រាជធានីភ្នំពេញ ៖ មនុស្សប្រុសស្រីចំនួន៧នាក់ ត្រូវបានចាប់ខ្លួនជាបន្តបន្ទាប់នៅក្នុងថ្ងៃតែមួយ រយៈពេលជាង៧ម៉ោងប៉ុណ្ណោះ ពាក់ព័ន្ធនឹងការជួញដូរ និងប្រើប្រាស់គ្រឿងញៀន ក្នុងនោះកម្លាំងនគរបាលព្រហ្មទណ្ឌខណ្ឌដង្កោ សហការណ៍ជាមួយបណ្ដានគរបាលប៉ុស្តិ៍នានា ពេលល្បាតពួនស្ទាក់បទល្មើសក្នុងមូលដ្ឋានចាប់បានចំនួន៥នាក់។ ចំណែកកម្លាំងគណៈបញ្ជាការឯកភាពខណ្ឌដង្កោ ក្នុងពេលដាក់គោលដៅត្រួតពិនិត្យអាវុធជាតិផ្ទុះតាមផ្លូវចាប់បាន២នាក់។ មិនតែប៉ុណ្ណោះកម្លាំងសមត្ថកិច្ចទាំងអស់ខាងលើ បានដកហូតបានវតុ្ថតាងថ្នាំញៀន និងសម្ភារផ្សេងៗមួយចំនួន បន្ទាប់មកបាននាំទៅសាកសួរ និងកសាងសំណុំរឿងចាត់ការតាមផ្លូវច្បាប់។ នគរបាលបានឲ្យដឹងថា នៅថ្ងៃទី២៩ ខែវិច្ឆិកា ឆ្នាំ២០១៧ វេលាម៉ោង១២ និង៤០នាទីរសៀល កម្លាំងនគរបាលព្រហ្មទណ្ឌខណ្ឌដង្កោ បានសហការណ៍ជាមួយកម្លាំងនគរបាលប៉ុស្ដិ៍ដង្កោ បានចេញល្បាតតាមតំបន់មួយចំនួននៅក្នុងមូលដ្ឋានរបស់ខ្លួន ហើយពេលទៅដល់ត្រង់ចំណុចដីឡូត៍គ្មានលេខមួយកន្លែង ស្ថិតនៅតាមបណ្ដោយផ្លូវបេតុង ក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។
បានប្រទះឃើញបុរសម្នាក់គួរឲ្យសង្ស័យ កម្លាំងក៏បានឃាត់សួរនាំ និងត្រួតពិនិត្យរកឃើញថ្នាំញៀននៅជាប់ខ្លួនចំនួន១១កញ្ចប់ ហើយពេលសួរនាំទើបដឹងថា ជាមុខសញ្ញាជួញដូរគ្រឿងញៀនហើយកំពុងធ្វើសកម្មភាពលក់ដូរទៀតផង។ ជនសង្ស័យម្នាក់នោះឈ្មោះ ច្រៃ ចំរើន អាយុ៣១ឆ្នាំ ស្នាក់នៅផ្ទះជួលក្នុងភូមិខ្វា សង្កាត់ដង្កោ ខណ្ឌដង្កោ។ ពេលនោះជនសង្ស័យបានសារភាពថា ខ្លួនពិតជាមានមុខរបរជួញដូរគ្រឿងញៀនមែន និងមានបក្ខពួកមួយចំនួនទៀត បន្ទាប់មកបានប្រាប់ពីអត្តសញ្ញាណបក្ខពួកជូននគរបាលបានស្គាល់ថែមទៀត។ ប្រភពខាងលើបានបន្តទៀតថា ក្រោយពេលទទួលបានចម្លើយសារភាពខាងលើហើយ នៅវេលាម៉ោង២ និង៣០នាទី ថ្ងៃខែ ឆ្នាំដដែល កម្លាំងនគរបាលខាងលើបាននាំជនសង្ស័យរូបនោះ ទៅចាប់ខ្លួនយុវជនម្នាក់ទៀតដែលជាបក្ខពួកនៅតាមផ្លូវ៦០ម៉ែត្រ ស្ថិតនៅក្នុងភូមិអន្លូងគង សង្កាត់ព្រៃស ខណ្ឌដង្កោ។ ជនសង្ស័យឈ្មោះ រ៉េត ថារិន អាយុ១៩ឆ្នាំ មានទីលំនៅភូមិតាឡី សង្កាត់ដង្កោ ខណៈនោះកម្លាំងដកហូតបានវត្ថុតាងមានថ្នាំញៀន១កញ្ចប់ធំល្មម រួចបាននាំយកទៅធ្វើការសាកសួរនៅអធិការដ្ឋានបន្តទៀត។
ជនទី២នេះបានសារភាពថា ខ្លួនពិតជាជួញដូរគ្រឿងញៀនពិតមែន ហើយបានប្រាប់ពីអត្តសញ្ញាណបក្ខពួកផ្សេងទៀត បន្ទាប់មកវេលាម៉ោង៣ និង៣០នាទី ថ្ងៃខែ ឆ្នាំដដែល កម្លាំងបានបន្តទៅធ្វើការឃាត់ខ្លួនបានយុវជនសង្ស័យម្នាក់ទៀត ឈ្មោះ ឃី យូ អាយុ២៣ឆ្នាំ ត្រង់ចំណុចផ្ទះជួលមួយកន្លែង ស្ថិតនៅក្នុងភូមិតាឡី សង្កាត់ដង្កោ ខណ្ឌដង្កោ ដោយដកហូតបានវត្ថុតាងមួយចំនួន មានថ្នាំញៀនចំនួន៩កញ្ចប់តូច និងម៉ូតូ១គ្រឿងម៉ាកហុងដាធូដេ ពណ៌ស គ្មានស្លាកលេខ លេខម៉ាស៊ីនAFGIE-14G1237 យកមកធ្វើការសាកសួរ។ លុះបានចម្លើយសារភាពអស់ហើយ នៅវេលាម៉ោង៥ និង២០នាទី ថ្ងៃខែ ឆ្នាំដដែលកម្លាំងនគរបាលដដែល បានចុះទៅចាប់ខ្លួនស្ត្រីម្នាក់ទៀតដែលជាបក្ខពួក នៅត្រង់ចំណុចផ្ទះជួលស្ថិតនៅក្នុងភូមិជើងឯក សង្កាត់ជើងឯក ខណ្ឌដង្កោ។ ជនទី៤នេះមានឈ្មោះ ចក់ ណាវី អាយុ២៨ឆ្នាំ ស្នាក់នៅផ្ទះជួលភូមិជើងឯក សង្កាត់ជើងឯក ខណ្ឌដង្កោ ព្រមទាំងដកហូតបានវត្ថុតាង ថ្នាំញៀន១កញ្ចប់ថង់ធំ យកមកធ្វើការសាកសួរនៅប៉ុស្តិ៍នគរបាលរដ្ឋបាលដង្កោ។ ប្រភពដដែលបានបន្តទៀតថា ជនសង្ស័យទាំង៤នាក់ខាងលើនោះគឺជាបក្ខពួកតែមួយ និងជាមុខសញ្ញាជួញដូរ ហើយក្រោយពេលកម្លាំងនគរបាលចាប់ខ្លួនបានម្នាក់បានសារភាពប្រាប់ពីអត្តសញ្ញាណបក្ខពួក រសោងដូចសម្លកំពឹស។
ចំណែកជនសង្ស័យប្រើប្រាស់គ្រឿងញៀនម្នាក់ទៀតត្រូវបានកម្លាំងប៉ុស្តិ៍នគរបាលរដ្ឋបាលពង ទឹកសហការណ៍ជាមួយកម្លាំងនគរបាលព្រហ្មទណ្ឌដង្កោ ធ្វើការចាប់ខ្លួនបានកាលពីថ្ងៃទី២៩ ខែវិច្ឆិកា ឆ្នាំ២០១៧ វេលាម៉ោង៧យប់។ ខណៈដែលកម្លាំងល្បាតហើយបានប្រទះឃើញ ជនសង្ស័យម្នាក់នោះកំពុងឈរនៅតាមផ្លូវបេតុង ស្ថិតនៅក្នុងភូមិត្រាំដោក សង្កាត់ពងទឹក ខណ្ឌដង្កោ។ ដោយមានការសង្ស័យបាន ឃាត់ត្រួតពិនិត្យរកឃើញថ្នាំញៀន១កញ្ចប់តូច ដែលជននេះដាក់ នៅក្នុងកូនកាបូបមួយនៅក្នុងហោប៉ៅខោ ទើបកម្លាំងធ្វើការចាប់ខ្លួននាំទៅសួរនាំ និងកសាងសំណុំរឿង។ យុវជនសង្ស័យឈ្មោះ ម៉ម សុឌី ហៅឌី អាយុ១៧ឆ្នាំ ស្នាក់នៅក្នុងបុរីសន្តិភាព២ ភូមិត្រាំដោក សង្កាត់ពងទឹក ខណ្ឌដង្កោ។ នគរបាលបានបន្តថា ដោយឡែកកម្លាំងគណៈបញ្ជាការឯកភាពខណ្ឌដង្កោ បានដាក់គោលដៅត្រួតពិនិត្យអាវុធជាតិផ្ទុះកាលពីថ្ងៃទី២៩ ខែវិច្ឆិកា ឆ្នាំ២០១៧ វេលាម៉ោង៧នៅត្រង់ចំណុចខាងមុខ ក្រុមហ៊ុនស្រាបៀរកម្ពុជា ស្ថិតនៅភូមិតាឡី សង្កាត់ដង្កោ ខណ្ឌដង្កោ លុះកន្លះម៉ោងក្រោយមកមានជនសង្ស័យម្នាក់ឈ្មោះ ជឹម សោភ័ណ្ឌ ភេទប្រុស អាយុ២៦ឆ្នាំ មុខរបរកម្មករសំណង់ ជនជាតិខ្មែរ ស្នាក់នៅភូមិបាគូ សង្កាត់ដង្កោ ខណ្ឌដង្កោ ជិះម៉ូតូ០១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ1BH-6467 មានលេខតួ និងលេខម៉ាស៊ីន8692709 ក្នុងទិសដៅពីជើងទៅត្បូង។
កម្លាំងសមត្ថកិច្ចបានហៅឲ្យឈប់ធ្វើការត្រួតពិនិត្យរកឃើញថ្នាំញៀន១កញ្ចប់តូចនៅក្នុងកាបូបលុយពណ៌ខ្មៅ ទុកក្នុងហោប៉ៅខោខាងក្រោយ ក៏បានចាប់ខ្លួន។ លុះ២០នាទីក្រោយមកគឺនៅវេលាម៉ោង៧ និង៥០នាទីថ្ងៃខែឆ្នាំដដែល ក៏មានជនសង្ស័យម្នាក់ទៀតឈ្មោះ សេន វ៉ាន់ថន ភេទប្រុស អាយុ២៩ឆ្នាំ មុខរបរបើកបររថយន្ត ស្នាក់នៅផ្ទះជួលក្នុងភូមិតាឡី សង្កាត់ដង្កោ ខណ្ឌដង្កោ ជិះម៉ូតូ០១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1CI-3810 មានលេខតួ និងលេខម៉ាស៊ីន9092787 ក្នុងទិសដៅពីជើងទៅត្បូង ឆ្លងកាត់គោលដៅខាងលើ។ កម្លាំងបានហៅឲ្យឈប់ធ្វើការត្រួតពិនិត្យទៀត ហើយបានរកឃើញថ្នាំញៀន១កញ្ចប់់តូចនៅក្នុងកាបូបលុយពណ៌សូកូឡាដែលដាក់នៅក្នុងហោប៉ៅខោខាងឆ្វេង ទើបចាប់ខ្លួនតែម្ដង៕
ចែករំលែកព័តមាននេះ