ខេត្តកំពត ៖ បើទោះបីជាច្រករបៀងព្រែកអន្សា មិនបើកឲ្យដំណើរការជាផ្លូវការ និងស្ថិតក្នុងការបើកឲ្យចរាចរណ៍ទំនិញគេចពន្ធដោយលួចលាក់ក៏ដោយ ក៏មន្ត្រីនគរបាលការពារព្រំដែនតំបន់ព្រែកអន្សា បានអះអាងថា វាជាច្រករបៀងដ៏សំខាន់មួយសម្រាប់កសិករយកកសិផលទៅដោះដូរជាមួយទំនិញវៀតណាម ។ បើតាមប្រភពពីកម្មករ…
ខេត្តកំពត ៖ បើទោះបីជាច្រករបៀងព្រែកអន្សា មិនបើកឲ្យដំណើរការជាផ្លូវការ និងស្ថិតក្នុងការបើកឲ្យចរាចរណ៍ទំនិញគេចពន្ធដោយលួចលាក់ក៏ដោយ ក៏មន្ត្រីនគរបាលការពារព្រំដែនតំបន់ព្រែកអន្សា បានអះអាងថា វាជាច្រករបៀងដ៏សំខាន់មួយសម្រាប់កសិករយកកសិផលទៅដោះដូរជាមួយទំនិញវៀតណាម ។
បើតាមប្រភពពីកម្មករ ថៅកែទិញស្រូវ សមត្ថកិច្ច និងសភាពាណិជ្ជកម្មកម្ពុជា បានឲ្យដឹងថា បច្ចុប្បន្ននេះ កម្ពុជាបាននាំចេញស្រូវទៅប្រទេសវៀតណាមតាមច្រករបៀងនេះ ក្នុង១ថ្ងៃ ចន្លោះពី៥០០ទៅ៨០០តោន ។
ច្រករបៀងនេះ ស្ថិតក្នុងឃុំព្រែកទន្លេ ស្រុកកំពង់ត្រាច និងទើបតែបើកឲ្យដំណើរការជាលក្ខណៈលួចលាក់ ឬគេចពន្ធនៅឡើយ ។
មេប៉ុស្តិ៍ការពារព្រំដែនតំបន់ព្រែកអន្សា លោក នួន តោក បានប្រាប់អ្នកយកព័ត៌មាន កាលពីថ្ងៃទី២៨ វិច្ឆិកា ថា ការដឹកជញ្ជូនស្រូវកម្ពុជានាំចេញទៅប្រទេសវៀតណាមតាមច្រកព្រែកអន្សា បានចាប់ផ្តើមដំណើរការឡើងវិញប្រមាណជាង១០ថ្ងៃ ក្រោយពេលដែលច្រករបៀងមួយនេះត្រូវបានបិទមួយរយៈ ។
លោកបញ្ជាក់ថា ៖« ច្រករបៀងមួយនេះ ទាំងភាគីខ្មែរ និងវៀតណាម ហៅឈ្មោះដូចគ្នាថាច្រក «ដូនតា» ព្រោះច្រកនេះជាផ្លូវទឹកដ៏សំខាន់សម្រាប់ប្រជាជនខ្មែរដោះដូរទំនិញគ្នាជាមួយប្រជាជនវៀតណាម ដែលជាអ្នកភូមិផងរបងជាមួយគ្នាតាំងពីដូនតាមក » ។
លោក ហូ ណាត ថៅកែទិញស្រូវធំជាងគេ និងជាម្ចាស់ជញ្ជីងប្រចាំច្រករបៀងព្រែកអន្សាប៉ែកខាងកើតព្រែក បានឲ្យដឹងដែរថា សម្រាប់កន្លែងរបស់លោក ជាមធ្យមនាំស្រូវចេញចន្លោះ ពី៣ទៅ៥រយតោនក្នុង១ថ្ងៃ ។
លោកថា ៖« ស្រូវដែលនាំចេញតាមព្រែកមួយនេះ គឺដឹកជញ្ជូនមកពីខេត្តពោធិ៍សាត់ បាត់ដំបង កំពង់ស្ពឺ កំពង់ឆ្នាំង ព្រះសីហនុ និងបណ្តាស្រុកមួយចំនួនរបស់ខេត្តតាកែវ ដែលជាប់នឹងខេត្តកំពត » ។
លោកបានបញ្ជាក់ថា ៖« ច្រកនេះនាំស្រូវចេញមិនចេះដាច់ទេ គឺពេញ១ឆ្នាំតែម្តង ផុតពីស្រូវផ្កាម្លិះ ដល់អ៊ីអ៊ែ ផុតពីអ៊ីអ៊ែ ដល់ស្រូវស្រាល និងស្រូវធ្ងន់ តគ្នាជាប់ហូរហែ » ។
លោកបានបន្ថែមថា តម្លៃស្រូវឆ្នាំនេះ ឡើងថ្លៃជាងឆ្នាំមុន ។ ជាក់ស្ដែង នៅពេលបើកច្រករបៀងនេះ ស្រូវផ្កាម្លិះ១គីឡូតម្លៃ១.២៣០រៀល និងស្រូវអុីអ៊ែតម្លៃ៨២០រៀលក្នុង១គីឡូក្រាម ។
ប្រជាកសិករ ឈ្មួញ ក៏ដូចជាកម្មករ មានសេចក្តីត្រេកអរដែលច្រកនេះត្រូវបានអនុញ្ញាតឲ្យដំណើរការឡើងវិញ ព្រោះពួកគេងាយស្រួលរកស៊ី មានប្រាក់ចំណូលប្រចាំថ្ងៃ និងតម្លៃស្រូវឡើងខ្ពស់ ។ ទោះយ៉ាងណាក៏ដោយ លោក ហូ ណាត បានបញ្ជាក់ថា ៖« ក្នុងប៉ុន្មានឆ្នាំចុងក្រោយនេះ ច្រករបៀងព្រែកអន្សា ឃើញតែបើកហើយបិទ បិទហើយបើក គ្មានស្ថិរភាពទេ ។ ចំណែកការនាំស្រូវចេញតាមច្រកមួយនេះស្ថិតនៅក្នុងលក្ខណៈលួចលាក់នៅឡើយ ដោយភាគីវៀតណាមមិនទាន់អនុញ្ញាតបើកច្រកនេះឲ្យប្រើប្រាស់ជាផ្លូវការទេ » ។
លោកក៏បានស្នើសុំឲ្យថ្នាក់ដឹកនាំខេត្ត និងប្រមុខរាជរដ្ឋាភិបាល ជួយបើកច្រករបៀងនេះឲ្យទៅជាច្រកទ្វេភាគីផងដែរ ព្រោះច្រកនេះមានសក្តានុពលខ្លាំងណាស់ ។
អនុប្រធានសភាពាណិជ្ជកម្មកម្ពុជា និងជាប្រធានសម្ព័ន្ធអ្នកនាំចេញកសិផល និងផ្លែឈើកម្ពុជា លោក ហាក់ វណ្ណា បាននិយាយនៅព្រឹកថ្ងៃទី២៩ វិច្ឆិកា ថា ស្រូវដែលនាំចេញទៅវៀតណាមតាមខេត្តកំពត មាន២ច្រក គឺច្រកព្រែកអន្សា និងច្រកតន់ហន់ ក្នុងស្រុកកំពង់ត្រាច ។
ក្នុង១ឆ្នាំ ច្រកពីរនេះមានលទ្ធភាពនាំស្រូវចេញប្រមាណ១០ម៉ឺនតោន ប៉ុន្តែឆ្នាំនេះ មានតែច្រកព្រែកអន្សាមួយទេ ដែលនាំស្រូវចេញ ហើយបើតាមការប៉ាន់ស្មាន ក្នុង១ថ្ងៃ នាំស្រូវចេញប្រមាណជា៧០០តោន ។ ដោយឡែក ទាក់ទងនឹងច្រករបៀងព្រែកអន្សានេះ លោកបានដាក់សំណើទៅខេត្ត ដើម្បីសុំឲ្យបើកច្រកមួយនេះជាច្រកទ្វេភាគីវិញ ហើយសាលាខេត្តបានបង្កើតគណៈកម្មការចុះសិក្សា និងបានដាក់សំណើទៅក្រសួងមហាផ្ទៃហើយដែរ ។
យោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ទិន្នផលស្រូវឆ្នាំនេះ នឹងកើនដល់ជាង១០លានតោន ខណៈឆ្នាំមុន ការប្រមូលផលស្រូវបានជាង៩,៩លានតោន ដោយសារតែការដាំដុះដំណាំស្រូវឆ្នាំនេះ សម្រេចលើសផែនការចំនួន៦,៤៥ហិកតា ។
លោកថ្លែងថា ៖« ផ្ទៃដីដាំដុះស្រូវឆ្នាំនេះមានទំហំ២.៦៥៧.៧៦៨ហិកតា និងប្រមូលផលបានចំនួន១.០២២.៤៧៨ហិកតា រហូតមកទល់ពេលនេះ » ។ លោកបន្តថា ៖« ការប្រមូលទិន្នផលស្រូវរហូតមកទល់ពេលនេះ បានចំនួន៣.៣៦១.១៦៤តោន ភាគច្រើនជាប្រភេទស្រូវក្រអូប ដែលជាការផលិតសម្រាប់តម្រង់ទិសនាំចេញ » ៕
ចែករំលែកព័តមាននេះ