ខេត្តកណ្តាល ៖ កម្លាំងនគរបាលប៉ុស្តិ៍រដ្ឋបាលគគីរល្បាតតាមមូលដ្ឋានធ្វើការឃាត់ខ្លួនមុខសញ្ញាចែកចាយគ្រឿងញៀនប្រុស-ស្រីចំនួន២នាក់កាលពីវេលាម៉ោង២៣និង២០នាទីយប់ថ្ងៃទី២៩ ខែវិច្ឆិកា ឆ្នាំ២០១៧ នៅរោងចាំចំការស្វាយ ភូមិកោះបៀ ឃុំគគីរ ស្រុកកៀនស្វាយ ខេត្តកណ្ដាល…
ខេត្តកណ្តាល ៖ កម្លាំងនគរបាលប៉ុស្តិ៍រដ្ឋបាលគគីរល្បាតតាមមូលដ្ឋានធ្វើការឃាត់ខ្លួនមុខសញ្ញាចែកចាយគ្រឿងញៀនប្រុស-ស្រីចំនួន២នាក់កាលពីវេលាម៉ោង២៣និង២០នាទីយប់ថ្ងៃទី២៩ ខែវិច្ឆិកា ឆ្នាំ២០១៧ នៅរោងចាំចំការស្វាយ ភូមិកោះបៀ ឃុំគគីរ ស្រុកកៀនស្វាយ ខេត្តកណ្ដាល ។
ជនសង្ស័យប្រុស-ស្រីទាំង២នាក់ ដែលសមត្ថកិច្ចឃាត់ខ្លួនទី១- ឈ្មោះអឿន ស៊ីណាត ភេទប្រុស អាយុ២២ឆ្នាំ នៅភូមិចន្លក់ ឃុំគគីរ ស្រុកកៀនស្វាយ និងទី២- ឈ្មោះគុណ ឈុនណែត ភេទស្រី អាយុ១៩ឆ្នាំ ខ្មែរ មានទីលំនៅភូមិកោះបៀ ឃុំគគីរ ស្រុកកៀនស្វាយ ។
បើតាមសមត្ថកិច្ចនគរបាលប៉ុស្តិ៍គគីរបានឲ្យដឹងថា នៅមុនពេលកើតហេតុកម្លាំងបានចុះល្បាតតាមមូលដ្ឋានដូចសព្វដង លុះដល់ត្រង់ចំណុចខាងលើប្រទះឃើញមុខសញ្ញារត់ចូលទៅសំងំក្នុងរោងយាមស្វាយមិនស្គាល់ម្ចាស់ ។ ភ្លាមនោះកម្លាំងនគរបាលបានព័ទ្ធឃាត់ខ្លួនបានទាំង២នាក់ និងធ្វើការឆែកឆេរដកហូតបានវត្ថុតាង នូវម្សៅក្រាមថ្លាពណ៌សសង្ស័យជាសារធាតុញៀន១កញ្ចប់តូច ទូរសព្ទ័ដៃចំនួន២គ្រឿង មួយគ្រឿងម៉ាកខេមហ្វូនពណ៌ទឹកលាយមាសបែកអេក្រង់ និងម៉ាកអិនចុចពិលពណ៌ខៀវ០១គ្រឿង ដាវកែឆ្នៃពីរដើម សម្ភារប្រើប្រាស់ និងវិចខ្ចប់គ្រឿងញៀនមួយចំនួន ព្រមដែកកេះហ្គាសពណ៌ទឹកក្រូច១ នាំយកមកប៉ុស្តិ៍ដើម្បីសាកសួរតែម្តង ។
មុខសមត្ថកិច្ចជនសង្ស័យចែកចាយថ្នាំញៀនទាំង២នាក់បានសារភាពថា ពួកគេបានទទួលយកថ្នាំញៀនពីឈ្មោះចាន់ និមល ភេទប្រុស អាយុ២៣ឆ្នាំ(ខ្មែរ)នៅភូមិចន្លក់ ឃុំគគីរ ស្រុកកៀនស្វាយយកមកលក់បន្ត ។ ក្រោយសាកសួររួចជនសង្ស័យទាំងពីរនាក់រួមទាំងវត្ថុតាងត្រូវនគរបាលប៉ុស្តិ៍ធ្វើកំណត់ហេតុបញ្ជូនទៅកាន់អធិការដ្ឋាននគរបាលស្រុកកៀនស្វាយដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ