ខេត្តកំពត ៖ គួរឱ្យសង្វេគណាស់ ក្មេងស្រីជំទង់ម្នាក់ជាមនុស្សគ ហើយមានសតិមិនគ្រប់ ត្រូវក្មេងប្រុសដៃដល់ម្នាក់ចាប់រំលោភ តែដោយនាងស្រែកក្មេងប្រុសនោះខឹងក៏យកកាំបិតមកកាប់ជាច្រើនកាំបិត ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៣និង១៥រសៀល ថ្ងៃទី២ ធ្នូ…
ខេត្តកំពត ៖ គួរឱ្យសង្វេគណាស់ ក្មេងស្រីជំទង់ម្នាក់ជាមនុស្សគ ហើយមានសតិមិនគ្រប់ ត្រូវក្មេងប្រុសដៃដល់ម្នាក់ចាប់រំលោភ តែដោយនាងស្រែកក្មេងប្រុសនោះខឹងក៏យកកាំបិតមកកាប់ជាច្រើនកាំបិត ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៣និង១៥រសៀល ថ្ងៃទី២ ធ្នូ ស្ថិតនៅភូមិអង្គ ឃុំត្រពាំងព្រីង ស្រុកទឹកឈូ។
លោកវរសេនីយ៍ឯក សៅ សំអឿន បានថ្លែងប្រាប់ថា កម្លាំងនគរបាលស្រុកបានរាយការណ៍មកលោកថាមានករណីហិង្សាដោយចេតនាមួយកើតឡើងនៅចំណុចភូមិអង្គ បង្កឡើងដោយក្មេងប្រុសម្នាក់ឈ្មោះ អាន ដែន ហៅប៉ាវ អាយុ១៤ឆ្នាំ រស់នៅក្នុងភូមិអង្គ ឃុំត្រពាំងព្រីង ស្រុកទឹកឈូ ដោយបានយកកាំបិតទៅកាប់ប្រហារលើក្មេងស្រីរងគ្រោះអាយុ១៤ឆ្នាំជាមនុស្សគ និងមានសតិមិនគ្រប់ផងដែរ បណ្តាលឲ្យរងរបួសយ៉ាងធ្ងន់ធ្ងរ ហើយត្រូវក្រុមគ្រួសារដឹកទៅសង្គ្រោះនៅមន្ទីរពេទ្យកំពត ប៉ុន្តែស្ថានភាពធ្ងន់ធ្ងរពេកគ្រូពេទ្យក៏បញ្ជូនទៅមន្ទីរពេទ្យនៅភ្នំពេញ តែគ្រូពេទ្យប្រាប់ថា ក្មេងស្រីរងគ្រោះសង្ឃឹមតិចណាស់ ព្រោះរបួសធ្ងន់ធ្ងរពេក។
លោកបន្តទៀតថា ក្មេងប្រុសសង្ស័យខាងលើក្រោយពីធ្វើសកម្មភាពរួច ក៏រត់ឡើងលើភ្នំនៅក្បែរកន្លែងកើតហេតុហៅថាភ្នំសេដាឱន ប៉ុន្តែត្រូវកម្លាំងអធិការដ្ឋានស្រុកធ្វើការឡោមព័ទ្ធភ្នំដែលក្មេងប្រុសសង្ស័យរត់ទៅលាក់ខ្លួននោះអស់ជាច្រើនម៉ោង ទើបក្មេងប្រុសនោះចុះមកក៏ត្រូវចាប់ខ្លួននៅថ្ងៃដដែល រួចបញ្ជូនមកកាន់ស្នងការខេត្តដើម្បីធ្វើការសាកសួរ ។
នៅចំពោះមុខសមត្ថកិច្ចក្មេងប្រុសនោះសារភាពថា ដោយសារតែខ្លួនមានចិត្តចង់ចាប់ក្មេងស្រីរងគ្រោះរំលោភ តែពេលបំរុងនឹងរំលោភ ស្រាប់តែក្មេងស្រីរងគ្រោះស្រែកធ្វើឲ្យខ្លួនមិនអាចរំលោភបាន ក៏ខឹងពេករត់ទៅយកកាំបិតនៅផ្ទះឃ្លាតពីកន្លែងកើតហេតុជាង១០០ម៉ែត្រមកកាប់ក្មេងស្រីរងគ្រោះ៣កាំបិតត្រង់កញ្ចឹង.កខាងឆ្វេង២កន្លែង និងភ្លៅ១កន្លែងដើម្បីបំបិទមាត់ បន្ទាប់មកខ្លួនក៏រត់ឡើងភ្នំនៅក្បែរនោះគេចខ្លួន ក្រោយមកស្មានថាលែងមានសមត្ថកិច្ចហើយ លុះដល់ម៉ោង៨យប់ក៏ចុះមកពីភ្នំវិញ ស្រាប់តែត្រូវចាប់ឃាត់ខ្លួនតែម្តង។
បច្ចុប្បន្នយុវជនសង្ស័យត្រូវកម្លាំងការិយាល័យព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្ត កសាងសំណុំរឿងពីបទករណីហិង្សាដោយចេតនា និងពីបទ ឃាតកម្មគិតទុកជាមុន ហើយបានបញ្ជូនទៅកាន់សាលាដំបូងខេត្ត ដើម្បីអនុវត្តតាមនីតិវិធី៕
ចែករំលែកព័តមាននេះ