រាជធានីភ្នំពេញ ៖ បុរសម្នាក់ទើបតែចេញមកពីញ៉ាំការគេនៅសណ្ឋាគារសុខា ពេលដែលត្រលប់ចេញមកវិញស្រវឹងស្រាជោគជាំបើករថយន្តម៉ាកឡិចស៊ីស៤៧០មួយគ្រឿង បើកវ៉ារថយន្តបាឡែន ហើយបាន ជ្រុលទៅបុករះរថយន្តផ្សេងទៀត សរុប៣គ្រឿង និងម៉ូតូមួយគ្រឿងរួមនឹងរទេះលក់ប្រហិតចៀនទៅបុកផ្ទប់ចូលផ្ទះប្រជាពលរដ្ឋបណ្តាលឲ្យរងរបួសធ្ងន់ខាងម្ចាស់រថយន្តតូយ៉ូតាព្រូស ទើបត្រូវបានរថយន្តសង្គ្រោះដឹកយកទៅព្យាបាល។ ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង១១និង៣០នាទីយប់ថ្ងៃទី៣០ ខែវិច្ឆិកា ឆ្នាំ២០១៧ តាមបណ្តោយផ្លូវមាត់ទន្លេទៅសណ្ឋាគារសុខា នៅចំណុចមុខផ្ទះលក់ចាប់ហួយ ហុងគឹម ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ។
តាមប្រភពព័ត៌មានពីសាក្សីដែលឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសម្នាក់បើករថយន្តមួយគ្រឿងម៉ាកឡិចស៊ីស៤៧០ ពណ៌ស្ករ ពាក់ស្លាកលេខ ភ្នំពេញ 2Q-0999 បើកបរតាមបណ្តោយផ្លូវមាត់ទន្លេក្នុងទិសដៅពីត្បូងទៅជើង ទើបតែចេញមកពីញ៉ាំការគេនៅក្នុងសណ្ឋាគារសុខា លុះពេលដែលត្រលប់ចេញមកវិញស្រវឹងស្រាជោគជាំ បើករថយន្តក្នុងល្បឿនយ៉ាងលឿនដូចហោះ ខណៈមកដល់ចំណុចកើតហេតុក៏ស្រាប់តែរថយន្តឡិចស៊ីស៤៧០ វ៉ារថយន្តមួយគ្រឿងម៉ាកកាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ 2Q-8385 បើកបរដោយបុរសម្នាក់ដែលគេស្គាល់ថាជារថយន្តរបស់មេបញ្ជាការរងខណ្ឌជ្រោយចង្វារបើកបរស្របទិសគ្នា។
ខណៈដែលកំពុងតែវ៉ាក៏វាក់ជាមួយរថយន្តមួយគ្រឿងទៀតនៅពីមុខមិនស្គាល់ម៉ាក ទើបរថយន្តបង្កគាត់បួងចង្កូតមកស្តាំវិញក៏ជ្រុលទៅបុករថយន្តកាមរីបាឡែន ចំទ្វារក្រោយ និងធ្លាក់កាងមុខ ហើយក៏ជ្រុលទៅបុករះបន្តរថយន្តមួយគ្រឿងទៀត ម៉ាកតូយូតាព្រូស ដែលឈប់រថយន្តចូលទៅទិញអីវ៉ាន់នៅផ្ទះចាប់ហួយ មានយីហោ ហុង គឹម ដោយសារតែល្បឿនរថយន្តបង្កលឿនពេកក៏រុញរថយន្តតូយ៉ូតាព្រូសនោះទៅបុកម៉ូតូមួយគ្រឿងម៉ាកអឹមដេ ពណ៌សលាយក្រហម ពាក់ស្លាកលេខ ភ្នំពេញ1GI-5999 បណ្តាលឲ្យខ្ទាតទៅផ្លូវម្ខាងទៀត រួចរថយន្តបង្កមិនទាន់អស់ល្បឿននោះទេក៏បន្តទៅអូសទាំងរថយន្តតូយ៉ូតាព្រូសទៅបុកផ្ទប់នឹងរទេះលក់ប្រហិតចៀន បណ្តាលឲ្យរងការខូចខាតខ្ទេចអស់ទាំងស្រុង ហើយបន្តបុកចូលផ្ទះប្រជាពលរដ្ឋបណ្តាលឲ្យបាក់ទ្វារអស់មួយផ្ទាំងទៀត។
ចំណែកឯរថយន្តមួយគ្រឿង ទៀតម៉ាកKin ពណ៌កណ្តុរប្រមេះ ពាក់ស្លាកលេខ ភ្នំពេញ 2AP-6672 ដែលចតចោលដូចគ្នាក៏រងការខូចខាតបន្តិចបន្តួចក្រពឹតគូទក្រោយ។ នៅក្នុងហេតុការណ៍ដ៏គួរឲ្យរន្ធត់នេះប្រជាពលរដ្ឋនាំគ្នាថាសំណាងហើយដែលរងរបួសធ្ងន់តែម្នាក់។ រីឯម្ចាស់រថយន្តតូយ៉ូតាព្រូសជាស្ត្រីត្រូវបានរថយន្តសង្គ្រោះជួយសង្គ្រោះបានទាន់ពេលវេលាមិនបង្កគ្រោះថ្នាក់ដល់អាយុជីវិតទៅដល់អ្នកដទៃទេ ចំណែកឯរថយន្តទាំង៣គ្រឿងត្រូវបានខូចខាតខ្ទេចអស់ទាំងស្រុង។ សរុបទាំងអស់បុករថយន្តចំនួន៣គ្រឿង ម៉ូតូមួយគ្រឿង រទះលក់ប្រហិតចៀនមួយគ្រឿង។ ក្រោយពេលកើតហេតុរថយន្តសង្គ្រោះរបស់គ្លីនិកឯកជនពន្លឺ ដឹកយកទៅព្យាបាល ចំណែកឯរថយន្តបង្ក និងរថយន្តរងគ្រោះម៉ូតូរួមថែមទាំងតៃកុងរថយន្តបង្ក ត្រូវបានសមត្ថកិច្ចឃាត់ខ្លួន ហើយវាស់វែងស្ទូចយករថយន្តយកទៅរក្សាទុកនៅការិយាល័យចរាចរណ៍ផ្លូវគោករង់ចាំដោះស្រាយគ្នានៅពេលក្រោយទៀត៕
ចែករំលែកព័តមាននេះ