រាជធានីភ្នំពេញ ៖ ក្មេងទំនើងទុកសក់វែងប្រាសស្មាចំនួន៣នាក់ ដែលជាមុខសញ្ញាធ្លាប់អុកឡុកសាលារៀននាពេលកន្លងមកនោះ បានចូលទៅក្នុងវិទ្យាល័យ ហ៊ុន សែន ជម្ពូវ័ន ក្នុងបំណងអុកឡុករករឿងរំខានសិស្សដែលកំពុងរៀនសូត្រនៅទីនោះបង្កឲ្យមានការភ័យខ្លាចម្ដងទៀត។ ប៉ុន្តែត្រូវបានលោកគ្រូទូរស័ព្ទប្ដឹងឲ្យនគរបាលប៉ុស្ដិ៍ចោមចៅ៣ ចុះទៅជួយអន្តរាគមន៍ និងធ្វើការចាប់ខ្លួនបានទាំង៣នាក់ រួចនាំទៅសាកសួរនិងធ្វើការអប់រំ ព្រមទាំងកាត់សក់ខ្វែងជាសញ្ញាជើងក្អែក ដើម្បីឲ្យមានការរាងចាល បន្ទាប់មកបានធ្វើកិច្ចសន្យារួចរាល់ និងឲ្យអាណាព្យាបាលទៅធានាត្រឹមត្រូវ រួចទើបដោះលែងឲ្យត្រលប់ទៅផ្ទះវិញ។
ហេតុការណ៍នោះបានកើតឡើងកាលពីវេលាម៉ោង៣ និង៣០នាទី រសៀលថ្ងៃទី១ ខែធ្នូ ឆ្នាំ២០១៧ នៅក្នុងវិទ្យាល័យ ហ៊ុន សែន ជម្ពូវ័ន ស្ថិតនៅក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ក្មេងទំនើងដែលត្រូវនគរបាលចាប់ខ្លួននោះ ១,ឈ្មោះ ឈុន វីរៈជែម អាយុ១៥ឆ្នាំ ២,ឈ្មោះ លឹម រតនា អាយុ១៥ឆ្នាំ ៣,ឈ្មោះ ថៃ សៀង អាយុ១៦ឆ្នាំ ស្នាក់នៅក្នុងភូមិព្រៃព្រីងត្បូង សង្កាត់ចោមចៅ២ ខណ្ឌពោធិ៍សែនជ័យ។ នគរបាលបានឲ្យដឹងថា ក្មេងទំនើងខាងលើនោះបានទុកសក់វែងប្រាសស្មា និងបានឈប់រៀនសូត្រហើយ ពួកគេគឺជាមុខសញ្ញាដើរអុកឡុករំខានសិស្សដែលកំពុងរៀននៅតាមសាលារៀនក្នុងនាកន្លងមក ជាពិសេសអុកឡុកនៅក្នុងវិទ្យាល័យ ហ៊ុន សែន ជម្ពូវ័ន នោះតែម្ដង ហើយកាលពីលើកមុន ឈ្មោះ ឈុន វីរៈជែម ត្រូវបាននគរបាលប៉ុស្ដិ៍ខាងលើឃាត់ខ្លួនអប់រំម្ដងរួចមកហើយដែរ។
ដោយឡែកនៅមុនពេលចាប់ខ្លួនក្មេងទំនើងទាំង៣នាក់នេះបាននាំគ្នាចូលទៅកាន់វិទ្យាល័យខាងលើ ក្នុងបំណងរំខានសិស្សដែលកំពុងរៀន និងអុកឡុកសាលារៀន ប៉ុន្តែត្រូវបានលោកគ្រូបង្រៀននៅទីនោះ ខលប្រាប់នគរបាលប៉ុស្ដិ៍ចោមចៅឲ្យជួយអន្តរាគមន៍ទាន់ពេលវេលា។ ពេលនោះនគរបាលបានចាប់ខ្លួននាំទៅកាន់ប៉ុស្តិ៍ ធ្វើការអប់រំ និងកិច្ចសន្យា បន្ទាប់មកបានកាត់សក់ពួកគេពុះជាសញ្ញាជើងក្អែក ដើម្បីឲ្យរាងចាល ថ្ងៃក្រោយឈប់ដើរអុកឡុកតាមសាលាបន្តទៀត។ ក្រោយមកបានហៅឲ្យអាណាព្យាបាលរបស់ពួកគេ ទៅធានាត្រឹមត្រូវ ដើម្បីនាំពួកគេត្រលប់ទៅផ្ទះវិញ៕
https://youtu.be/0pN4j1WnDaA
ចែករំលែកព័តមាននេះ