រាជធានីភ្នំពេញ ៖ នៅវេលាម៉ោង១២ថ្ងៃត្រង់ ថ្ងៃទី០១ ខែធ្នូ ឆ្នាំ២០១៧នេះ បុរស២នាក់ត្រូវបានកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការណ៍ជាមួយស្នងការដ្ឋាននគរបាលខេត្តកំពង់ធំ ធ្វើការឃាត់ខ្លួនពាក់ព័ន្ធករណីផ្ទុះអាវុធនៅមជ្ឈមណ្ឌលកម្សាន្តរ៉ក់។ បុរសពីរនាក់នោះម្នាក់ឈ្មោះ…
រាជធានីភ្នំពេញ ៖ នៅវេលាម៉ោង១២ថ្ងៃត្រង់ ថ្ងៃទី០១ ខែធ្នូ ឆ្នាំ២០១៧នេះ បុរស២នាក់ត្រូវបានកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការណ៍ជាមួយស្នងការដ្ឋាននគរបាលខេត្តកំពង់ធំ ធ្វើការឃាត់ខ្លួនពាក់ព័ន្ធករណីផ្ទុះអាវុធនៅមជ្ឈមណ្ឌលកម្សាន្តរ៉ក់។ បុរសពីរនាក់នោះម្នាក់ឈ្មោះ កែវ ភារុណ អាយុ៣៣ឆ្នាំ មុខរបរជាមន្ត្រីនគរបាលជាតិ បម្រើការនៅអង្គភាពអន្តរាគមន៍ពិសេសរាជធានីភ្នំពេញ (កាន់កាំភ្លើងម៉ាក NP៤២) ស្នាក់នៅផ្ទះលេខ៥២អឺ០ ផ្លូវ២០០ សង្កាត់បឹងរាំង ខណ្ឌដូនពេញ។ និងម្នាក់ទៀតឈ្មោះ ឡ ពេជ្រសិលា ភេទប្រុស អាយុ៣៥ឆ្នាំ ជាមន្ត្រីនគរបាលជាតិនៅនាយកដ្ឋានអង្គរក្ស ស្នាក់នៅផ្ទះលេខ៥១ សង្កាត់ចតុមុខ ខណ្ឌដូនពេញ កាន់កាំភ្លើងម៉ាក CZ៧៥ ពណ៌ស។
មន្ត្រីសមត្ថកិច្ចបានបង្ហើបឲ្យដឹងថា ជនសង្ស័យត្រូវបានសមត្ថកិច្ចនគរបាលព្រហ្មទណ្ឌសហការណ៍ជាមួយសមត្ថកិច្ចខេត្តកំពង់ចាម និងខេត្តកំពង់ធំ ស្រាវជាវឈានដល់ការចាប់ខ្លួននៅលើផ្លូវជាតិលេខ៦ ក្នុងស្រុកសន្ទុក ខេត្តកំពង់ធំ រួមទាំងដកហូតបានអាវុធខ្លី២ដើម និងថ្នាំញៀនមួយចំនួន។ សមត្ថកិច្ចបន្តថា បុរស២នាក់នេះ មិនមែនជាជនដៃដល់បាញ់ប្រហារនៅមជ្ឍមណ្ឌលកម្សាន្ត រ៉ក់នោះទេ គេគ្រាន់តែជាបក្ខពួក ឯជនដល់ដល់នោះកំពុងគេចខ្លួន។ ក្រោយពីឃាត់ខ្លួនជនសង្ស័យ ត្រូវបានកម្លាំងសមត្ថកិច្ចនាំមកកាន់នាយកដ្ឋាននគរបាលព្រហ្មទណ្ឌក្រសួងមហាផ្ទៃ ដើម្បីបន្តនីតិវិធី។
គួររំឭកថា កាលពីវេលាទាបភ្លឺ ថ្ងៃទី២៩ ខែវិច្ឆិកា ឆ្នាំ២០១៧ នៅក្នុងបន្ទប់ខារ៉ាអូខេ នៃមជ្ឈមណ្ឌលកម្សាន្ត រ៉ក់ ស្ថិតក្នុងសង្កាត់បឹងត្របែកខណ្ឌចម្ការមន រាជធានីភ្នំពេញ កើតមានអំពើបាញ់ប្រហារមួយ បណ្ដាលឲ្យបុរសម្នាក់រងរបួសធ្ងន់ ត្រូវបានសាច់ញាតិដឹកទៅខេត្តព្រៃវែង ហើយក៏បានបាត់បង់អាយុជីវិត ដោយគ្រាប់កាំភ្លើងរបស់ក្រុមជនខាងលើនេះ។ ក្រោយពីមានការបាញ់ប្រហារនោះ នាយកដ្ឋាននគបាលព្រហ្មទណ្ឌដឹកនាំដោយ លោកឧត្តមសេនីយ៍ឯក សុខ ខេមរិន្ទ ប្រធាននាយកដ្ឋានបានចុះសហការណ៍តាមបណ្ដាខេត្ត ឈានដល់ការឃាត់ខ្លួនជនសង្ស័យ២នាក់ខាងលើនេះ៕
https://youtu.be/WzGJVYG9xnY
ចែករំលែកព័តមាននេះ