រាជធានីភ្នំពេញ ៖ អ្នករស់នៅក្នុងនិគមព្រះនរោត្តម សីហមុនី ដែលភាគច្រើនជាអ្នកក្រីក្របាននាំគ្នាទទូចសុំប័ណ្ណកម្មសិទ្ធិ ខណៈពេលដែលផ្ទះដែលជាព្រះរាជអំណោយនេះត្រូវបានគេទិញលក់តៗគ្នាតាមចិត្ត និងផ្ទះខ្លះត្រូវបានគេប្រក់ដំបូលថ្មី បាត់ទ្រង់ ទ្រាយរចនាបទដើមស្ទើរអស់ទៅហើយនោះ ។…
រាជធានីភ្នំពេញ ៖ អ្នករស់នៅក្នុងនិគមព្រះនរោត្តម សីហមុនី ដែលភាគច្រើនជាអ្នកក្រីក្របាននាំគ្នាទទូចសុំប័ណ្ណកម្មសិទ្ធិ ខណៈពេលដែលផ្ទះដែលជាព្រះរាជអំណោយនេះត្រូវបានគេទិញលក់តៗគ្នាតាមចិត្ត និងផ្ទះខ្លះត្រូវបានគេប្រក់ដំបូលថ្មី បាត់ទ្រង់ ទ្រាយរចនាបទដើមស្ទើរអស់ទៅហើយនោះ ។
និគមព្រះនរោត្តម សីហមុនី ដែលអ្នកស្រុកហៅ«ផ្ទះស្តេច»នេះស្ថិតនៅក្នុងភូមិសំរោង សង្កាត់ឃ្មួញ ខណ្ឌសែនសុខ ដែលជាព្រះរាជអំណោយរបស់ព្រះមហាក្សត្រនៃព្រះ រា ជាណាចក្រកម្ពុជា ដែលព្រះអង្គសង់ឱ្យកូនចៅជាប្រជាពលរដ្ឋក្រីក្រ ដែលមកពីបណ្តាខណ្ឌទាំង៨ ក្នុងរាជធានីភ្នំពេញរស់នៅកាលពីអំឡុងឆ្នាំ២០១០ ។
លោក សួន ឈឿន អាយុ៥២ឆ្នាំ ជាមេ៥០ខ្នង ទី៨បានឱ្យដឹងថា និគមព្រះនរោត្តម សីហមុនី ហៅ «ផ្ទះស្តេច» ដែលជាព្រះរាជអំណោយដ៏ថ្លៃថ្លារបស់ព្រះមហាក្សត្រ សម្តេចព្រះបរមនាថ នរោត្តមសីហមុនី ដែលបានសាងសង់ចែកជួនដល់ប្រជាពលរដ្ឋក្រីក្រ អត់ទីជម្រកចូលមករស់នៅ កាលពីថ្ងៃទី៤ វិច្ឆិកា ឆ្នាំ២០១០ មានចំនួន៨០គ្រួសារ ដែលក្រីក្ររស់នៅតាមបណ្តាខណ្ឌនានាក្នុងរាជធានីភ្នំពេញ ត្រូវបានអាជ្ញាធរជ្រើសរើស និងមានភ័ព្វវាសនាមកចាប់ឆ្នោតយកផ្ទះ ដែលជាព្រះរាជអំណោយនេះ ។ ក្នុងនោះរូបលោកដែលពីមុនរស់នៅច្រាំងទន្លេ ក្នុងសង្កាត់ច្បារអំពៅទី១ ខណ្ឌមានជ័យ កាលពីជំនាន់នោះ ក៏ទទួលបានផ្ទះមួយខ្នងរស់នៅ២គ្រួសារ (ផ្ទះជាប់គ្នា) រួមទាំងដីទំហំ ៧ម៉ែត្រគុណ១៥ម៉ែត្រដែរ ។ មុនដំបូងផ្ទះនោះគ្មានរបង និងគ្មានដំបូលយ៉ាកការពារទឹកភ្លៀង និងគ្មានរបស់របរអ្វីឡើយ ។
លោកមេ៥០ខ្នងរូបនោះបានឱ្យដឹងទៀតថា បន្ទាប់ពីទទួលបានអំណោយផ្ទះនេះគាត់និងក្រុមគ្រួសារបានមករស់នៅក្នុងនិគមនោះតាមការចែកឱ្យ។ មុនដំបូងមានភាពរញ៉េ រញ៉ៃណាស់ព្រោះប្រជាពលរដ្ឋដែលមករស់នៅក្នុងនិគម ដែលភាគច្រើនមានជីវភាពលំបាកហើយអ្នកខ្លះទៀតមានសមាសភាពមិនល្អជាដើម ។ លុះក្រោយមកដោយសារតែស្ថានភាពក្រីក្រ ពួកគាត់ទាំងនោះបានលក់ផ្ទះទៅរស់នៅកន្លែងផ្សេង ហើយបច្ចុប្បន្ននេះ អ្នកចំណូលថ្មីប្រមាណ៥០ភាគរយ ដែលបានមកទិញត និងខ្លះទៀត ដែលមានជីវភាពធូរធារ ក៏បានទិញផ្ទះស្តេចវាយចោល ជួលជុល ដូចជាផ្ទះលេខ ឆ៦, ឆ៧, និង ឆ៨ជាដើម ។
លោក សួន ឈឿន ក្នុងនាមប្រជាពលរដ្ឋរស់នៅក្នុងនិគម ក៏បានទទួចសុំអាជ្ញាធរ ក៏ដូចជាមន្ត្រីជំនាញ ជួយផ្តល់ប័ណ្ណកម្មសិទ្ធិ ព្រោះពួកគាត់បានរស់នៅលើផ្ទះនិងដីនេះ អស់រយៈពេល៧ឆ្នាំមកហើយ ដើម្បីឱ្យពួកគាត់ងាយស្រួលធ្វើមរតកឱ្យកូនចៅ និងត្រូវការប្រាក់កាសអាចយកទៅបញ្ចាំដោះស្រាយជីវភាពបាន ។ លោក ស្រី ឈួន រដ្ឋា អាយុ៣៨ឆ្នាំ បានឱ្យដឹងថា ផ្ទះស្តេចនេះត្រូវបានគេទិញ-លក់តៗគ្នា ដែលពីមុនលក់បានតម្លៃពី៨ពាន់ដុល្លារ ទៅ១ម៉ឺនដុល្លារក្នុងមួយខ្នងផ្ទះ ហើយបច្ចុប្បន្នឡើងថ្លៃរហូតដល់ជាង៣ម៉ឺនដុល្លារ និងផ្ទះ ដីខ្លះ រហូតដល់៦ម៉ឺនក៏មានដែរ ។ និយាយរួមម្ចាស់ផ្ទះដើមដែលទទួលអំណោយផ្ទាល់ គាត់មានជីវភាពខ្វះខាតនិងជំពាក់ប្រាក់គេ ក៏បានដាច់ចិត្តលក់ផ្ទះនេះ ដែលការទិញ-លក់នោះ គឺឯកភាពតែអ្នកលក់និងអ្នកទិញ ហើយអាជ្ញាធរគ្រាន់តែដឹងឮតែប៉ុណ្ណោះ ។
លោក ម៉ៅ សុវណ្ណ អាយុ៥៩ឆ្នាំ ជាមេ៥០ខ្នងទី៩ បានឱ្យដឹងដែរថា មុនដំបូងបញ្ហាសន្តិសុខនៅនិគមនេះ មានការលំបាកជាខ្លាំង តែក្រោយមកសមត្ថកិច្ចបានចុះបង្ក្រាបជាបន្តបន្ទាប់ធ្វើឱ្យស្ថានភាពសន្តិសុខកាន់តែល្អប្រសើរឡើង ។ លោកមេ៥០ខ្នង បានបន្តទៀតថា ពីមុនគាត់ជាជីវពល ជាសន្តិសុខផ្សារទឹកថ្លាគ្មានផ្ទះសំបែង និងរស់នៅលើដងផ្លូវក្នុងភូមិបុរី១០០ខ្នង សង្កាត់ទឹកថ្លា មានជីវភាពលំបាកខ្លាំង ទើបអាជ្ញាធរសង្កាត់បានចុះឈ្មោះឱ្យគាត់បានមកចាប់ឆ្នោតទទួលព្រះរាជអំណោយផ្ទះនេះ និងបានប្រកបមុខរបរជាអ្នកលក់ដូរ និងជួយមើលការពារក្នុងមូលដ្ឋាន ។
លោក ម៉ៅ សុវណ្ណ ក៏បានទទូចសុំឱ្យអាជ្ញាធរជួយផ្តល់ប័ណ្ណកម្មសិទ្ធិផងដែរ ។ ប្រជា ពលរដ្ឋក៏បានឱ្យដឹងទៀតថា មុនពេលទទួលព្រះរាជអំណោយ មន្ត្រីនៅព្រះបរម រាជវាំងក៏បានណែនាំដល់ប្រជាពលរដ្ឋ «មិនឱ្យជួសជុល កែលម្អ ធ្វើអ្វីឱ្យបាត់ទ្រង់ទ្រាយដើម»ទេ លុះត្រាតែមានការឯកភាពពីអាជ្ញាធរ ហើយពេលនោះមានប្រជាពលរដ្ឋមួយចំនួនអាងខ្លួនមានប្រាក់ទិញផ្ទះវាយចោល ប្រក់ដំបូលថ្មី ដូចជាផ្ទះមន្ត្រីកងរាជ អាវុធ ហត្ថ រាជធានីភ្នំពេញម្នាក់ទិញផ្ទះចំនួន៣ម្ចាស់ វាយប្រក់ដំបូលថ្មីតែម្តង បាត់បង់ទ្រង់ ទ្រាយដើម ។
អ្នកខ្លះក៏បានធ្វើការរិះគន់ដែរថា ការធ្វើបែបនេះមិនត្រឹមត្រូវនោះទេ បើត្រឹមតែធ្វើរបងបន្ថែមការពារចោរចូលផ្ទះនិងការពារទឹកភ្លៀងមិនអីនោះទេ ។ ទន្ទឹមនោះប្រជាពលរដ្ឋក៏បានរិះគន់ដល់រដ្ឋាករទឹកដែលបានចុះទៅប្តូរទីតាំងកុងទ័រទឹក ហើយទារប្រាក់១គ្រួសារចំនួន១២០ដុល្លារ បង់រំលោះ១ខែ៤៥.៦០០រៀល រយៈពេល៥ខែមកហើយ ដែលពីមុនប្រើទឹកពុំអស់ប្រាក់ឡើយ៕
ចែករំលែកព័តមាននេះ