រាជធានីភ្នំពេញ ៖ បុរសអ្នកជល់មាន់២នាក់ក្នុងចំណោមអ្នកញៀនល្បែងនោះច្រើននាក់ទៀតត្រូវបានកម្លាំងនគរបាលប៉ុស្ដិ៍កាកាប១ ខណ្ឌពោធិ៍សែនជ័យ ធ្វើការបង្ក្រាប និងចាប់ខ្លួនបាននាំយកទៅសាកសួរ ។ ទីតាំងសង្វៀនជល់មាន់ខាងលើនោះស្ថិតនៅ ចំណុចដីវាលមុខបន្ទប់ជួល ក្នុងភូមិប៉ប្រ៉កជើង…
រាជធានីភ្នំពេញ ៖ បុរសអ្នកជល់មាន់២នាក់ក្នុងចំណោមអ្នកញៀនល្បែងនោះច្រើននាក់ទៀតត្រូវបានកម្លាំងនគរបាលប៉ុស្ដិ៍កាកាប១ ខណ្ឌពោធិ៍សែនជ័យ ធ្វើការបង្ក្រាប និងចាប់ខ្លួនបាននាំយកទៅសាកសួរ ។ ទីតាំងសង្វៀនជល់មាន់ខាងលើនោះស្ថិតនៅ ចំណុចដីវាលមុខបន្ទប់ជួល ក្នុងភូមិប៉ប្រ៉កជើង សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ហើយកម្លាំងនគរបាលបានចុះទៅធ្វើការបង្ក្រាបកាលពីវេលាម៉ោង១រសៀល ថ្ងៃទី០២ ខែធ្នូ ឆ្នាំ២០១៧ ។
បុរសដែលត្រូវបាននគរបាលឃាត់ខ្លួននោះម្នាក់ឈ្មោះ យស់ លក្ខណា អាយុ២៩ឆ្នាំ មុខរបរជាងដែក ស្នាក់នៅបន្ទប់ជួល ភូមិប៉ប្រកជើង សង្កាត់កាកាប១ និងមានស្រុកកំណើតនៅក្នុងភូមិត្របែកប្រហោង ឃុំតាសួស ស្រុកស្វាយជ្រុំ ខេត្តស្វាយរៀង និងម្នាក់ទៀតឈ្មោះ សួស សាមួន អាយុ៣១ឆ្នាំ មុខរបរកម្មករ ស្នាក់នៅជាមួយគ្នា និងមានស្រុកកំណើតនៅក្នុងភូមិឃ្មត់ ឃុំស្វាយជ្រុំ ស្រុកស្វាយជ្រុំ ខេត្តស្វាយរៀង ។
នគរបាលបានឲ្យដឹងថា សង្វៀនជល់មាន់មួយនេះបានបើកលេងយូរមកហើយពួកគេបានលេងដោយមិនខ្លាចញញើតចំពោះសមត្ថកិច្ចនោះទេ ហើយកន្លងមកទោះបីជាមានការណែនាំ និងហាមឃាត់កុំឲ្យលេងក៏ពួកគេនៅតែនាំគ្នាលេងដោយគ្មានការខ្វល់ពីអ្វីទាំងអស់ ដែលការហាមឃាត់នោះគឺកម្លាំងនគរបាលមិនចង់បង្ក្រាបឬចាប់ ខ្លួននោះទេទើបព្យាយាមហាមឃាត់រហូត ដោយមិនបានប៉ះដៃយកដៃប៉ះជើងយកជើងនោះទេ ។ ប៉ុន្តែបន្ទាប់ពីការហាមឃាត់ម្ដងហើយម្ដងទៀតច្រើនដងមិនព្រមស្ដាប់ នៅតែលេងទាំងការផ្គើនញយដងខ្លាំងពេក ទើបកម្លាំងចុះទៅធ្វើការបង្ក្រាប និងចាប់ខ្លួន ដូចជាពេលនេះតែម្ដង ។
ដោយឡេកប្រជាពលរដ្ឋបាននិយាយថា ពួកគេមានទីលំនៅជិតសង្វៀនជល់មាន់មួយនោះមានការធុញទ្រាន់ខ្លាំងណាស់ដោយសារតែក្រុមអ្នកលេងល្បែងជល់មានខាងលើនោះណាត់គ្នាជល់មាន់ស្ទើររាល់ថ្ងៃ ថ្វីដ្បិតតែមើលទៅជាលក្ខណៈតូចតាច ប៉ុន្តែមានការភ្នាល់ដាក់លុយច្រើនៗមានពេលខ្លះរហូតដល់ខ្ទង់ពាន់ដុល្លារទៀតផង ។ ពួកនោះមានសភាពរញ៉េរញ៉ៃខ្លាំងណាស់ ពេលជល់ ម្ដងៗនាំគ្នាស្រែកហ៊ោខ្លាំងណាស់ ជាពិសេសអ្នកដែលឈ្នះស្រែកខ្លាំងៗមុខរីកដូចគ្រាប់ជី ចំណែកអ្នកចាញ់វិញធ្វើមុខដូចកញ្ចប់ប្រហុកមើលមិនយល់ទេ យួរមាន់ងាប់ទៅផ្ទះវិញទាំងចិត្តមួរហ្មង ។ ពេលនេះបាននគរបាលចុះបង្ក្រាបបែបនេះពួកគាត់មានការត្រេកអរខ្លាំងណាស់ ព្រោះរាល់ថ្ងៃពួកគាត់មានការបារម្ភពីការកើតឡើងនូវបទល្មើសចេញពីល្បែងខុសច្បាប់មួយនេះខ្លាំងបំផុត ៕
ចែករំលែកព័តមាននេះ