រាជធានីភ្នំពេញ ៖ មនុស្សម្នាក់បានលោតទឹកសម្លាប់ខ្លួនពីលើស្ពានព្រះមុនីវង្សចាស់ ចូលនៅក្នុងទន្លេបាសាក់ កាលពីវេលាម៉ោងប្រមាណ១រសៀលថ្ងៃទី២១ មីនា ២០១១ ហើយលិចបាត់ទៅក្នុងទន្លេបាសាក់… ពុំមានប្រភពព័ត៌មានណាមួយអះអាងថា ជាមនុស្សប្រុស ឬក៏ស្រីឡើយ ។
ទាក់ទិននឹងហេតុការណ៍ខាងលើនេះ តាមប្រភពព័ត៌ពីលោកស៊ុន សាវ៉ុន ប្រធានផ្នែកគោលដៅការពារស្ពានព្រះមុនីវង្សថ្មី និងចាស់ បានឱ្យដឹងថា ពិតជាមានករណីមនុស្សលោតទឹកសម្លាប់ខ្លួនពីលើស្ពានព្រះមុនីវង្សចាស់ប្រាកដមែន។លោកបានធ្វើការសួរនាំបំភ្លឺពីក្រុមប្រជាពលរដ្ឋអ្នកនេសាទត្រី មានអ្នកស្ទូចត្រី អ្នកដាក់មង តាមដងទន្លេជាច្រើននាក់ ប៉ុន្តែពុំមានប្រភពព័ត៌មានណាអះអាងថា មនុស្សដែលលោតទឹកសម្លាប់ខ្លួននោះជាមនុស្សប្រុស ឬស្រីនោះទេ ព្រោះពួកគេមិនច្បាស់លាស់ទេ ត្រង់ថា មានអ្នកលោតនោះគឺពិតជាមានហើយ។ ប្រភពព័ត៌មាន២ផ្សេងគ្នា ខ្លះអះអាងថា ជាមនុស្សប្រុស ខ្លះអះអាងថា ជាមនុស្សស្រី ។
ជុំវិញព័ត៌មានខាងលើនេះសមត្ថកិច្ចមូលដ្ឋានក៏ដូចជាសមត្ថកិច្ចដែលឈរជើងនៅគោលដៅការពារស្ពានព្រះមុនីវង្ស កំពុងរង់ចាំមើលសពអណ្តែតឡើង ដើម្បីបានដឹងថា ជាមនុស្សប្រុស ឬក៏ស្រី…និងកំពុងរង់ចាំសាច់ញាតិមកសួរនាំ ដើម្បីសមត្ថកិច្ចដឹងថា អ្នកលោតទឹកនោះមានវិបត្តិអ្វីទើបមកលោតទឹកសម្លាប់ខ្លួនបែបនេះ ៕
ចែករំលែកព័តមាននេះ