តើអ្នកដឹងពីការប្រុងប្រយ័ត្នដ៏មានសុវត្ថិភាព និងសាមញ្ញបំផុតដែរឬទេ នៅពេលត្រូវឈប្ត់ពីក្រោយរថយន្តដទៃ ? វាគឺជាសកម្មភាពដែលអ្នកគួរតែធ្វើ នៅពេលឈប់រថយន្តពីក្រោយរថយន្តរបស់នរណាម្នាក់នៅចំណុចភ្លើងស្តុប នៅពេលស្ទះចរាចរណ៍ខ្លាំង ឬពេលរថយន្តឈប់រង់ចាំដើម្បីបត់ត្រឡប់ក្រោយ ។
ចម្លើយគឺត្រូវប្រាកដថា អ្នកអាចឃើញកង់ក្រោយរបស់រថយន្តនៅពីមុខប៉ះនឹងដី ។ ប្រសិនបើអ្នកអាចឃើញកង់រថយន្តនោះប៉ះនឹងដី បានន័យថា រថយន្តរបស់អ្នកមានចន្លោះគ្រប់គ្រាន់ដើម្បីបត់ចេញក្នុងករណីមានអាសន្ន។ រថយន្ដនៅខាងមុខអាចមានគ្រោះថ្នាក់ណាមួយ ឬអ្នកប្រហែលជាត្រូវគេចចេញពីផ្លូវ ប្រសិនមានរថយន្តសង្គ្រោះបន្ទាន់នៅពីក្រោយ ។
វាដូចនឹងរក្សាចម្ងាយសុវត្ថិភាព ខណៈពេលកំពុងបើកបររថយន្ត ។ នៅពេលឈប់ អ្នកគួរតែទុកចន្លោះពីរថយន្តមួយទៅរថយន្តមួយទៀតឲ្យបានគ្រប់គ្រាន់ ។ ប្រសិនបើរថយន្តមួយមានបញ្ហា រថយន្ដនៅខាងក្រោយជាច្រើននឹងលំបាកធ្វើចលនា ដោយហេតុថា ពួកគេមិនបានទុកគម្លាតនៃរថយន្តនីមួយៗឲ្យបានគ្រប់គ្រាន់ ។
យើងគួរតែទុកផ្លូវចេញសម្រាប់ខ្លួនឯង ដោយសារយើងមិនអាចគ្រប់គ្រងចន្លោះនៅពីក្រោយរថយន្តរបស់ខ្លួនបានទេ ។ ដូច្នេះ ការទុកចន្លោះនៅពីមុខរថយន្តរបស់អ្នក គឺអនុញ្ញាតឱ្យអ្នកអាចផ្លាស់ទីចេញពីផ្លូវបានភ្លាមៗក្នុងករណីមានអាសន្នណាមួយកើតឡើងជាយថាហេតុ ៕
ចែករំលែកព័តមាននេះ