេខ១ ហើយធ្លាក់ទៅប្រកួតយកលេខ៣ជាមួយនឹងកីឡាករដែលប្រកួតចាញ់ដូចគ្នាក្នុងវគ្គពាក់កណ្ដាលផ្ដាច់ព្រ័ត្រប៉ុណ្ណោះ ។
លោកថា ការប្រកួតក្នុងវគ្គ១ភាគ៤ លោកក៏នៅតែមានសង្ឃឹមច្រើនដែរ បើទោះជាកីឡាករ គឹម វាសនា ដែលបានឡើងទៅអង្គុយកៅអី៤នាក់ជាមួយលោកនៅក្នុងថ្ងៃនោះក៏ខ្លាំងមិនធម្មតាក្ដី ។ លោកប្រកាសហ្វឹកហាត់ត្រៀមខ្លួនឱ្យបានពេញលេញ ដោយសារតែការប្រកួតជើងឯកនៅប៉ុស្ដិ៍លេខ៥ គឺជាក្ដីស្រមៃដ៏ធំមួយសម្រាប់អាជីព ដើម្បីឱ្យលោកទទួលបានប្រាក់លានផង និងកាន់តែមានកេរ្តិ៍ឈ្មោះបោះសំឡេងនៅក្នុងពិភពប្រដាល់ផង ។ ដោយឡែកសម្រាប់កីឡាករមួយរូបទៀត គឺ គឹម វាសនា ដែលឈ្នះការប្រកួតនៅថ្ងៃនោះដែរក៏បានបង្ហាញឆន្ទះមិនខុសគ្នានោះដែរ បន្ទាប់ពីគេក៏មានសំណាងវាយឱ្យកីឡាករសំអាង ឌុន បោះបង់ការប្រកួតក្នុងទឹកទី២ដែរ ៕
ចែករំលែកព័តមាននេះ