រាជធានីភ្នំពេញ ៖ ព្រឹត្តិការណ៍ប្រដាល់ Khmer-Thai Fight ដែលបានធ្វើឡើងនៅស្ដាត
អូឡាំពិកកាលពីថ្ងៃសៅរ៍ទី២៥ វិច្ឆិកា បានទទួលភាពជោគជ័យយ៉ាងខ្លាំង ដោយសារតែមានអ្នកទស្សនាយ៉ាងណែនណាន់តាន់តាប់ពេញទីលានប្រកួត ប៉ុន្តែអ្នកចំណាយលុយទស្សនាទាំងនោះក៏បានសម្ដែងការរិះគន់ផងដែរ ជុំវិញការរៀបចំ ដែលម្នាក់ៗអះអាងថាមិនល្អមើលដូចគ្នានឹងការប្រកួតដែលបានធ្វើឡើងនៅក្នុងបណ្ដាប្រទេសផ្សេងមុនមកដល់កម្ពុជា ។ មិនខុសគ្នាដែរព្រឹត្តិការណ៍ MMA ដែលធ្លាប់ធ្វើឡើងនៅកោះពេជ្រកាលពីប៉ុន្មានខែមុន ក៏ត្រូវអ្នកទស្សនារិះគន់ផងដែរ ខណៈដែលការរិះគន់នេះត្រូវបានមន្ត្រីពាក់ព័ន្ធ និងគណៈកម្មការកម្មវិធីតែម្ដងធ្វើការបញ្ជាក់ប្រាប់ ។
ការរិះគន់ដែលបានធ្វើឡើងនោះ គឺម្នាក់ៗបានអះអាងថា គណៈកម្មការជាអ្នករៀបចំព្រឹត្តិការណ៍អន្តរជាតិទាំងអស់នៅកម្ពុជា ដែលអ្នកគាំទ្រចង់សំដៅដល់កម្មវិធីប្រកួតដាក់ទ្រុងអន្តរជាតិដែលបានរៀបចំដោយស្ថាប័ន MMA កាលពីយកកម្ពុជាធ្វើជាម្ចាស់ផ្ទះ និងការប្រកួតអន្តរជាតិចុងក្រោយគឺព្រឹត្តិការណ៍ Khmer- Thai Fight ដែលទើបតែបញ្ចប់ថានោះជាការរៀបចំមិនល្អ និងធ្វើឱ្យតែមានដើម្បីយកលុយពីអ្នកគាំទ្រ ។ អ្នកទស្សនាជាច្រើនបានអះអាងថា ព្រឹត្តិការណ៍អន្តរជាតិឱ្យតែរៀបចំនៅក្នុងប្រទេសកម្ពុជាមិនដែលមើលកើតនោះទេ គឺអន់ជាងការប្រកួតអន្តរជាតិនៅក្នុងបណ្ដាសង្វៀនរបស់ទូរទស្សន៍ភាគច្រើននោះផង ដោយសារតែកីឡាករដែលខាងទូរទស្សន៍រៀបចំឱ្យប៉ះគ្នា គឺភាគច្រើនជាកីឡាករដែលមានគីឡូ និងបទពិសោធន៍ប្រហែលគ្នា ហើយប្រកួតគ្នាយ៉ាងអស់ដៃ ធ្វើឱ្យអ្នកទស្សនាជក់ចិត្ត ។ អ្នកគាំទ្រជាច្រើនសុទ្ធតែបានបញ្ជាក់ថា កីឡាករបរទេសដែលបានមកប្រកួតនៅក្នុងកម្មវិធីអន្តរជាតិ ជាពិសេសគឺក្នុងកម្មវិធីដែលរៀបចំដោយគណៈកម្មការ Thai Fight ចុងក្រោយ ប្រកួតមិនកើត និងថាគណៈកម្មការមួយនេះជម្រើសយកមកសុទ្ធតែកីឡាករមិនល្អ ដែលមិនខុសពីបោកឱ្យអ្នកទៅទស្សនាខាតលុយខាតពេល។
អ្នកគាំទ្រម្នាក់បានដើរចេញភ្លាមៗក្រោយពីបញ្ចប់គូទី៤នៅក្នុងព្រឹត្តិការណ៍ Khmer-Thai Fight ដោយបាននិយាយថា ដូចយកកីឡាករមកប្រឡែងគ្នាលើរេញហើយក៏ប្រកាសលទ្ធផល។
លោកថា ការប្រកួតរបស់គូកម្ពុជា និងគូថៃ ជាមួយកីឡាករស្បែកស និងស្បែកខ្មៅ ដែលបានធ្វើឡើងនៅក្នុងព្រឹត្តិការណ៍នេះ មិនមានគូណាដែលទាក់ចិត្តមហាជន ហើយឱ្យមហាជនអស់ចិត្តនឹងការចំណាយលុយនោះទេ ទើបជាមូលហេតុដែលអ្នកគាំទ្រកីឡាករប្រដាល់នៅកម្ពុជាពិបាកក្នុងការចំណាយលុយមកទស្សនាដោយផ្ទាល់ ដោយសារតែភ័យរឿងការប្រកួតដូចយកមកលេងៗជាមួយគ្នាបែបហ្នឹង ។ អ្នកទស្សនាផ្សេងទៀតបានទាំងលើកឡើងថា សំណាងដែលការប្រដាល់មួយនេះមានតម្លៃត្រឹមតែសំបុត្រ៣០០០០រៀល បើថ្លៃដូចនៅស្រុកគេ គឺពិតជាស្ដាយលុយតែម្ដង ។
មិនមែនត្រឹមតែអ្នកគាំទ្រប៉ុណ្ណោះទេ គឺសូម្បីតែគណៈកម្មការរៀបចំកីឡាប្រដាល់នៅតាមទូរទស្សន៍ក៏ថ្លែងរិះគន់ពីករណីនេះដូចគ្នាផងដែរ ទើបធ្វើឱ្យការរៀបចំព្រឹតិ្តការណ៍ធំមកពីអន្តរជាតិពិបាកទទួលបានការចាប់អារម្មណ៍ ហើយធ្វើឱ្យអ្នកទស្សនានៅកម្ពុជាហ៊ានចំណាយលុយទិញសំបុត្រមើល ដោយសារតែការប្រដាល់របស់ស្ថាប័នអន្តរជាតិ២-៣មកហើយ គឺឱ្យតែមករៀបចំនៅកម្ពុជារមែងធ្វើឱ្យអ្នកគាំទ្ររិះគន់ថាអត់ល្អមើល ។ អ្នកគាំទ្រដូចៗគ្នាសុទ្ធតែអះអាងថា គណៈកម្មការជាអ្នករៀបចំទាំងនោះ មកបើកប្រកួតនៅកម្ពុជាឱ្យតែមានៗដើម្បីផ្សព្វផ្សាយពីព្រឹត្តិការណ៍របស់ខ្លួនប៉ុណ្ណោះ ប៉ុន្តែសម្រាប់ការផ្គូផ្គងកីឡាករឱ្យប៉ះគ្នា ឱ្យវាយជាមួយគ្នា គឺមិនដែលដាក់ឱ្យត្រូវ ឱ្យទាក់ទាញនោះទេ ដោយម្នាក់ៗបានលើកឡើងថា ច្រើនតែដាក់កីឡាករអន់ៗឱ្យមកប្រឡែងគ្នា ហើយចុងក្រោយក៏មានលទ្ធផលចាញ់ឈ្នះ ដោយមិនឱ្យអ្នកទស្សនាអស់ចិត្ត ។
ឆ្លើយតបនឹងការរិះគន់នេះ ទាំងមន្ត្រីពាក់ព័ន្ធ និងគណៈកម្មការរៀបចំបានអះអាងថាកម្ពុជាគេចង់ធ្វើព្រឹត្តិការណ៍មួយឱ្យល្អជាងនៅក្រៅប្រទេសក៏បាន ប៉ុន្តែដោយសារតែមានហេតុផលមួយចំនួនទើបការរៀបចំមិនអាចធ្វើឱ្យល្អឥតខ្ចោះ ។ តំណាងគណៈកម្មការ Thai Fight បានទទួលស្គាល់ថា សមាសភាពកីឡាករប្រដាល់ដែលមកប្រកួតនៅក្នុងប្រទេសកម្ពុជាកាលពីថ្ងៃទី២៥ វិច្ឆិកា ពិតជាមិនសុទ្ធតែកីឡាករល្អ និងមានតម្លៃខ្លួនខ្ពស់នៅក្នុងសហព័ន្ធប្រដាល់អន្តរជាតិពិតមែន ដោយសារតែការរៀបចំនៅក្នុងប្រទេសជាម្ចាស់ផ្ទះ គឺអាស្រ័យទៅលើសន្ទុះគាំទ្ររបស់ប្រទេសនីមួយៗផ្ទាល់តែម្ដង ។
លោកថា នៅក្នុងប្រទេសកម្ពុជា ដ្បិតថាមានការរីកចម្រើនផ្នែកកីឡាប្រដាល់ ប៉ុន្តែកម្រិតអ្នកហ៊ានចំណាយលុយទៅទស្សនាដោយផ្ទាល់មិនច្រើនោះទេ ដោយសូម្បីតែតម្លៃ១០ដុល្លារក៏ពិបាកលក់សំបុត្រនោះដែរ ។ ជាក់ស្ដែងលោកថា គ្រាន់តែការប្រកួត Khmer-Thai Fight ដាក់លក់សំបុត្រត្រឹមតែតម្លៃ៤ម៉ឺនរៀល និង៣ម៉ឺនរៀលតែប៉ុន្មានរយសំបុត្រផង គឺលក់មិនចង់អស់ ។ តំណាងដដែលបញ្ជាក់ថា តម្លៃសំបុត្រនៅក្នុងព្រឹត្តិការណ៍មួយនោះគឺត្រូវបានលក់តែក្នុងតម្លៃ១ម៉ឺនរៀលប៉ុណ្ណោះ ទម្រាំមានអ្នកទស្សនាយ៉ាងពេញសាលនៅផ្នែកខាងលើ ខណៈដែលជ្រុងខ្លះក៏មិនមានអ្នកទស្សនាពេញណែននោះដែរ ដ្បិតថាលក់សំបុត្រក្នុងតម្លៃតែ១ម៉ឺនរៀលនោះក៏ដោយ ។
លោកថា ការប្រកួតកម្រិតអន្តរជាតិមួយមានការចំណាយខ្ពស់ខ្លាំងណាស់ ប៉ុន្តែចំណូលដែលទទួលបានពីការរៀបចំនោះវិញ គឺមិនរួចខ្លួននោះទេ ទើបធ្វើឱ្យគណៈកម្មការត្រូវតែបន្ថយការចំណាយលើការនាំយកកីឡាករថ្លៃៗហើយជម្រើសយកកីឡាករដែលអាចទទួលយកតម្លៃក្នុងកម្រិតដែលត្រូវរៀបចំនោះបាន ។ លោកថា ការរៀបចំព្រឹត្តិការណ៍អន្តរជាតិធំមួយនៅក្នុងប្រទេសកម្ពុជា គឺពឹងស្ទើរទាំងស្រុងលើចំណូលពីការឧបត្ថម្ភ ប៉ុន្តែបើការលក់សំបុត្រគឺចប់តែម្ដង ទើបធ្វើឱ្យគណៈកម្មការស្ទាក់ស្ទើរក្នុងការដាក់កីឡាករល្បីៗ និងល្អឱ្យបានឡើងប្រកួត ។ យ៉ាងណាមិញ លោកថា វត្តមានកីឡាករដែលបានបង្ហាញខ្លួនមកប្រកួតនៅក្នុងប្រទេសកម្ពុជា ក៏សុទ្ធតែជាសមាសភាពល្អៗនោះដែរ ប៉ុន្តែបណ្ដាលមកពីកីឡាករទាំងនោះមិនស៊ាំនឹងអាកាសធាតុ និងរបបអាហារនៅក្នុងប្រទេសកម្ពុជា ទើបមានមួយចំនួនប្រកួតមិនសូវបានល្អ ។ មិនខុសគ្នាដែរ កាលពីកម្ពុជារៀបចំព្រឹត្តិការណ៍ប្រដាល់ដាក់ទ្រុង MMA ក៏មានការរិះគន់បែបនេះផងដែរ ដោយគណៈកម្មការក៏បានលើកនូវហេតុផលមកប្រាប់ដូចគ្នា ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានអះអាងថា ការរៀបចំព្រឹត្តិការណ៍អន្តរជាតិមួយបើចង់ឱ្យមានកម្រិតខ្លាំងដូចគ្នានៅក្រៅប្រទេស គឺលុះត្រាមានការគាំទ្រឱ្យពេញទំហឹងពីសំណាក់ពលរដ្ឋនៅក្នុងប្រទេស។ ប៉ុន្តែពលរដ្ឋខ្មែរក៏មិនមានលទ្ធភាពទិញសំបុត្រទស្សនាការប្រដាល់អន្តរជាតិមួយដែលមានតម្លៃរហូតដល់៥០ទៅ១០០ដុល្លារដូចគ្នានឹងនៅក្រៅស្រុកបានទេ ដោយសារតែស្ថានភាពជីវភាពរបស់ពលរដ្ឋខ្មែរក៏នៅមានកម្រិតនៅឡើយ ។ ទោះបីយ៉ាងណា លោកថា អ្វីៗដែលបានរៀបចំនៅក្នុងប្រទេសកម្ពុជាមិនថា ព្រឹត្តិការណ៍ MMA ឬព្រឹត្តិការណ៍ Khmer- Thai Fight មុននេះ គឺបានធ្វើឱ្យពិភពលោកស្គាល់កម្ពុជា និងបានដឹងពីការរៀបចំរបស់កម្ពុជាផងដែរ បើទោះជាក្នុងវេទិកានោះលោកក៏ទទួលស្គាល់ថា គណៈកម្មការរៀបចំមិនបានចំណាយលុយយកកីឡាករដែលមានតម្លៃខ្លួនខ្ពស់លំដាប់ពិភពលោកឱ្យមកប្រកួតនៅកម្ពុជា ដោយសារតែហេតុផលតម្លៃនៃការលក់សំបុត្រ ។ លោកបន្ថែមថា កីឡាករកម្ពុជា ក៏មិនអាចធ្វើការប្រកួតជាមួយកីឡាករលំដាប់អន្តរជាតិដូចគ្នានឹងពេលព្រឹត្តិការណ៍អន្តរជាតិទាំងនេះរៀបចំនៅក្នុងប្រទេសផ្សេងផងដែរ ទើបលោកយល់ថា ការនាំយកកីឡាករបរទេសដែលបានឃើញមុននេះ គឺសមល្មមសម្រាប់ឱ្យកីឡាករកម្ពុជាប្រកួតជាមួយ ៕
ចែករំលែកព័តមាននេះ