រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ចោរកាច់.កម៉ូតូម្នាក់អស់លក្ខណ៍ត្រូវប្រជាពលរដ្ឋចាប់បានវាយស្ទើរស្លាប់សល់ដង្ហើមចង្រឹត ។ ដែលហេតុការណ៍នេះបានកើតឡើងកាលពីវេលាម៉ោងប្រមាណ១នឹង២០នាទីរសៀលថ្ងៃទី៣ ខែធ្នូ ឆ្នាំ២០១៧ នៅភូមិថ្មគោល៣ សង្កាត់ចោមចៅ១ ខណ្ឌពោធិសែនជ័យ ។ តាមប្រភពបានឱ្យដឹងថា នៅមុនពេលកើតហេតុជនរងគ្រោះបានទុកម៉ូតូនៅមុខផ្ទះដែលស្ថិតនៅភូមិថ្មគោល៣ សង្កាត់ចោមចៅ១ ខណ្ឌពោធិសែនជ័យ ក្រោយមកមានក្រុមជនសង្ស័យ២នាក់បានជិះម៉ូតូម៉ាកវីវា មិនចាំស្លាកលេខបានចុះមកធ្វើសកម្មភាពកាច់.កម៉ូតូជនរងគ្រោះម៉ាកហុងដាឌ្រីម C125 ស៊េរីឆ្នាំ២០១០ ឡើងតែម២០១១ ពណ៌ខ្មៅ ពាក់ស្លាកលេខ ក្រចេះ 1B-0723 ដែលទុកចោលមុខផ្ទះ ។
នៅពេលដែលជនសង្ស័យចុះធ្វើសកម្មភាពកាច់.កម៉ូតូស្រាប់តែម៉ូតូរបស់ជនរងគ្រោះដែលមានបំពាក់ឧបករណ៍ការពារសុវត្ថិភាព(តេឡេសុវត្ថិភាព)ក៏បានស្រែកបន្លឺឡើងធ្វើឱ្យម្ចាស់ម៉ូតូដឹងខ្លួនចេញមកចាប់បានជនសង្ស័យម្នាក់នៅហ្នឹងកន្លែង ហើយត្រូវប្រជាពលរដ្ឋវាយម្នាក់មួយដៃមួយជើងសល់ដង្ហើមចង្រឹត ចំណែកបក្ខពួកម្នាក់ទៀតបានជិះម៉ូតូរត់គេចខ្លួនបាត់ស្រមោល ។
ជនសង្ស័យដែលធ្វើសកម្មភាពកាច់.កម៉ូតូមិនបានសម្រេចនោះឈ្មោះ ជួប សុភា ហៅ ភ័ណ ភេទប្រុស អាយុ២១ឆ្នាំ រស់នៅជិតវត្តអង្គតាមិញ ភូមិគោកចំបក់ សង្កាត់ចោមចៅ១ ខណ្ឌពោធិសែនជ័យ ។ ភ្លាមៗនោះដែរសមត្ថកិច្ចក៏បានចុះទៅដល់កន្លែងកើតហេតុ និងបាននាំខ្លួនជនសង្ស័យទៅកាន់ប៉ុស្តិ៍នគរបាលដើម្បីសាកសួរបន្ត ៕
ចែករំលែកព័តមាននេះ