ខេត្តកំពត ៖ បុរសជាជនជាតិបារាំងម្នាក់បានជិះម៉ូតូម៉ាកអ៊ែប្លែកក្នុងស្ថានភាពស្រវឹងស្រាយ៉ាងខ្លាំងលុះដល់ចំណុចផ្លូវបត់កែងដៃខាងត្បូងសាលាខេត្ត បានជ្រុលចង្កូតទៅបុករបងថ្មបណ្តាលឲ្យបោកក្បាលស្លាប់យ៉ាងអាណោចអាធម័នៅនឹងកន្លែងកើតហេតុ។ ហេតុការណ៍នេះបង្កឲ្យមានការភ្ញាក់ផ្អើលនៅព្រឹកថ្ងៃទី៣ ខែធ្នូ ឆ្នាំ២០១៧ ក្រោយពេលសមត្ថកិច្ចទទួលបានព័ត៌មានមកថា មានជនបរទេសម្នាក់ ស្លាប់នៅលើផ្លូវកាច់ជ្រុងខាងត្បូងសាលាខេត្តកំពត ស្ថិតក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត។
លោកវរសេនីយឯក សៅ សំអឿន ស្នងការរងខេត្តបានឲ្យដឹងថា កម្លាំងសមត្ថកិច្ចបានចុះពិនិត្យដើម្បីឲ្យដឹងហេតុការក្រែងជាករណីឃាតកម្មលើជនរងគ្រោះ។ លោកបានបន្តទៀតថា ក្រោយពីកម្លាំងជំនាញចុះដល់កន្លែងកើតហេតុ យើងទទួលបានលទ្ឋផលដូចខាងក្រោម៖ ជនរងគ្រោះឈ្មោះ PHILIPPE Medina, Emeric ភេទប្រុស កើត 01-02-1988 ជនជាតិបារាំង កាន់លិខិតឆ្លងដែនលេខ 16CZ62385 , មុខរបរទេសចរណ៍។ នគរបាលជំនាញបច្ចេកទេស និងគ្រូពេទ្យជំនាញ បានពិនិត្យសពឃើញថា ជនរងគ្រោះស្លាប់៥ម៉ោងក្រោយពេលពិនិត្យ គឺប្រហាក់ប្រហែលម៉ោង១ ឬ២ទាបភ្លឺ នៃព្រឹកថ្ងៃទី៣ ធ្នូ ២០១៧ ដោយសារដួលម៉ូតូ (មិនមែនជាករណីឃាតកម្មទេ)។
លោកបានបន្តឲ្យដឹងពីដំណើររឿងថា បើតាមប្រភពព័ត៌មានពីកន្លែងជនរងគ្រោះស្នាក់នៅបានឲ្យដឹងថា មុនពេលកើតហេតុជនរងគ្រោះ និងមិត្តភក្តិម្នាក់ទៀត ឈ្មោះ LAO ENTHEOS ភេទប្រុស កើត 5-10-1989 ជនជាតិរុស្សី កាន់លិខិតឆ្លងដែន 17AK36290 បានជួលម៉ូតូ១គ្រឿង នាំគ្នាដើរលេងហូបចុក។ លុះពេលរំលងអាធ្រាត្រ ក៏បានទៅបន្ទប់ជួលវិញ ប៉ុន្តែដោយស្រវឹងខ្លាំងពេកបានជិះម៉ូតូ ហួសផ្លូវដែលបត់កែងដៃក៏ជ្រុលចង្កូតបុករបងថ្ម បានចោលម៉ូតូនៅកន្លែងកើតហេតុ ហើយដើរទៅផ្ទះជួលទាំងវង្វេងដោយស្មានថាមិត្តភក្តិជាជនរងគ្រោះទៅដែរ។
លុះព្រឹកឡើង ទើបដឹងថាជនរងគ្រោះដួលស្លាប់បាត់ទៅហើយ។ បច្ចុប្បន្ន ផែនអន្តោប្រវេសន៍បានទាក់ទងទៅស្ថានទូតសាម៉ី ដើម្បីបញ្ជូនសពទៅភ្នំពេញ (ពេទ្យរុស្សី) តាមជាក់ស្តែង។ គួររំលឹកថា បើតាមប្រភពព័ត៌មាន ពីលោកអធិការក្រុងកំពត ជនបរទេសដែលមកស្នាក់នៅក្នុងក្រុងកំពត ក្នុងនាមភ្ញៀវទេសចរណ៍ បានស្លាប់ដោយករណីផ្សេងៗអស់ប្រហែល១០នាក់ហើយ ចាប់ពីខែ១០មកទល់នឹងខែ១២នេះ ហើយស្លាប់ភាគច្រើនគឺជំងឺគាំងបេះដូង លង់ទឹកព្រែកពេលហែលលេងខ្វះការប្រុងប្រយត្ន័ជាដើម៕
ចែករំលែកព័តមាននេះ