រាជធានីភ្នំពេញ ៖ តារាចម្រៀងជួន អមរិទ្ធ ត្រៀមចេញទៅសម្តែងនៅទីក្រុងប៉ារីស ។ ខណៈពេលកាន់តែកៀកថ្ងៃ តែទិដ្ឋាការនៅមិនទាន់ធ្លាក់ធ្វើឱ្យតារាប្រុសរូបនេះខ្វល់ចិត្ត។ តាមគម្រោងតារាចម្រៀងជួន អមរិទ្ឋ…
រាជធានីភ្នំពេញ ៖ តារាចម្រៀងជួន អមរិទ្ធ ត្រៀមចេញទៅសម្តែងនៅទីក្រុងប៉ារីស ។ ខណៈពេលកាន់តែកៀកថ្ងៃ តែទិដ្ឋាការនៅមិនទាន់ធ្លាក់ធ្វើឱ្យតារាប្រុសរូបនេះខ្វល់ចិត្ត។
តាមគម្រោងតារាចម្រៀងជួន អមរិទ្ឋ ត្រូវចេញទៅសម្តែងនៅប្រទេសបារាំងនៅដើមខែធ្នូខាងក្នុងរយៈពេលជិត២ខែជាមួយអ្នកនាងឱក សុម៉ាវត្តី ។ អ្នកធានានៅបារាំងនោះបានរត់ឯកសារអស់ហើយ រង់ចាំតែការចេញទិដ្ឋាការទេ ។ បើបានទិដ្ឋាការ នោះជាឱកាសថ្មីមួយទៀតរបស់លោកបានទៅសម្តែងនៅបរទេស ។
លោកជួន អមរិទ្ធ និយាយថានេះជាលើកទី១ដែលលោកបានចេញទៅស្រុកគេសម្តែងដោយមិនទាន់ដឹងថាកម្រិតនៃការគាំទ្របែបណានៅឡើយ មានតែរង់ចាំមើលពេលទៅដល់ ។ អ្នកសិល្បៈគ្មានអ្វីមានកម្លាំងចិត្តក្រៅពីការមើលឃើញការគាំទ សំឡេងទះដៃពីទស្សនិកជនទេ ។
អតីតបេក្ខជនធ្លាប់ប្រឡងក្នុងកម្មវិធីយុវតារានៅទូរទស្សន៍បាយ័នលោកជួន អមរិទ្ធ និយាយថាពេលនេះលោកបានត្រៀមបទចម្រៀងពីដើមច្រើនសម្រាប់សម្តែងនៅឯនាយសមុទ្រព្រោះជាបទដែលជនរួមជាតិខ្មែរយើងនៅទីនោះចូលចិត្ត ។ លោកជួន អមរិទ្ធ បើគិតពីអាយុវិញសមតែច្រៀងបទយុវវ័យ ប៉ុន្តែបែរជានិយមច្រៀងបទពីដើមទៅវិញ ។
លោកជួន អមរិទ្ធ តែងតែត្រូវស្ថានីយទូរទស្សន៍ ល្បីៗផ្តល់ឱកាសឲ្យចូលរួមសម្តែង ដូចជាកម្មវិធី«មន្តស្នេហ៍សំនៀង»របស់ទូរទស្សន៍សុីធីអិន និង«តន្ត្រីស្រុកស្រែ» របស់ទូរទស្សន៍បាយ័នជាដើម ។
លោកជួន អមរិទ្ធ និយាយថា «ខ្ញុំមិនជ្រើសរើសបទចម្រៀងសម័យច្រៀងវាយលុកទីផ្សារ ដូចជាបទចម្រៀងសម័យដើមទេ ។ បើកុំតែបានចម្រៀងសម័យដើមខ្ញុំមិនមានឈ្មោះឡើយ ។ តាំងពីខ្ញុំសម្រេចចិត្តច្រៀងបទពីដើមមក ស្រាប់តែគេហៅច្រៀងរហូតប៉ះសុទ្ធតែតារារៀមច្បងល្បីល្បាញដែលរូបខ្ញុំពេញចិត្តណាស់មិនត្រឹមតែចូលរួមរក្សាបទពីដើមឲ្យគង់វង្សទេ ថែមទាំងជួយឱ្យយើងលេចធ្លោរហូតក្រៅស្រុកដែរ» ៕
ចែករំលែកព័តមាននេះ