រាជធានីភ្នំពេញ ៖ វិមានអនុស្សារីយ៍ឈ្នះ-ឈ្នះ ដែលកំពុងតែសាងសង់ក្នុងគោលបំណងរំឭកគុណវីរបុរសជាតិ ដូចដែលបណ្តាប្រទេសជឿនលឿនជាច្រើនបានអនុវត្តដើម្បីទុកឲ្យកូនចៅគោរពបូជានោះ បានសម្រេចសមិទ្ធផលប្រមាណ៧០% ហើយ ។ នេះបើការឱ្យដឹងរបស់សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ។
សម្តេចពិជ័យសេនា មានប្រសាសន៍ថា រាជរដ្ឋាភិបាលកម្ពុជាគ្រោងកំណត់យកថ្ងៃ២៩ ធ្នូ ជារៀងរាល់ឆ្នាំដើម្បីប្រារព្ធទិវានយោបាយឈ្នះ-ឈ្នះ ហើយទិវានេះអាចនឹងចាប់ផ្តើមប្រារព្ធចាប់ពីឆ្នាំក្រោយតទៅ។
សម្តេច ទៀ បាញ់ បន្តថា ៖ «ពួកខ្ញុំយល់ថា ថ្ងៃទី២៩ ខែធ្នូ គឺជាថ្ងៃដ៏សំខាន់បំផុតពាក់ព័ន្ធជាមួយនឹងនយោបាយឈ្នះ-ឈ្នះ បានន័យថា វាបញ្ចប់ទាំងអស់នូវរឿងរ៉ាវ បានន័យថា ថ្ងៃ២៩ ខែធ្នូ ១៩៩៨ គឺកិច្ចការទាំងនោះចាត់ទុកថា វាចប់សព្វគ្រប់ ដោយសារយើងមានឯកសារច្បាស់លាស់»។
ថ្លែងនៅក្នុងកិច្ចប្រជុំពិភាក្សាការងារត្រៀមរបាយការណ៍លទ្ធផលសាងសង់វិមានអនុស្សារីយ៍ឈ្នះ-ឈ្នះ នៅថ្ងៃទី២៨ ខែវិច្ឆិកា ឆ្នាំ២០១៧ សម្តេចពិជ័យសេនា ទៀ បាញ់ បានបញ្ជាក់ថា សម្តេចនឹងធ្វើសំណើរទៅសម្តេចតេជោ ហ៊ុន សែន ដែលជាស្ថាបនិកម្នាក់របស់វិមានឈ្នះ-ឈ្នះ ដើម្បីកំណត់ជាផ្លូវការ។ សម្តេចបន្តថា រដ្ឋាភិបាលកំពុងព្យាយាមខិតខំប្រមូលឯកសារនានាសម្រាប់ដាក់តំកល់ទុក ដើម្បីបង្ហាញពីគោលនយោបាយឈ្នះ ឈ្នះ របស់រាជរដ្ឋាភិបាលកម្ពុជាបច្ចុប្បន្ន។
វិមានអនុស្សាវរីយ៍នយោបាយឈ្នះ-ឈ្នះ មានទីតាំងស្ថិតនៅសង្កាត់បាក់ខែង ខណ្ឌជ្រោយចង្វា រាជធានីភ្នំពេញ នៅខាងមុខពហុកីឡដ្ឋានមរតតេជោ ត្រូវបានសាងសង់លើផ្ទៃដីប្រមាណជាង ០៨ហិចតា៕
ចែករំលែកព័តមាននេះ