រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាថ្លែងនៅក្នុងសន្និសីទសារព័ត៌មានថ្ងៃទី ៤ ធ្នូនេះថា ប្រទេសទាំងពីរបានឯកភាពគ្នា ជ្រើសរើសផ្លូវនៅទីក្រុងភ្នំពេញ និងនៅទីក្រុងដាកា ប្រទេសបង់ក្លាដេស ដើម្បីដាក់ព្រះនាមរបស់ព្រះបិតាជាតិរបស់កម្ពុជា និងបិតាជាតិរបស់បង់ក្លាដេស ដែលនេះជានិម្មិតរូបនៃសាមគ្គីភាពរវាងប្រទេសទាំងពីរ។
សម្តេចតេជោបានបង្ហាញនូវការអរគុណចំពោះលោក សេក្ខ ហាស៊ីណា (Sheikh Hasina) នាយករដ្ឋមន្ត្រីនៃសាធារណរដ្ឋប្រជាមានិតបង់ក្លាដេស ដែលសម្តេចហៅថា ជា «បងស្រី» នូវការគាំទ្រទាំងឡាយដែលបង់ក្លាដេសបានផ្តល់ចំពោះប្រជាជនកម្ពុជាក្នុងរយ:ពេលកន្លងទៅ។
សម្តេចបានបន្តថា ៖ «តាមរយៈទំនាក់ទំនងរវាងប្រទេសនិងប្រទេស និងទំនាក់ទំនងរវាងភាពស្នឹទ្ធស្នាលរវាងលោកជំទាវជាមួយនឹងខ្ញុំ យើងក៏បានរួមចំណែកទៅដល់ការបង្កើននូវទំនាក់ទំនងនេះ។ នៅក្នុងកិច្ចពិភាក្សារបស់យើង គឺពោរពេញទៅដោយលទ្ធផលដែលខ្ញុំចាត់ទុកថា ជាផ្នែកដ៏សំខាន់ដែលយើងត្រូវបន្តរួមសំណើរជាមួយគ្នាក្នុងឋានៈជាប្រទេសកំពុងអភិវឌ្ឍន៍។ កម្ពុជាបានផ្តល់នូវការគាំទ្រភ្លាមៗជាមួយនឹងសំណូមពររបស់បង់ក្លាដេសនៅក្នុងការរៀបចំបង្កើតឲ្យក្លាយទៅជាដៃគូសន្ទនាតាមវិស័យរបស់អាស៊ាន ហើយកម្ពុជានឹងបន្តធ្វើការជាមួយនឹងដៃគូរអាស៊ាន ដើម្បីសម្រេចទៅដល់ការព្រមព្រៀងនោះ»។
កម្ពុជាក៏បានផ្តល់នូវការគាំទ្រជាមួយនឹងភាពជាដៃគូរនៅក្នុងគង្គាមេគង្គ គង្គាហើយខ្ញុំនឹងធ្វើកិច្ចការងារនេះជាមួយនឹងនាយករដ្ឋមន្ត្រីឥណ្ឌានៅខែមករា ឆ្នាំក្រោយ ព្រមទាំងធ្វើកិច្ចការងារនេះជាមួយដៃគូក្នុងមេគង្គដែរ ដើម្បីឲ្យបង់ក្លាដេសមានលទ្ធភាពចូលរួមនៅក្នុងក្របខណ្ឌភាពជាដៃគូរវាងមេគង្គ គង្គា។
យើងក៏មិនបានភ្លេចក្នុងការពិភាក្សាទាក់ទងជាមួយជនភៀសខ្លួនយ៉ាងច្រើនសន្ធឹកសន្ធាប់ដែលជាបន្ទុកដ៏ធ្ងន់ធ្ងររបស់បង់ក្លាដេស។ ហើយយើងសូមវាយតម្លៃខ្ពស់ចំពោះបង់ក្លាដេស បើទោះបីប្រជាជនមានទៅដល់រហូត១៦០លាននាក់ក៏ត្រូវទទួលចិញ្ចឹមប្រជាជនប្រមាណ១លាននាក់ថែមទៀត ដែលចេញពីមីយ៉ាន់ម៉ា។ នេះយើងក៏ពិចារណារួមគ្នាលើកិច្ចការខិតខំធ្វើឲ្យមានឡើងនូវមាតុភូមិនិវត្តន៍ ហើយសង្ឃឹមថា ភាគីទាំងពីរបង់ក្លាដេស និងមីយ៉ាន់ម៉ា រកឃើញនូវដំណោះស្រាយដែលអាចឲ្យប្រជាជនវិលត្រឡប់ទៅកាន់មាតុភូមិវិញ។ខ្ញុំសូមអរគុណចំពោះលោកជំទាវដែលបានអញ្ជើញខ្ញុំទស្សនកិច្ចនៅបង់ក្លាដេសសារជាថ្មីម្តងទៀត ខ្ញុំសូមទទួលយកនូវការអញ្ជើញដោយការពេញចិត្ត៕
ចែករំលែកព័តមាននេះ