ខេត្តតាកែវ ៖ កាលពីថ្មីៗកន្លងទៅនេះ ក្រុមត្រួតពិនិត្យប្រេងឥន្ធនៈរបស់អគ្គនាយកដ្ឋានកាំកុងត្រូលនៃក្រសួងពាណិជ្ជកម្ម តាមរយៈរថយន្តមន្ទីរពិសោធន៍ប្រេងឥន្ធនៈចល័តដឹកនាំដោយលោក ឌឹម ថេង អគ្គនាយករងនៃអគ្គនាយកដ្ឋានកាំកុងត្រូល លោក គឿន ភិរុណ ជាអនុប្រធាន នាយកដ្ឋាន សហការជាមួយមន្ត្រីជំនាញរបស់មន្ទីរពិសោធន៍ និងមន្ទីរពាណិជ្ជកម្មខេត្ត បានចុះត្រួតពិនិត្យបរិមាណ និងគុណភាពប្រេងឥន្ធនៈនៅតាមស្ថានីយ និងដេប៉ូមួយចំនួនដែលមានទីតាំងនៅស្រុកបាទី និងស្រុកសំរោង ខេត្តតាកែវ ក្នុងគោលបំណងការពារផលប្រយោជន៍សេដ្ឋកិច្ចអ្នកប្រើប្រាស់ ការពារគ្រឿងម៉ាស៊ីននៃយានជំនិះគ្រប់ប្រភេទ និងការពារបរិស្ថានដែលកើតចេញពីចំហេះប្រេងឥន្ធនៈមិនសមស្រប និងពិសេសដើម្បីទប់ស្កាត់ការកែ្លងបន្លំ ។
លោក ឌឹម ថេង អគ្គនាយករងនៃអគ្គនាយកដ្ឋានកាំកុងត្រូល ដែលបានដឹកនាំក្រុមត្រួតពិនិត្យប្រេងឥន្ទនៈបានថ្លែងឲ្យដឹងថា ជាលទ្ធផលនៃការត្រួតពិនិត្យគុណភាព និងបរិមាណប្រេងឥន្ធនៈរបស់ស្ថានីយក្រុមហ៊ុន និងដេប៉ូទាំង១០កន្លែងនៅទីតាំងខាងលើនេះគឺមាន ស្ថានីយ និងដេប៉ូប្រេងឥន្ធនៈមួយចំនួនធំ លក់សាំងរបស់ខ្លួនពុំគ្រប់លីត្រនោះឡើយ លើសពីនោះស្ថានីយក្រុមហ៊ុន និងដេប៉ូទាំងនោះថែមទាំងបានលក់ប្រេងធម្មតា (Regular) ថាជាប្រេងស៊ុបពែរ (Super) ទៅអ្នកប្រើប្រាស់ ដែលជាការក្លែងបន្លំអតិថិជន។ មន្ត្រីកាំកុងត្រូលខេត្តតាកែវម្នាក់បានឱ្យដឹងថា ជាលទ្ធផលនែការចុះត្រួតពិនិត្យស្ថានីយលក់ប្រេងខាងលើនេះ ក្រុមជំនាញបានត្រួតពិនិត្យនៅស្ថានីយប្រេង១មករារបស់លោកអ៊ុង ជាកុក ដែលមានទីតាំងនៅតាមបណ្តោយផ្លូវជាតិលេខ២ ភូមិថ្នល់បែកសង្កាត់រកាក្រៅ ក្រុងដូនកែវនេះរកឃើញថា បានកេងបន្លំលីត្រដោយចាក់សាំងជូនអតិថិជនមិនគ្រប់លីត្រដោយចាក់ប្រេង១០លីត្របានតែ៨លីត្រចុច២តែប៉ុណ្ណោះ បើចាក់១០០លីត្រគឺសុីអស់៨លីត្របានតែ៩២លីត្រ ហើយទង្វើនេះគាត់ធ្វើមកលើអតិថិជនរាប់សិបឆ្នាំមកហើយ ។
មន្ត្រីកាំកុងត្រូលដដែលបានបន្តទៀតថាលើសពីនេះទៅទៀត ស្ថានីយប្រេងរបស់លោកអ៊ុង ជាកុក នេះបានទទួលប្រេងផ្ញើពីរាជរដ្ឋាភិបាលសម្រាប់សមត្ថកិច្ចនិងមន្ត្រីរាជការទាំងអស់ចាក់ប្រើប្រាស់បំពេញការងារប្រចាំថ្ងៃតែគាត់បែរជាលួចលីត្រដោយចាក់មិនគ្រប់ឱ្យអតិថិជនទៅវិញ ។ ចំពោះការត្រួតពិនិត្យនេះជាលើកទី១ហើយដែលខាងកាំកុងត្រូលធ្វើការណែនាំឱ្យម្ចាស់ស្ថានីយប្រេងលោកអ៊ុង ជាកុក បញ្ឈប់ការកេងបន្លំលីត្រដោយចាក់មិនគ្រប់ជូនដល់អតិថិជនបន្តទៅទៀត ។ បើសិនជាម្ចាស់ស្ថានីយប្រេងមួយនេះនៅតែបន្តកេងបន្លំដោយចាក់ប្រេងមិនគ្រប់តទៅទៀត នៅពេលក្រុមជំនាញចុះមកត្រួតពិនិត្យជាលើកទី២នៅតែដដែលចាក់ប្រេងមិនគ្រប់លីត្រជូនដល់អតិថិជនបន្តទៀតនោះ ខាងជំនាញកាំកុងត្រូលនឹងរាយការជូនរដ្ឋមន្ត្រីក្រសួងពាណិជ្ជកម្មដើម្បីដកអាជ្ញាប័ណ្ណមិនឲ្យលក់ប្រេងបន្តទៀតបានទេ ហើយចំពោះករណីនេះលោកបានកេងបន្លំលីត្រច្រើនឆ្នាំមកហើយ ។
ពាក់ព័ន្ធទៅនឹងករណីម្ចាស់ស្ថានីយប្រេង ១មករា លក់ប្រេងនិងទទួលបញ្ញើប្រេងពីរដ្ឋសម្រាប់ចាក់ផ្គត់ផ្គង់ដល់សមត្ថកិច្វនិងសាលាខេត្ត តាមមន្ទីរនានាសម្រាប់ចាក់បម្រើការងារហើយចាក់ប្រេងមិនគ្រប់លីត្រនោះ កោះសន្តិភាពបានទូរស័ព្ទទៅលោកហោ គុណវឧ្ឍន៍ ប្រធានមន្ទីសេដ្ឋកិច្ចនិងហិរញ្ញវត្ថុខេត្តកាកែវដែរ តែពេលទូរស័ព្ទគឺជាប់រវល់រហូត។
លោកអ៊ុង ជាកុក ម្ចាស់ស្ថានីយ១មករា បានប្រាប់កោះសន្តិភាពតាមទូរស័ព្ទថា លោកលក់ប្រេងរាល់ថ្ងៃនេះជាដេប៉ូប្រេងមិនមែនជាក្រុមហ៊ុនដូចគេទេ ហើយចំពោះតម្លៃប្រេងដែលគាត់លក់រាល់ថ្ងៃនេះទាបជាងក្រុមហ៊ុនដោយសាំងធម្មតា១លីត្រតែ៣៥០០ និងស៊ុបពែរតែ៣៧០០រៀលទេ ខុសពីប្រេងក្រុមហ៊ុន៣ទៅ៥រយរៀល អញ្ចឹងហើយចំនួនលីត្រនោះគឺផ្អៀងបន្តិចហើយ ។ ក្នុងករណីនេះលោករង់ចាំខេត្តហៅប្រជុំរកដំណោះស្រាយជាមួយម្ចាស់ស្ថានីយប្រេងទាំង១០នោះសិនថា ខាងខេត្តសម្រេចបែបណាដោយរាល់ថ្ងៃគាត់ពិបាកលក់បំផុតព្រោះជាទីផ្សារសេរី ។
លោកបានបន្តទៀតថា លោកទទួលផ្គត់ផ្គង់ប្រេងពីរដ្ឋមែន តែអង្គភាពខ្លះបានជុំពាក់ប្រេងរបស់គាត់ជាង១មុឺនលីត្រទៅហើយដោយមិនព្រមសង ពិសេសខាងសមត្ថកិច្ចតែម្តង លោកមិនបញ្ចេញឈ្មោះទេ តែបានបញ្ជាក់ថា អ្នកចាស់មិនសង ហើយបានទៅបាត់ លុះអ្នកថ្មីចូលមកគាត់អត់ដឹងទេ ដូច្នេះបំណុលចាស់ត្រូវចប់ ៕
ចែករំលែកព័តមាននេះ